ހެލްތު އެކްސްޕޯ 2024 ނައިބު ރައީސް ހުޅުއްވައިދެއްވައިފި
-
މިއެކްސްޕޯގައި 50އަށްވުރެ ގިނަ ސްޓޯލް ހިމެނޭ
-
އެކްސްޕޯ ހުޅުއްވާދެއްވުމަށްފަހު ނައިބް ރައީސްވަނީ އެކްސްޕޯ ބައްލަވާލައްވާފައި
ހެލްތު އެކްސްޕޯ 2024 ރައީސުލްޖުމްހޫރިއްޔާގެ ނައިބު އަލްއުސްތާޛް ހުސައިން މުހައްމަދު ލަތީފް ހުޅުއްވާދެއްވައިފިއެވެ.
ހެލްތު އެކްސްޕޯއަކީ ދުޅަހެޔޮ މުޖްތަމަޢެއް ބިނާކުރުމާއި، ސިއްޙީ ދާއިރާއިން ކުރަމުން އަންނަ މަސައްކަތްތަކާއި، ސިއްޙީ ގޮތުން ދުޅަހެޔޮ އާދަތަކަށް ހޭލުންތެރިކުރުމާ ގުޅޭގޮތުން ރައްޔިތުންނަށް މަޢުލޫމާތު ފޯރުކޮށް ދިނުމަށް ފުރިހަމަ ސިއްޙަތަކަށް މުޅި ޤައުމު އެކުގައި މިނަމުގައި ބާއްވާ އެކްސްޕޯއެކެވެ.
މިއެކްސްޕޯގެ މައިގަނޑު މަޤްސަދަކީ ދުޅަހެޔޮ މުޖްތަމަޢެއް ބިނާކުރުމަށް ކުރެވޭ މަސައްކަތްތައް ދެއްކުމާއި، ސިއްޙީގޮތުން ދުޅަހެޔޮ އާދަތަކަށް ހޭލުންތެރިކޮށް މަޢުލޫމާތު ފޯރުކޮށް ދިނުމެވެ.
ހެލްތު އެކްސްޕޯ ހުޅުއްވާދެއްވުމުގެ ރަސްމިއްޔާތުގައި ޞިއްޙީ ދާއިރާގެ ހަފްތާ 52ގެ މަސައްކަތާ ގުޅޭ ފޮތް ނައިބު ރައީސްވަނީ ނެރުއްވާދެއްވާފައެވެ.
މިއެކްސްޕޯ ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ޞިއްޙަތާ ބެހޭ ވަޒީރު ޢަބްދުﷲ ނާޒިމް އިބްރާހީމް ވިދާޅުވީ ފުރިހަމަ ސިއްޙަތަކަށް މުޅި ޤައުމު މިޝިޢާރުގެ ދަށުން މިއެކްސްޕޯ ކޮންމެ އަހަރަކުވެސް ބާއްވަވާނެކަމަށެވެ. އޭގެ އެންމެ މުހިންމު ބޭނުމަކީ ދުޅަހެޔޮ ސިއްޙަތަކަށް ހޭލުންތެރިކުރުމާއި، ދުޅަހެޔޮ ސިއްޙަތެއްގައި ތިބުމަށް ކުރަންޖެހޭ މުހިންމު ކަންތައްތައް އާންމު ރައްޔިތުންގެ ސަމާލުކަމަށް ގެނައުން ކަމަށް ވަޒީރު ވިދާޅުވިއެވެ. މިއެކްސްޕޯގައި މިވޭތުވެދިޔަ އެއްއަހަރުތެރޭގައި ސިއްޙީ ދާއިރާއިން ހޯދާފައިވާ ކުރިއެރުންތައް ފާހަގަކުރާނެ ކަމަށްވެސް ވިދާޅުވިއެވެ.
