މެންޗެސްޓާ ޔުނައިޓެޑުގެ އިންޓެރިމް ކޯޗު ރޫޑް ވެން ނިސްޓެލްރޫއީ، އެ ކުލަބުގެ ކޯޗިން ސްޓާފުން ތެރޭގައި ދެމިހުރުމަށް ބޭނުންވާ ކަމަށް އެ ޓީމުގެ ގޯލްކީޕަރު އަންދްރޭ އޮނާނާ ބުނެފިއެވެ.
ޔުރޮޕާ ލީގުގައި ގްރީސްގެ ޕީއޭއޯކޭއާ ދެކޮޅަށް ކުޅުނު މެޗަށްފަހު ޓީއެންޓީ ސްޕޯޓްސް އަށް ދިން އިންޓަވިއުގައި އޮނާނާ ވަނީ، ޔުނައިޓެޑްގައި ނިސްޓެލްރޫއީ މަޑުކުރުމަށް ބޭނުންވާ ކަމަށް ބުނެފައެވެ.
ޔުނައިޓެޑުން ދާދިފަހުން ވަނީ، ހުސްވެފައިވާ އެ ކްލަބުގެ ކޯޗުގެ މަގާމަށް ޕޯޗުގަލްގެ ޒުވާން ކޯޗު، ރުބެން އަމޮރިމް ހަމަޖައްސައިފައެވެ.
އުމުރުން 39 އަހަރުގެ އަމޮރިމް މިހާތަނަށް ހުރީ ސްޕޯޓިންގ ލިޒްބަންގެ ކޯޗުގެ މަގާމުގައެވެ. އޭނާ އެ ކްލަބާއެކު ހަދާފައިވާ އެއްބަސްވުން އުވާލުމަށްފަހު ޔުނައިޓެޑްގެ މަގާމާ ހަވާލުވުމަށް ހަމަޖެހިފައިވަނީ މި މަހުގެ 11 ވަނަ ދުވަހު އެވެ.
މިހެން މިކަން އޮތްއިރު، ޔުނައިޓެޑްގެ ކީޕަރު، އޮނާނާ ބޭނުންވަނީ އައު ކޯޗު، އަމޮރިމް އެ މަގާމަށް އައުމުން ވެސް ނިސްޓެލްރޫއީ އެ ކްލަބުގައި ދެމިހުރުމަށެވެ. މީގެކުރީން، ޕީއެސްވީ އެއިންދޯވަންގެ ހެޑް ކޯޗެއްގެ ގޮތުގައި މަސައްކަތްކޮށް، މި އަހަރުގެ ކުރީކޮޅު ޔުނައިޓެޑްގައި އެރިކް ޓެން ހާގްގެ އެސިސްޓެންޓް ކޯޗެއްގެ ގޮތުގައި ހުރުމަށްފަހު މިވަގުތު އިންޓެރިމް ކޯޗުގެ މަގާމުގައި ހުރި ނިސްޓެލްރޫއީގެ މުސްތަގުބަލާ މެދު އަދި ގޮތެއް ނުނިންމައެވެ.
އޮނާނާގެ ވާހަކައިގައި ވަނީ، ނިސްޓެލްރޫއީ އަކީ ވަރަށް ރަނގަޅު ކޯޗެއް ކަމަށާއި، އޭނާ އެ މަގާމާ ހަވާލުވިފަހުން ކުޅުންތެރިންނަށް ވަރަށް ބޮޑަށް އެހީތެރިވެފައިވާ ކަމަށް ބުންޏެވެ. އަދި، ނިސްޓެލްރޫއީ އަކީ ގިނަ ތަޖުރިބާތަކެއް ލިބިފައިވާ ކޯޗެއް ކަމަށާއި، މަދު ދުވަސްކޮޅަކަށް ނަމަވެސް އޭނާގެ ހެޑްކޯޗު ކަމުގައި ވަރަށް ބޮޑު އެހީތެރިކަމެއް ލިބުނު ކަމަށް ވެސް އޮނާނާގެ ވާހަކައިގައި ފާހަގަކުރިއެވެ.
ޔުނައިޓެޑަށް ކުރީން ކުޅެފައިވާ އިތުބާރު ފޯވާޑް، ނިސްޓެލްރޫއީ ވަނީ އެ ޓީމުގައި ދެމިހުރުމުގެ ޝައުގުވެރިކަން ފާޅުކޮށްފައެވެ. ނަމަވެސް، މިހާތަނަށްއައިއިރު އެ ކްލަބުގެ އައު ކޯޗިންގ ސްޓާފުގެ ތެރޭގައި އޭނާ ބަހައްޓާނެ ކަމުގެ އިޝާރާތެއް ދީފައެއްނުވެއެވެ.
އެކަމަކު، ޔުނައިޓެޑްގެ ކޯޗިންގ ސްޓާފުންގެ ތެރޭގައި ނިސްޓެލްރޫއީ ބެހެއްޓުމާމެދު ގޮތެއް ނިންމުމަކީ ކުޅުންތެރިންނަށް ނިންމޭނެ ކަމެއް ނޫން ކަމަށާއި، އެކަމަކީ ކްލަބުގެ ނިންމުމެއް ކަމަށް އޮނާނާ ބުންޏެވެ.
އިންޓެރިމް ކޯޗުގެ ގޮތުގައި ނިސްޓެލްރޫއީ ވަނީ ފުރަތަމަ މެޗުގައި އިނގިރޭސި ލީގު ކަޕްގައި ލެސްޓާ ސިޓީ އަތުން 2-5 އިން މޮޅުވެފައެވެ. އަދި، އޭގެފަހުން، މި ފަހަރުގެ ސީޒަނުގެ ޔުއެފާ ޔުރޮޕާ ލީގުގައި ޔުނައިޓެޑުން ފުރަތަމަ ފަހަރަށް މޮޅެއް ހޯދީ ވެސް ނިސްޓެލްރޫއީގެ އިރުޝާދުގެ ދަށުންނެވެ. މީގެއިތުރުން، ނިސްޓެލްރޫއީގެ އިރުޝާދުގެ ދަށުން ލީގުގައި އެންމެ ފަހުން އަމިއްލަ ދަނޑުގައި ޗެލްސީއާ ދެކޮޅަށް ކުޅުނު މެޗު ނިމުނީ 1-1 އިން އެއްވަރުވެގެންނެވެ.
ނިސްޓެލްރޫއީގެ ބެލުމުގެ ދަށުން ޔުނައިޓެޑް ކުޅުމަށް ހަމަޖެހިފައިވާ އެންމެ ފަހު މެޗަކީ އަންނަ އާދީއްތަ ދުވަހު ލެސްޓާއާ ބައްދަލުކުރާ މެޗެވެ.