ދައުލަތަށް ދިގުމުއްދަތަށް ޚިދުމަތްކުރުމުގެ އިނާމު ޕީއެސްއެމްގެ 6 މުވައްޒަފަކަށް

ދިވެހި ދައުލަތަށް ދިގު މުއްދަތަކަށް ޚިދުމަތް ކުރެއްވުމުގެ އިނާމު، ޕަބްލިކް ސަރވިސް މީޑިއާ، ޕީއެސްއެމްގެ 6 މުވައްޒަފަކަށް ލިބިވަޑައިގެންފިއެވެ. މީގެތެރޭގައި ޕީއެސްއެމްގެ އެކި ޑިޕާޓްމަންޓުތަކުގައި ޚިދުމަތް ކުރައްވަމުންދާ މުވައްޒަފުން ހިމެނެއެވެ. މި ހުރިހާ މުވައްޒަފުން މިވަގުތުވެސް ދެމިތިބީ ކުންފުނީގެ ވަޒީފާގައެވެ.

ޚިދުމަތްކުރުމުގެ އިނާމު ލިބިވަޑައިގެންނެވި ޕީއެސްއެމްގެ މުވައްޒަފުން:

އަޙްމަދު މަނިކު ދިވެހި ދަޢުލަތަށް ޚިދުމަތް ކުރައްވަން ފެއްޓެވީ 26 ޑިސެމްބަރ 1979ގައި ސެންޓްރަލް ހޮސްޕިޓަލުގެ ކާތިބުކަމުގެ ވަޒީފާއެވެ. އޭގެފަހުން ނޭޝަނަލް ސެކިއުރިޓީ ސަރވިސް، ގަލޮޅުއަވަށު އޮފީސް އަދި އެސްޓީއޯގައި ވަޒީފާ އަދާކުރެއްވިއެވެ.

އަޙްމަދު މަނިކު ރޭޑިއޯ މޯލްޑިވްސް އާއި ގުޅިވަޑައިގަތީ 17 މާރޗް 2002 ގައެވެ. އަދާކުރެއްވި ވަޒީފާގެ ތެރޭގައި ލޮޖިސްޓިކްގެ އެކި މަސައްކަތްތަކަތްތައް ހިމެނެއެވެ.
އަޙްމަދު މަނިކު ވަނީ ދަޢުލަތުގެ އެކި މަޤާމުތަކުގައި 43 އަހަރަށްވުރެ ދިގު މުއްދަތަށް ޚިދުމަތް ކުރައްވާފައެވެ. މިހާރު ހުންނެވީ ޕަބްލިކް ސަރވިސް މީޑިއާގެ ލޮޖިސްޓިކް އޮފިސަރ ކަމުގެ މަޤާމުގައެވެ.

ސަލްމާ އަބްދުލްކަރީމް ދިވެހި ރާއްޖޭގެ އަޑުގައި ޚިދުމަތް ކުރައްވަން ފެއްޓެވީ 13 އެޕްރީލް 1988ގައި ޓައިޕިސްޓެއްގެ ގޮތުގައެވެ. ސަލްމާ ވަނީ ޕީއެސްއެމްގައި އެކި މަޤާމުތަކުން ޚިދުމަތް ކުރައްވާފައެވެ. އެގޮތުން އިދާރީ އެކި މަޤާމުތަކާއި ކަސްޓަމަރ ސަރވިސްއާއި ގުޅޭ ޚިދުމަތްތައް ހިމެނެއެވެ.

ސަލްމާ މިހާތަނަށް ވަނީ 35 އަހަރަށްވުރެ ދިގު މުއްދަތަކަށް ޚިދުމަތްކުރައްވާފައެވެ. ސަލްމާ މިހާރު ހުންނެވީ ޕީއެސްއެމްގެ ޓެކްނިކަލް އިކުވިޕްމެންޓް ޑިސްޕެޗް އޮފިސަރުގެ މަޤާމުގައެވެ.

މުޙައްމަދު ސަޢީދު ޓެލެވިޜަން މޯލްޑިވްސްއަށް ޚިދުމަތް ކުރަންވައް ފެއްޓެވީ 22 މެއި 1988ގައި ޓެކްނީޝަން ޓްރެއިނީއެއްގެގޮތުގައެވެ. 2003 ވަނަ އަހަރާއި ހަމައަށް މުޙައްމަދު ސަޢީދު ވަނީ ޕްރޮޑަކްޝަންގެ ގިނަ މަޤާމުތައް ފުރުއްވާފައެވެ.