ސިއްޙީ ދާއިރާއަށް ލިބޭ ކޮންމެ ކުރިއެރުމަކީ ޤައުމުގެ މުސްތަޤްބަލަށްޓަކައި އެޅޭ މުހިންމު ބިންގަލެއްކަމަށާއި، ދުޅަހެޔޮ އާބާދީއަކަށްވުރެ ބޮޑު ރައުސުލްމާލެއް ޤައުމެއްގައި ނޯންނާނެކަން ސިއްޙަތާ ބެހޭ ވަޒީރުގެ ވާހަކަފުޅުގައި ފާހަގަކުރެއްވިއެވެ.
ސިއްޙަތާ ބެހޭ ވަޒީރު ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސިއްޙީ ސިޔާސަތުތައް ބައްޓަން ކުރެވިފައިވަނީ ދެމެހެއްޓެނިވި ތަރައްޤީއާ ދިމާލަށްކަމަށެވެ. އަދި މިސިޔާސަތުތަކުން އެނގެން އޮތް އެންމެބޮޑު ހަގީގަތަކީ ބަލިމަޑުކަމުގެ ފަހަތުން ދުވާ ސިއްޙީ ނިޒާމެއްގެ ތެރޭގައި ތިބެވެން ނެތްކަމަށާއި ބަލިވީމަ އަބަދުވެސް ބޭސް ފަރުވާ ކުރާ ނިޒާމެއްގެ ތެރޭގައި ތިބެގެން ޤައުމު ގެންދަން ބޭނުންވާ މިސްރާބަށް ނުގެންދެވޭނެކަން ކަމަށް ވަޒީރު ވިދާޅުވިއެވެ. ވަޒީރުގެ ވާހަކަފުޅުގައިވަނީ މިސަރުކާރުން ސިއްޙީ ދާއިރާގެ ތަރައްޤީއަށް ކުރައްވާފައިވާ މުހިންމު ކަންތައްތައް ކަމަށްވާ ކާނާގެ ރައްކާތެރިކަމާ ބެހޭ ޤާނޫނު ވުޖޫދުކުރުމާއި، ބަލިވުމުގެ ކުރިން މެޑިކަލް ޗެކްއަޕް ހެދުންފަދަ ކަންކަން ހެލްތު އިންޝުއަރެންސް ސްކީމުގެ ތެރެއިން ރައްޔިތުންނަށް ލިބޭނެ ނިޒާމް ފުޅާކުރެއްވުން ފާހަގަކުރައްވާ މިސިޔާސަތުތަކުންވެސް ދޭހަކޮށްދެނީ ސިއްޙީ ނިޒާމަކީ އިޤްތިޞާދަށް އޮތް ބޮޑު ބުރައެއްކަމުގައި ވެގެން ސިއްޙީ ނިޒާމް ކުރިއަށް ނުގެންދެވޭނެކަންކަމަށް ވިދާޅުވެފައެވެ.
ސިއްޙަތާ ބެހޭ ވަޒީރު ވިދާޅުވީ ސިއްޙަތާ ބެހޭ ސިޔާސަތުތައް ބައްޓަން ކުރެވިފައިވަނީ އަރބަން ސެންޓަރުތަކުގައި ހުރި ހެލްތު ފެސިލިޓީސްތައް ފުޅާކޮށްގެން މާލެއަށް އައުން މަދުކުރެވޭނެގޮތަށް ކަމަށެވެ. އަދި ކުރިއަށް އޮތް 5 އަހަރު ވެގެންދާނީ މިމަގުން ސިއްޙީ ދާއިރާގެ ސިޔާސަތުތައް ބައްޓަން ކުރެވި ރާއްޖޭގެ ސިއްޙަތުގެ މުޅިން އައު ބާބެއް ލިޔާނެ 5 އަހަރަށް ކަމަށް ވަޒީރު ވިދާޅުވިއެވެ.
