ފަލަސްޠީނު ރައްޔިތުންގެ ޙައްޤުގައި ކުރާމަސައްކަތް އިތުރަށް ހަރުދަނާކުރުމަށް ޚާރިޖީ ވަޒީރު ގޮވާލައްވައިފި
ފަލަސްތީނު ރައްޔިތުން އުފުލަމުންދާ ތަކުލީފުތައް ކުޑަކުރުމަށާއި އެރައްޔިތުންގެ ހައްޤުގައި އިތުރަށް މަސައްކަތްކުރުމުގެ ގޮތުން ހަރުދަނާ ފިޔަވަޅުތަކެއް އެޅުމަށް ޚާރިޖީ ވަޒީރު ޑރ. އަބްދުﷲ ޚަލީލް ގޮވާލައްވައިފިއެވެ.
ޚާރިޖީ ވަޒީރު، ޑރ. ޢަބްދުﷲ ޚަލީލް މިކަމަށް ގޮވާލެއްވީ ސައުދީ ޢަރަބިއްޔާގެ ރިޔާދުގައި މާދަމާ ބޭއްވުމަށް ހަމަޖެހިފައިވާ "އެކްސްޓްރާ އޯޑިނަރީ ޖޮއިންޓް އަރަބް-އިސްލާމިކް ސަމިޓަށް ތައްޔާރުވުމުގެ ގޮތުން ޚާރިޖީ ވަޒީރުންގެ ފެންވަރުގައި މިއަދު ބޭއްވި ބައްދަލުވުމުގައެވެ.
ޚާރިޖީ ވަޒީރު ދެއްވި ތަޤްރީރުގައި، އިސްރާއީލުން މެދުކެނޑުމެއްނެތި ފަލަސްޠީނަށް ދެމުންގެންދާ ހަމަލާތަކާއި ހިންގަމުންދާ ނަސްލުނައްތާލުމުގެ އަމަލުތައް ހަރުކަށި އިބާރާތުން ކުށްވެރިކޮށް، ފަލަސްތީނުގެ ރައްޔިތުންނަށް ކުރިމަތިވާ އަނިޔާތަކަށް ލުޔެއް ލިބިފައިނުވާތީ އެކަމާމެދު ކަންބޮޑުވުން ފާޅުކުރެއްވިއެވެ. އަދި ފަލަސްޠީނުގެ ރައްޔިތުން ތަހައްމަލްކުރަމުންދާ އަނިޔާތަކުން އަރައިގަތުމަށް އެހީވުމަކީ މުޅި އިސްލާމީ އުންމަތުގެ ޒިންމާއެއްކަމުގައި ފާހަގަކުރައްވައި، މި މަގުގައި އަމަލީ މަސައްކަތްކުރުމަށް ވަޒީރު ގޮވާލެއްވިއެވެ.
The suffering of Palestine is the suffering of the entire Islamic Ummah.
— Abdulla Khaleel (@abkhaleel) November 10, 2024
At the Preparatory Meeting at Foreign Ministers level held prior to the Extraordinary Joint Arab-Islamic Summit, I called for stronger action to alleviate the suffering of the Palestinian people, whose… pic.twitter.com/dXKR7ZQdKa
ވަޒީރުގެ ވާހަކަފުޅުގައި އިސްރާއީލުން ބައިނަލްއަޤްވާމީ ޤާނޫނާ ޚިލާފަށް ހިންގަމުންގެންދާ އަމަލުތައް ކުއްވެރިކޮށް ވަކި ޤައުމެއް އިސްތިސްނާ ނުވާނެހެން ބައިނަލްއަޤްވާމީ ޤާނޫނު ތަންފީޒުކުރުމަށްވެސްވަނީ ގޮވާލައްވާފައެވެ. އަދި އދ. ގެ ސަލާމަތީ މަޖިލިސް އަދި އިންޓަނޭޝަނަލް ކޯޓް އޮފް ޖަސްޓިސް، އައިސީޖޭ ފަދަ މަންސަތަކުގައި އިސްރާއީލު ޖަވާބުދާރީކުރުމަށް ކުރަންޖެހޭ މަސައްކަތްތައް ކުރުމަށްވެސް އެމަނިކުފާނުވަނީ ގޮވާލައްވާފައެވެ.
މީގެ އިތުރުން، ފަލަސްތީނުގެ ހައްޤުގައި ވަކާލާތުކުރުމުގައި ދިވެހިރާއްޖެއިން އަބަދުވެސް ދެމިއޮންނާނެކަމުގެ ޔަގީންކަން ދެއްވައި، އިސްލާމީ ގައުމުތަކާއެކު ފަލަސްތީނުގެ މައްސަލައަށް ހައްލެއް ހޯދުމަށް މަސައްކަތްކުރުމަށް ފަސްނުޖެހެނޭ ކަމަށް ވަޒީރު ވިދާޅުވިއެވެ. ހަމައެއާއެކު، ރާއްޖެއިން އަބަދުވެސް ވަކާލާތުކުރާ ގޮތަށް މި ހަނގުރާމައަށް އޮތް ހަމައެކަނި ދެމެހެއްޓެނިވި ހައްލަކީ 1967ގެ ކުރިން ފަލަސްތީނުގެ ބޯޑަރުތަކާ އެއްގޮތްވާ ގޮތުގެމަތިން، އިރުމަތީ ޤުދުސް އަކީ އެ ގައުމުގެ ވެރިކަންކުރާ ރަށް ކަމަށް ކަނޑައަޅައި، ފަލަސްތީން އިސްރާއީލުގެ އަތްދަށުން މިނިވަންކޮށް، އެއީ މިނިވަން، މުސްތަޤިއްލު އަދި އަމިއްލަ ސިޔާދަތީ ބާރު ހިނގާ ގައުމަކަށް ހެދުންކަމުގައި އެ މަނިކުފާނު ވިދާޅުވިއެވެ.
ނޮވެމްބަރ މަހުގެ 11 ވަނަ ދުވަހުގައި ބޭއްވުމަށް ހަމަޖެހިފައިވާ އެކްސްޓްރާއޯޑިނަރީ ޖޮއިންޓް އަރަބް-އިސްލާމިކް ސަމިޓަކީ ސައުދީއަރަބިއްޔާގެ ސަރުކާރާއި އޯގަނައިޒޭޝަން އޮފް އިސްލާމިކް ކޯޕަރޭޝަން، އޯއައިސީ އާއި ލީގް އޮފް އަރަބް ސްޓޭޓްސް އާ ގުޅިގެން ފަލަސްތީން އަދި ލުބްނާނަށް އިސްރާއީލުން ދެމުން ގެންދާ ހަމަލާތަކަށް ހައްލެއް ހޯދުމަށް މަޝްވަރާކުރުމަށްޓަކައި ބާއްވާ ބައްދަލުވުމެކެވެ.