މީގެއިތުރުން މެނޭޖަރ ސޭލްސް، އެކްޓިންގ ޑިރެކްޓަރ، ޑިރެކްޓަރ ސޭލްސް އެންޑް މަރކެޓިން، ޑިރެކްޓަރ ކޯޕަރޭޓް އެފެއަރސް، ޗީފް އޮޕަރޭޓިން އޮފިސަރގެ މަޤާމު އަދާކުރައްވާފައިވެއެވެ.
ދަޢުލަތުގެ މީޑިއާއަށް 35 އަހަރަށްވުރެ ދިގު މުއްދަތަށް ވަނީ ޚިދުމަތް ކުރައްވާފައިވެއެވެ. މިވަގުތު ހުންނެވީ ޑިރެކްޓަރ ޕްރޮކިއުމަންޓްގެ މަޤާމުގައެވެ.

ހުސައިން ޝުހާދު ދަޢުލަތުގެ މީޑިއާއި ގުޅިވަޑައިގަތީ 9 ޖެނުއަރީ 1989ވަނަ އަހަރު، ޓެކްނިޝަން ޓްރެއިނީއެއްގެގޮތުގައެވެ. އޭގެ ފަހުން ޕްރޮޑަކްޝަންގެ އެކި ލެވެލްގެ ވަޒީފާތައް އަދާކުރެއްވިއެވެ. މީގެއިތުރުން ޑިރެކްޓަރ އިންޖިނިއަރިން، ޗީފް ޓެކްނިކަލް އޮފިސަރގެ މަޤާމު އަދާކުރައްވާފައިވެއެވެ.
ޕަބްލިކް ސަރވިސް މީޑިއާގެ ރޭޑިއޯ އަދި ޓީވީ ޗެނަލް ޤައުމުގެ ހުރިހާ ހިސާބަކަށް ފޯރުކޮށްދިނުމަށް މަސައްކަތްކުރުމާއި މޮނިޓަރކޮށް ބެލެހެއްޓުމުގެ މަސައްކަތް ޙުސައިން ޝުހާދު ވަނީ ކުރައްވާފައެވެ.

ޙުސައިން ޝުހާދު ދަޢުލަތުގެ މީޑިއާއަށް 35 އަހަރަށްވުރެ ދިގު މުއްދަތަށް ވަނީ ޚިދުމަތްކުރައްވާފައެވެ. ޝުހާދު މިވަގުތު ހުންނެވީ ޑިރެކްޓަރ ބްރޮޑްކާސްޓް ޓެކްނޮލޮޖީގެ މަޤާމުގައެވެ.

މުޙައްމަދު ރަޝީދު ދަޢުލަތުގެ މީޑިއާއާއި ގުޅިވަޑައިގަތީ 26 ޖެނުއަރީ 1989ގައި، ކެމެރާމަން ޓްރެއިނީއެއްގެ ގޮތުގައެވެ. މުޙައްމަދު ރަޝީދު ކެމެޕާމަނެއްގެގޮތުގައި ގިނަ ލެވަލްތަކުގައި މަޤާމުތަކެއް ފުރުއްވާފައިވެއެވެ. އެގޮތުން އެގްޒެކެޓިވް ކެމެރަމަނެއްގެ ގޮގުގައި މަސައްކަތްކުރެއްވުމަށްފަހު މިހާރު ހުންނެވީ ޗީފް ކެމެރާމަންގެ ގޮތުގައެވެ. މުޙައްމަދު ރަޝީދު އެންމެ ގިނަ ދުވަހު މަސައްކަތް ކުރައްވާފައިވަނީ ރައީސުލްޖުމްހޫރިއްޔާގެ ޚާއްސަ ކެމެރާމަނެއްގެގޮތުގައެވެ. މުޙައްމަދު ރަޝީދު ޕީއެސްއެމްއަށް 35 އަހަރަށްވުރެ ދިގު މުއްދަތަށް ޚިދުމަތް ކުރައްވާފައިވެއެވެ. އަދި މިވަގުތުވެސް ހުންނެވީ ޕީއެސްއެމްގެ ވަޒީފާގައެވެ.

މުޙައްމަދު ޝިޔާޟް ދަޢުލަތުގެ މީޑިއަގެ ވަޒީފާއާއި ގުޅުނީ 26 ޖެނުއަރީ 1989ގައި ކެމެރާމަން ޓްރެއިނީއެއްގެގޮތުގައެވެ. ޝިޔާޒްވަނީ ކެމެރާމަނެއްގެގޮތުން އެކި ލެވެލްގެ މަޤާމުތައް ފުރުއްވާފައެވެ. މިވަގުތު ހުރީ ޗީފް ކެމެރާމަންގެ މަޤާމުގައެވެ.

މުޙައްމަދު ޝިޔާޟް ވަނީ ޕީއެސްއެމްއަށް 35 އަހަރަށްވުރެ ދިގު މުއްދަތަށް ޚިދުމަތްކުރައްވާފައެވެ. އަދި މިވަގުތުވެސް ވަޒީފާ އަދާކުރައްވަމުންދަނީ ޕީއެސްއެމްގައެވެ.