މެޗްގެ ފަހުވަގުތު ކާމިޔާބުކުރި ދެ ލަނޑުން އަލްބޭނިޔާގެ މައްޗަށް ކުރި ހޯދާ ޔޫރޯ ފުޓްބޯޅަ މުބާރާތުގެ ގަދަ ސޯޅައިން ފްރާންސް ޖާގަ ހޯދައިފިއެވެ.
ރޭ ފްރާންސްއިން އަލްބޭނިޔާގެ މައްޗަށް ކުރި ހޯދީ 2 ލަނޑު 0 ލަނޑުންނެވެ. މެޗްގައި ފްރާންސްއިން ކާމިޔާބުކުރި 2 ލަނޑުވެސް ޖަހާފައިވަނީ މެޗްގެ 90 މިނެޓްގެ ކުޅުން ހަމަވިފަހުންނެވެ. ބަދަލު ކުޅުންތެރިއެއްގެ ގޮތުގައި ކުޅެން ނުކުތް އެންޓޮއިން ގްރީޒްމަން މެޗްގެ 90 ވަނަ މިނެޓްގައި ފްރާންސްއަށް ފުރަތަމަ ލަނޑު ކާމިޔާބުކޮށްދީ ލީޑް ނަގައިދީފައިވަނިކޮށް 2 ވަނަ ލަނޑު އިތުރަށް ދެއްކި 5 މިނެޓްގައި ކާމިޔާބުކޮށްދިނީ ޑިމިޓްރި ޕަޔެޓެވެ.
މި މެޗުން މޮޅުވެ ފްރާންސް ގްރޫޕް އޭގެ 1 ވަނާގައި އޮތީ ކުޅުނު 2 މެޗުން 6 ޕޮއިންޓް ލިބިގެނެވެ. 2 ވަނާގައި އޮތް ސްވިޒަރލެންޑަށް ލިބެނީ 4 ޕޮއިންޓެވެ. ފްރާންސްގެ އިތުރުން މި ގްރޫޕުން ގަދަ 16 އިން ޖާގަ ކަށަވަރުކުރާނެ ޓީމެއް އެނގޭނީ މި ގްރޫޕްގެ ފަހު މެޗްތަކަށްފަހުއެވެ.