ސްކޫލުތަކުގެ އެންމެ ބޮޑު އެތުލެޓިކްސް މުބާރާތް ކަމަށްވާ އިންޓަރ ސްކޫލް އެތުލެޓިކްސް މުބާރާތް، މި އަހަރު 1500 އަށްވުރެ ގިނަ އެތުލީޓުންނާއެކު ހުޅުމާލޭގައި ފަށައިފިއެވެ.
ރާއްޖޭގެ އެކި ކަންކޮޅުތަކުން އެތުލީޓުން ވާދަކުރާ މިއަހަރުގެ އެތުލެޓިކްސް މުބާރާތުގައި 52 ސްކޫލުން އެތުލީޓުން ވަނީ ބައިވެރިވެފައެވެ. މުބާރާތުގެ އެކި އިވެންޓުތަކަށް ބަލާއިރު، ހުރިހާ އިވެންޓަކަށްވެސް ވަނީ ބޮޑު ތަރުހީބެއް ލިބިގެންގޮސްފައެވެ.
އަންނަ ބުރާސްފަތި ދުވަހުގެ ނިޔަލަށް ކުރިޔަށްދާ މި މުބާރާތުގެ އެންމެ ފޯރިގަދަ އިވެންޓުތަކުގެ ތެރޭގައި 100 މީޓަރާއި 200 މީޓަރު ދުވުމުގެ އިތުރުން ފޯރިގަދަވަމުން އަންނަ އިވެންޓުތައް ކަމަށްވާ ލޯންގް ޖަމްޕާއި ހައި ޖަމްޕުގެ އިވެންޓުތައް ހިމެނެއެވެ. ހެނދުނާއި މެންދުރު ފަހުގެ ދަންފަޅިތަކަށް ބަހާލައިން މިއަހަރުގެ އިންޓަސްކޫލް މުބާރާތް ކުރިޔަށްދާއިރު، މިއީ ރާއްޖޭގެ އެކި ކަންކޮޅުތަކުން ގިނަ ސްކޫލްތަކެއް ގަވާއިދުން ވާދަކުރާ މުބާރާތެކެވެ.
ބޮޑު ތަރުހީބެއް ލިބެމުން އަންނަ މި މުބާރާތަކީ ގިނަ ގައުމީ ރިކޯޑުތަކެއް ހަދަމުން އަންނަ މުބާރާތެކެވެ. އަދި އަރަމުން އަންނަ ހުނަރުވެރި އެތުލީޓުންގެ ވިދުން އެންމެ ގަދަވާ އެއް މުބާރާތެވެ.