ޔުއެފާ ނޭޝަންސް ލީގުގައި ޖަރުމަނުން ކުޅުމަށް ހަމަޖެހިފައިވާ މެޗުތަކަށް ނެގި ސްކޮޑުގައި އިނގިރޭސި ޕްރިމިއަރ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީގެ ބަދަލު ގޯލްކީޕަރު ސްޓެފަން އޯޓޭގާ ހިމަނައިފިއެވެ.
މިއީ އުމުރުން 32 އަހަރުގެ އޯޓޭގާ އަށް ޖަރުމަނުގެ ސްކޮޑުން ޖާގަ ލިބުނު ފުރަތަމަ ފަހަރެވެ. މީގެ ދެ އަހަރު ކުރީން، 2022 ވަނަ އަހަރު ސިޓީއާ ގުޅުނު އޯޓޭގާ އަންނަނީ އެ ޓީމުގެ އެއްވަނަ ގޯލްކީޕަރު، އެޑަސަން މޮރައެސްގެ ބެކަޕެއްގެ ގޮތުގައި ކުޅެމުން ތަފާތު މޮޅު ކުޅުމެއްދައްކަމުންނެވެ.
އޯޓޭގާ އަށް ޕްރިމިއާ ލީގުގައި ސިޓީ ކުޅޭ މެޗުތަކުން ގަވާއިދުން ކުޅުމުގެ ފުރުޞަތު ނުލިބުނުނަމަވެސް، ޔުއެފާ ޗެމްޕިއަންސް ލީގާއި، ޑޮމެސްޓިކް އެހެން މުބާރާތްތަކުގައި އެޑަސަންގެ ބަދަލުގައި އޭނާ އަށް ކުޅުމުގެ ގިނަ ފުރުޞަތުތަކެއް ލިބިފައިވެއެވެ. ނަމަވެސް، އެ ޓީމުގައި ކުޅެން ލިބޭ މަދު ފުރުޞަތުތަކުގައި ވެސް އޯޓޭގާ އަންނަނީ ފާހަގަކޮށްލެވޭ ފެންވަރެއްގައި ތަފާތު ދައްކަމުންނެވެ. އެހެންކަމުން، މީގެކުރީން ސިޓީގެ ކޯޗު، ޕެޕް ގާޑިއޯލާ ވެސް ވަނީ އޯޓޭގާ އަކީ 'ވޯލްޑް ކްލާސް ގޯލްކީޕަރެއްގެ' ގޮތުގައި ލޭބަލް ކޮށްފައެވެ.
ބެލެވޭ ގޮތުގައި ޖަރުމަނު ސްކޮޑުގައި އޯޓޭގާ ހިމެނޭނީ، ސްޓުޓްގާޓްގެ އެލެގްޒެންޑާ ނޫބެލް އާއި ހޮފެއިންހެއިމްގެ އޮލިވާ ބައުމަންގެ ފަހަތުން ތިންވަނަ ކީޕަރުގެ ގޮތުގައެވެ. ނޫބެލް އާއި ބައުމަން އަށް ވެސް ފުރަތަމަ ފަހަރަށް ގައުމީ ޖާޒީގައި ކުޅުމުގެ ފުރުޞަތު ލިބުނީ މިދިޔަ އޮކްޓޫބަރު މަހު ކުޅެވުނު ނޭޝަންސް ލީގުގެ މެޗުތަކުގައެވެ.
މި ފަހަރުގެ ނޭޝަންސް ލީގުގެ ގްރޫޕް އޭ ތިނެއްގެ އެއްވަނައިގައި ޖަރުމަނު އޮތްއިރު، އެ ޓީމު ވަނީ ކުއާޓާ ފައިނަލަށް ދަތުރުކޮށްފައެވެ.
"ކުއާޓާ ފައިނަލަށް ދަތުރުކުރެވުމުން، މިހާރު އަހަރެމެން ބޭނުންވަނީ ގްރޫޕުގެ އެއްވަނަ ހޯދުމަށް،" ޖަރުމަނުގެ ކޯޗު، ހޫލިއަން ނާގަލްސްމަން ބުންޏެވެ.
ނޭޝަންސް ލީގުގެ ގަދަ ހަތަރެއްގައި ހިމެނުމަކީ ކުރިއަށް އޮތް 2026 ވަނަ އަހަރުގެ ފީފާ ވޯލްޑް ކަޕްގެ ކުރީން ހާސިލްކުރަންޖެހޭ ލަނޑުދަނޑިއެއްގެ ގޮތުގައި ނާގަލްސްމަން ގަބޫލުކުރެއެވެ.
އެ މުބާރާތުގައި އެ ޓީމަށް ދެން އޮތީ މި މަހުގެ 17 ވަނަ ދުވަހު އަމިއްލަ ދަނޑުގައި ބޮސްނިއާއާ ދެކޮޅަށް ކުޅެން ޖެހޭ މެޗާއި، އޭގެ ތިން ދުވަސް ފަހުން ރަށުން ބޭރުގައި ހަންގޭރީއާ ދެކޮޅަށް ކުޅޭ މެޗެވެ.