ރަހީނުކުރި މީހާ ސަލާމަތްކުރެވުނީ އޭނާގެ އިނގިލި ބުރިކޮށްލަން ތައްޔާރުވެގެން ތިއްބާ: ފުލުހުން

ހިޔާ 9ވަނަ ޓަވަރުގެ 20ވަނަ ފަންގިފާލާގެ އެޕާޓްމަންޓެއްގައި ރަހީނުކުރި މީހާ ސަލާމަތްކުރުމަށް ފުލުހުން އެއެޕާޓްމަންޓްގެ ދޮރު ވައްޓާލާފަ ވަންއިރު، ހައްޔަރިކުރި މީހުން ތިބީ އެމީހާގެ ބޯ ބާލާ، އިނގިލި ބުރިކޮށްލަން ތައްޔާރުވެގެންކަމަށް ފުލުހުން ވިދާޅުވެއްޖެއެވެ.

ރަހީނުކޮށްފައި ހުރީ ދިވެހި ޒުވާން ފިރިހެނެކެވެ. އޭނާ ރަހީނުކޮށްފައި ހުރީ ހިޔާ 9ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓްގައެވެ.

މީހަކު ރަހީނުކޮށްގެން އުޅޭކަމަށް ފުލުހުންނަށް މަޢުލޫމާތު ލިބިފައިވަނީ މިރޭގެ 19:40 ހާއިރުއެވެ. އަދި ފުލުހުން ވަނީ ރަހީނުކޮށްފައި ހުރި ތަނަށް ގޮސް ވަގުތުން އެޕާޓްމަންޓްގެ ދޮރު ވައްޓާލާ އެތަނަށް ވަދެ އެމީހާ ފުލުހުގެ ހިމާޔަތަށް ގެނެސްފައެވެ. ފުލުހުން ވަންއިރު އެޕާޓްމަންޓްގައި އިތުރު 12 މީހުން ތިބިއެވެ.

ޕީއެސްއެމްގެ ނޫސްވެރިންވަނީ މީހާ ރަހީނުކުރި އެޕާޓްމަންޓަށް ގޮސް، ފުލުންގެ ތަޙުޤީޤު ކުރިއަށްދާތަން ބަލާފައެވެ. ފުލުހުންވަނީ އެޕާޓްމަންޓްގައި ތިބި 12 މީހުން ހައްޔަރުކޮށްފައެވެ.

އެ 12 މީހުން މިވަގުތު ތިބީ އެޕާޓްމަންޓްގައި ބިޑިއަޅުވާފައި ބައިތިއްބާފައެވެ. ފުލުހުންދަނީ އެތަނުގައި ފެންނަން ހުރި ހެކިތައް ނަގާ، ތަޙުޤީގު ކުރިއަށްގެންދަމުންނެވެ. ރަހީނުކުރި މީހާވެސް މިވަގުތު ހުރީ އެތަނުގައެވެ.

އެތަނަށް ދިޔަ ޕީއެސްއެމްގެ ނޫސްވެރިން ބުނިގޮތުގައި ރަހީނުކުރި މީހާގެ އިސްތަށިގަނޑުން ކޮށާފައިވާ އިސްތަށިތައްވެސް ބިންމަތީގައި ހުއްޓެވެ. އަދި ހައްޔަރުކުރި މީހުން ތިބީ ފަހަތަށް ބިޑިއަޅުވާ ފާރާ ދިމާލަށް މޫނުވާގޮތަށް ބައިތިއްބާފައެވެ.

އެއެޕާޓްމަންޓް ސިފަވަނީ ގޭންގްތަކުން ހިންގާ އައްޑާއެއްގެ ގޮތުގައެވެ.

މަންޒަރުތަކުން ފެނުނުގޮތުގައި އެމީހުން ތިބީ ރަހީނުކުރި މީހާގެ އިނގިލި ބުރިކޮށްލަން ތައްޔާރުވެގެން ކަމަށް ފުލުހުން ވިދާޅުވިއެވެ. އެތަނުގައި ދަގަނޑާއި ހަނޑަހަ ފަދަ ތަކެއްޗާއި، ގެއްލުންދިނުމަށް ބޭނުންކުރާ އެކި ބާވަތުގެ ތަކެތިވެސް ފެންނަންހުއްޓެވެ. އަދި އެތަނުން މަސްތުވާތަކެތި ބޭނުންކުރުމަށް ބޭނުންކުރާ އެކި ޒާތުގެ ތަކެތިކަމަށް ބެލެވޭ ޒާތުގެ އެއްޗެހިވެސް ފެނިފައިވެއެވެ. މިހާދިސާ ހިނގިތަނުގައި ފުލުހުންގެ ޑީއީޑީއާއި ފޮރެންސިކުންވެސް ދަނީ ހަރަކާތްތެރިވަމުންނެވެ.

މިމައްސަލައާ ގުޅިގެން ފުލުހުން ދަނީ ބޮޑު ތަޙުޤީޤެއް ހިންގަމުންނެވެ.

މިހާދިސާގައި ރަހީނުކުރި މީހާ ސަލާމަތްކުރުމަށް ފުލުހުން މަސައްކަތް ކުރަމުންދިޔައިރު ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން އެތަނަށް ވަޑައިގެން ފުލުހުންނަށްވަނީ ހިތްވަރުދެއްވާފައެވެ.