މިހާރު ކުރިއަށްދާ ތިލައުތުރު ފުޓްސަލް މުބާރާތް 2024 ގެ ފައިނަލަށް އުތީމާއި އިހަވަންދޫ ދަތުރުކޮށްފިއެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ކުރިއަށްގެންދާ މި މުބާރާތް މި އަހަރު ބާއްވަނީ ކެލާގައެވެ. މި މުބާރާތުގައި ހއ. އަތޮޅުގެ 10 ޓީމެއް ވަނީ ބައިވެރިވެފައެވެ.
މި މުބާރާތުގެ ފައިނަލުގެ ޖާގައެއް އުތީމުން ހޯދީ ކެލާ ފުޓްސަލް ދަނޑުގައި މިއަދު ހަވީރު ކުޅުނު ސެމީ ފައިނަލް ފުރަތަމަ މެޗުގައި ބާރަށް އަތުން 4-1 ގެ ނަތީޖާއަކުން މޮޅުވެގެންނެވެ. މި މެޗުގައި އުތީމުގެ ކެޕްޓަން މުޙައްމަދު މަޒީން ދެ ލަނޑު ކާމިޔާބުކުރިއިރު، އެ ޓީމުގެ އަނެއް ލަނޑުތައް ޖަހައިދިނީ މުޙައްމަދު ނަބީލް އާއި އަލީ އިލްހާމެވެ. މެޗުގައި ބާރަށުން ކާމިޔާބުކުރި ހަމައެކަނި ލަނޑު އެ ޓީމަށް ޖަހައިދިނީ މުޙައްމަދު މާއިސްއެވެ.
މީގެ އިތުރުން މި މުބާރާތުގެ ފައިނަލުގެ ޖާގައެއް އިހަވަންދޫން ހޯދީ މިރޭ ކުޅުނު ސެމީ ފައިނަލް ދެވަނަ މެޗުގައި ޕެނަލްޓީ ޖަހައިގެން 4-1 ގެ ނަތީޖާއަކުން ދިއްދޫ ބަލިކުރުމަށްފަހުއެވެ. ފޯރިގަދަ ކުޅުމެއް ފެނިގެންދިޔަ މި މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 1-1 ގެ ނަތީޖާއަކުން އެއްވަރުވެފައެވެ. މި މެޗުގައި މުޙައްމަދު ސާނިއު އިހަވަންދުއަށް ލީޑު ނަގައިދީފައިވަނިކޮށް، ދިއްދުއަށް ނަތީޖާ އެއްވަރުކޮށްދިނީ ކެޕްޓަން މުޙައްމަދު ނައުޝާދެވެ.
މި ނަތީޖާތަކާއެކު މުބާރާތުގެ ފައިނަލަށް އުތީމާއި އިހަވަންދޫ ދަތުރުކުރިއިރު، ފައިނަލް މެޗު ކުޅުމަށް ހަމަޖެހިފައިވަނީ ހޯމަ ދުވަހުގެ ހަވީރެވެ.