ގައުމީ ލެވެލްގައި ބީޗު ހޭންޑްބޯޅަ ސްކޮޑެއް އެކުލަވާލުމަށް ނިންމާ، އެ ސްކޮޑުގައި ބައިވެރިވުމުގެ ފުރުސަތު އާންމުކޮށް ހުޅުވާލައިފިއެވެ.
ހޭންޑްބޯލް މޯލްޑިވްސްއިން ވަނީ މިކަން އާންމުކޮށް އެންގުމުގެ ގޮތުން ސަރުކާރުގެ ގެޒެޓުގައި އެކަން އިޢުލާނުކޮށްފައެވެ. ގެޒެޓްކުރި އިއުލާނުގައިވާ ގޮތުން އެ އެސޯސިއޭޝަނުން ސީނިއާ ފިރިހެން ޤައުމީ ބީޗް ހޭންޑްބޯލް ސްކޮޑެއް އެކުލަވާލުމަށް ބޭނުންވާތީ، އެކަމަށް ޝައުޤުވެރިކަންހުރި ހުރިހާ ފަރާތްތަކަށް، އެ ފުރުސަތު ހުޅުވާލެވިފައިވާކަން އިއުލާންކުރާ ކަމަށް ވަނީ ހާމަކޮށްފައެވެ.
އެހެންކަމުން ޝައުޤުވެރިވާ ފަރާތްތަކުން މިމަހުގެ 20 ގެ ކުރިން އެ އިއުލާނުގައި ބަޔާންކުރެވިފައިވާ ގޫގުލް ފޯމް ފުރިހަމަކުރުމަށް އެސޯސިއޭޝަނުން ވަނީ އެދިލައްވާފައެވެ. މީގެ އިތުރުން އެ އިއުލާނުގައިވާ ގޮތުން ސީނިއާ ފިރިހެން ޤައުމީ ބީޗް ހޭންޑްބޯލް ސްކޮޑުގެ ފަރިތަކުރުންތަކުގައި ބައިވެރިވެވޭނީ 18 އަހަރުން މަތީ ޒުވާނުންނަށެވެ. އަދި ގައުމީ ޓީމުގެ ފަރިތަކުރުންތައް ކުރިއަށްގެންދިއުމަށް ހަމަޖެހިފައިވަނީ ކުޅުދުއްފުށި ސިޓީގެ ބީޗު ހޭންޑްބޯލް ކޯޓުގައެވެ.
މީގެ އިތުރުން ގައުމީ ޓީމުގެ ފަރިތަކުރުންތަކުގައި ބައިވެރިވުމަށް ޝައުގުވެރިވާ ފަރާތްތަކުން އިތުރު މައުލޫމަތު ހޯއްދެވުމަށް އެސޯސިއޭޝަނާ ގުޅުމަށް ވަނީ އެދިފައެވެ.