މީހަކު ރަހީނުކުރީ އެކި ގޭންގުތަކަށް ނިސްބަތްވާ މީހުން، ސީރިއަސް މައްސަލައެއް ގޮތުގައި ތަހުގީގްކުރަނީ

ހިޔާ ޓަވަރުގައި މީހަކު ރަހީނުކޮށްގެން ގެންގުޅުނީ އެކި ގޭންގުތަކަށް ނިސްބަތްވާ 12 މީހުންކަމަށާއި، އެ މައްސަލަ ސީރިއަސް މައްސަލައެއްގެ ގޮތުގައި ތަހުގީގްކުރަމުން އަންނަކަމަށް ފުލުހުން ވިދާޅުވެއްޖެއެވެ. ހުޅުމާލޭ ދެވަނަ ފިޔަވަހީގެ ހިޔާފްލެޓުގެ 9ވަނަ ޓަވަރުގެ 20ވަނަ ފަންގިފާލާގެ އެޕާޓްމަންޓެއްގައި ރަހީނުކުރި މީހާ ރޭ ފުލުހުން ވަނީ ސަލާމަތްކޮށްފައެވެ. އޭނާ ސަލާމަތްކުރުމަށް އެ އެޕާޓްމަންޓްގެ ދޮރު ވައްޓާލުމަށްފަހު ފުލުހުން ވަންއިރު، އެމީހުން ތިބީ ރަހީނުކޮށްފައިވާ މީހާގެ ބޯ ބާލައި އިނގިލި ބުރިކޮށްލަން ތައްޔާރުވެގެންކަމަށް ފުލުހުން ރޭ ވަނީ ވިދާޅުވެފައެވެ. ރަހީނުކޮށްފައި ހުރީ ދިވެހި ޒުވާން ފިރިހެނެކެވެ.

މީހަކު ރަހީނުކޮށްގެން އުޅޭކަމަށް ފުލުހުންނަށް މަޢުލޫމާތު ލިބިފައިވަނީ ރޭ 19:40 ހާއިރުކަމަށް ފުލުހުން ވިދާޅުވެއެވެ. އެމީހާ ރަހީނުކޮށްފައި ހުރި ތަނަށް ފުލުހުން ގޮސް އެޕާޓްމަންޓްގެ ދޮރު ވައްޓާލައި، އެތަނަށް ވަދެ އެމީހާ ފުލުހުގެ ހިމާޔަތަށް ގެނެސްފައިވެއެވެ. ފުލުހުން އެ އެޕާޓުމަންޓަށް ވަންއިރު އެތަނުގައި އިތުރު 12 މީހުން ތިބިއެވެ.

ޕީއެސްއެމް ނިއުސްގެ ނޫސްވެރިންވަނީ އެމީހާ ރަހީނުކޮށްފައިހުރި އެޕާޓްމަންޓަށް ގޮސް، ފުލުންގެ ތަޙުޤީޤު ކުރިއަށްދިޔަގޮތް ބަލާފައެވެ.
ފުލުހުންވަނީ އެޕާޓްމަންޓްގައި ތިބި 12 މީހުން ހައްޔަރުކޮށްފައެވެ. އަދި އެތަނުގައި ފެންނަން ހުރި ހެކިތައް ތަޙުޤީގަށް ނަގާފައިވެއެވެ.
އެތަނަށް ދިޔަ ޕީއެސްއެމް ނިއުސްގެ ނޫސްވެރިން ބުނިގޮތުގައި ރަހީނުކުރި މީހާގެ އިސްތަށިގަނޑުން ކޮށާފައިވާ އިސްތަށިތައްވެސް ބިންމަތީގައި ހުއްޓެވެ. އަދި ހައްޔަރުކުރި މީހުން ތިބީ ފަހަތަށް ބިޑިއަޅުވާ ފާރާ ދިމާލަށް މޫނުވާގޮތަށް ބައިތިއްބާފައެވެ. އެ އެޕާޓްމަންޓް ސިފަވަނީ ގޭންގްތަކުން ހިންގާ އައްޑާއެއްގެ ގޮތުގައެވެ.

މި މައްސަލައާއި ގުޅޭގޮތުން އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވީ މައްސަލައިގެ ސީންއަށް ފުލުހުން ފިޔައީ އާންމު ފަރާތަކުން ގުޅާ އިންޓެލްއާ ޙިއްސާކުރި މަޢުލުމާތަކާއި ގުޅިގެންކަމަށެވެ. މަޢުލޫމާތު ލިބުނީ ހުޅުމާލެ ހިޔާގެ 9ވަނަ ފްލެޓްގެ 20 ވަނަ ފަންގިފިލާއަށް މީހަކު ރަހީނުކޮށް ގެންގޮސްފައިވާކަމުގެ މަޢުލޫމާތުކަމަށް ދާއޫދު ވިދާޅުވިއެވެ. އެއާއެކު ފުލުހުންގެ އިންޓެލިޖެންސްއާއި ހުޅުމާލެ ފުލުހުން އެ އެޕަރަޓްމަންޓް ހޯދައި، އެތާނގެ ދޮރު ވައްޓާލުމަށްފަހު އެޕާޓްމަންޓަށް ވަދެ ކުރި މަސައްކަތުން، ރަހީނުކުރި މީހާއަށް މާބޮޑު ގެއްލުމެއް ކުރިމަތިނުވެ އެމީހާ ފުލުހުންގެ ޙިމާޔަތަށް ގެނެވުނުކަމަށް ދާއޫދު ވިދާޅުވިއެވެ.

"ރަހީނުކުރި މީހާ ހުރީ ބޯބާލާފައި. ސީންއަށް ގޮސް މަޢުލޫމާތު ނެގުމުން ރަހީނުކޮށްފައި އިން މީހާ ބުނީ ގޭންގުގެ މީހުންތައް އޭނާގެ އިނގިލި ބުރިކޮށްލަން ތައްޔާރައް އޭރު ތިއްބާކަމަށް ފުލުހުން އައީ. އެމިހާއަށް ބޮޑު އަނިޔާއެއް ލިބިފައެއް ނުވެ." އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވިއެވެ.

އެތަނުގައި ދަގަނޑާއި ހަނޑަހަ ފަދަ ތަކެއްޗާއި، ގެއްލުންދިނުމަށް ބޭނުންކުރާ އެކި ބާވަތުގެ ތަކެތިވެސް ފެންނަންހުއްޓެވެ. އަދި އެތަނުން މަސްތުވާތަކެތި ބޭނުންކުރުމަށް ބޭނުންކުރާ އެކި ޒާތުގެ ތަކެތިކަމަށް ބެލެވޭ ޒާތުގެ އެއްޗެހިވެސް ފެނިފައިވެއެވެ.
މިމައްސަލައާ ގުޅިގެން ފުލުހުން ދަނީ ބޮޑު ތަޙުޤީޤެއް ހިންގަމުންނެވެ.

މިހާދިސާގައި ރަހީނުކުރި މީހާ ސަލާމަތްކުރުމަށް ފުލުހުން މަސައްކަތް ކުރަމުންދިޔައިރު ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން އެތަނަށް ވަޑައިގެން ފުލުހުންނަށްވަނީ ހިތްވަރުދެއްވާފައެވެ.