ޔުއޭއީ ޕްރޯ ލީގުގައި ވާދަކުރާ އަލް އައިންގެ ފަރާތުން ނެރެމުންއައި ދަށް ނަތީޖާތަކުގެ ސަބަބުން އެ ޓީމުގެ ކޯޗުގެ މަގާމުން އާޖެންޓީނާގެ ހާނަން ކްރެސްޕޯ ވަކިކޮށްފިއެވެ.
އަލް އައިންގެ ކޯޗުގެ މަގާމުން ކްރެސްޕޯ ވަކިކުރަން ނިންމާފައިވަނީ، އޭޝިއަން ޗެމްޕިއަންސް ލީގު އެލީޓްގައި ސައުދީ އަރަބިއްޔާގެ އަލް ނަސްރު އަތުން 5-1 ގެ ނަތީޖާއަކުން އެ ޓީމު ބަލިވިތާ ދުވަހެއް ވެފައިވަނިކޮށެވެ. އޭގެކުރީން، އެ ޓީމުން ފާއިތުވި މަހުގެ ފަހުކޮޅު ފީފާ އިންޓަރކޮންޓިނެންޓަލް ކަޕްގައި މިސްރުގެ އަލް އަހްލީ އަތުން ވެސް ވަނީ 3-0 އިން ބަލިވެފައެވެ.
އަލް އައިން އިން ނެރުނު ބަޔާނުގައިވަނީ، އެ ފުޓްބޯޅަ ކްލަބުގެ ހުރިހާ ކަމެއް ބަލަހައްޓަމުންދާ ކުންފުނީގެ ޑިރެކްޓަރުން ބޯޑުން އިއްޔެގެ ވަގުތެއްގައި ކްރެސްޕޯގެ ކޯޗިންގ ސްޓާފާއެކު ހަދާފައިވާ ކޮންޓްރެކްޓް ނިމުމަކަށް ގެނައުމަށް އެއްބަސްވެފައިވާ ކަމަށެވެ.
އަދި ވަރަށް އަވަހަށް ކޯޗެއް ހަމަޖައްސާނެ ކަމަށާއި، ސޯޝަލް މީޑިއާ މެދުވެރިކޮށް އިޢްލާންކުރާނެ ކަމަށް ވެސް އަލް އައިންގެ ރަސްމީ އެކްސް އެކައުންޓުން ކުރި ޕޯސްޓްގައިވެއެވެ.
މީގެއިތުރުން، ކްރެސްޕޯގެ ކޯޗިންގ ސްޓާފުން އެ މަސައްކަތާ ހަވާލުވެ ގެނެސްދިން ކުރިއެރުމާއި، ހޯދައިދިން ކާމިޔާބީއަށް ވަރަށް ހާއްސަ ޝުކުރެއް އަދާކުރާ ކަމަށް ވެސް އަލް އައިންގެ ބަޔާނުގައިވެއެވެ.
އެންމެ ފަހުގެ އޭޝިއާގެ ޗެމްޕިއަން، އަލް އައިން އަށް އޭޝިއަން ޗެމްޕިއަންސް ލީގު އެލީޓްގައި މިހާތަނަށް ކުޅުނު ހަތަރު މެޗުން ލިބިފައިވަނީ އެންމެ ޕޮއިންޓެކެވެ.