" މިފަސް އަހަރު ވެގެންދާނީ ސިއްޙީ ނިޒާމް މުޅިން އައު ހަރުފަތަކަށް ގެންގޮސްދޭނެ 5 އަހަރަށް. އެއަރ އެމްބިއުލާންސްގެ ޚިދުމަތް ފަށާ ރައްޔިތުންނަށްދަނީ މިޚިދުމަތް ބޭނުންކުރަމުން. ކޮލިޓީ ބޭސް ގެނައުމުގެ މަސައްކަތްވަނީ ފަށާފައި. ތަފާތު ސްޕެޝަލައިޒް ހޮސްޕިޓަލްތައް ޤާއިމުކުރުމުގެ މަސައްކަތް ކަރުދާހަށް ތިރިކުރެވި އަމަލީ މަސައްކަތާ ހަމައަށް ރުޖޫޢަވުމުގަ މިއުޅެނީ" ސިއްޙަތާ ބެހޭ ވަޒީރު ޢަބްދުﷲ ނާޒިމް އިބްރާހިމް ވިދާޅުވިއެވެ.
ވަޒީރު ވިދާޅުވީ އާސަންދަ ހަރުދަނާކޮށްގެން މެނުވީ ސިއްޙީ ނިޒާމުން ރައްޔިތުންނަށް ފޯރުކޮށްދޭ ޚިދުމަތްތައް އެންމެ ރަނގަޅުގޮތުގައި ފޯރުކޮށް ނުދެވޭނެކަމަށެވެ. އެހެންކަމުން އާސަންދަ އާސަންދަ ނިޒާމް ޓްރާންސްފޯމް ކުރުމުގެ މަސައްކަތް ރައީސްގެ ބެއްލެވުމާ އިރުޝާދުގެ ދަށުން މިހާރު ކުރައްވަމުންދާކަމަށެވެ. މިނިޒާމަށް އަންނަ ބަދަލަކުން ދިވެހިރައްޔިތުން ކަނބޮޑުވާންޖެހޭ އެއްވެސް ކަމެއް ނާންނާނެކަމުގެ ޔަޤީންކަން ސިއްޙަތާ ބެހޭ ވަޒީރު ދެއްވިއެވެ.
މިއެކްސްޕޯ ހުޅުއްވައިދެއްވުމަށްފަހު ނައިބު ރައީސްވަނީ އެކްސްޕޯ ބައްލަވާލައްވާފައެވެ.
ދެދުވަހުގެ މުއްދަތަށް ކުރިއަށްގެންދާ ހެލްތު އެކްސްޕޯގައި ސިއްޙީ ވުޒާރާގެ އިތުރުން ހޮސްޕިޓަލްތަކާއި ސިއްޙީ ޚިދުމަތްދޭ އެހެނިހެން ތަންތަނާއި، މަދަނީ ޖަމްޢިއްޔާ ޖަމާޢަތްތަކާއި އަމިއްލަ ފަރާތްތަކާއެކު 50 އަށްވުރެ ގިނަ ސްޓޯލް ހިމެނެއެވެ. ތަފާތު އުމުރުފުރައަށް އަދި ބިދޭސީންނަށް އަމާޒުކޮށްގެން ކުރިއަށްގެންދާ މިހެލްތު އެކްސްޕޯ ރޭވިފައިވަނީ ކުޑަކުދިންނަށްވެސް ބައިވެރިވެވޭގޮތަށްކަމަށް ސިއްޙަތާ ބެހޭ ވުޒާރާއިން ވިދާޅުވެއެވެ. އެގޮތުން ކުޑަކުދިންގެ ހެލްތު ޗެކްއަޕް މިންހެޔޮ ކާނާއާ ގުޅޭ މަޢުލޫމާތާއި، ހެދިބޮޑުވުމާ ގުޅޭ މަޢުލޫމާތާއި، ވެކްސިނޭޝަނާއި އެހެނިހެން ސިއްޙީ މަޢުލޫމާތުވެސް ފޯރުކޮށްދޭނެއެވެ.