އަލް ހިލާލްގެ ބްރެޒިލް ފޯވާޑް ނޭމާއަށް އަނިޔާވެ، މަދުވެގެން މަހެއްހާ ދުވަހަށް ކުޅުމާ ދުރުގައި ހުންނަންޖެހިދާނެ ކަމަށް އެ ކުލަބުން ބުނެފިއެވެ.
އުމުރުން 32 އަހަރުގެ ނޭމާގެ ފައިގެ ފަލަމަސްގަނޑަށް އަނިޔާވީ، މި ހަފްތާގެ ހޯމަ ދުވަހު އޭޝިއަން ޗެމްޕިއަންސް އެލީޓް ލީގުގައި އިރާނުގެ އިސްތިގްލާލާ ދެކޮޅަށް ކުޅެ 3-0 އިން މޮޅުވި މެޗުގައެވެ. އެ މެޗުގައި ކުޅެން ނިކުތްތާ 29 މިނެޓުފަހުން ވަނީ އަނިޔާގެ ސަބަބުން ނޭމާ ބަދަލުކޮށްފައެވެ.
ކުރީން ބާސެލޯނާ އާއި ޕީއެސްޖީ އަށް ކުޅެފައިވާ ނޭމާ އަށް އަނިޔާވެފައިމިވަނީ، މީގެ އަހަރެއްހާ ދުވަސްކުރީން ކަކުލު ހުޅަށް ލިބުނު ސީރިއަސް އަނިޔާއަކަށް ފަރުވާ ހޯދުމަށްފަހު، ކުޅުމަށް އެނބުރިއައިތާ ދެ ހަފްތާ ވެފައިވަނިކޮށެވެ. އެ ފަހަރު ނޭމާގެ ކަކުލަށް އަނިޔާވީ، މިދިޔަ އަހަރުގެ އޮކްޓޫބަރު މަހުގައި އުރުގުއޭއާ ދެކޮޅަށް ބްރެޒިލް ކުޅުނު ވޯލްޑް ކަޕް ކޮލިފައިންގ މެޗުގައެވެ.
"ސްކޭން ތަކުން ދައްކާ ގޮތުގައި ނޭމާގެ ފަލަމަސްގަނޑުން ތަންކޮޅެއް އިރައިގެން ގޮސްފައިވަނީ،" އަލް ހިލާލްގެ އެކްސް އެކައުންޓުން ކުރި ޕޯސްޓެއްގައިވެއެވެ.
އަދި، އަނިޔާ އިން ރަނގަޅުވުމަށް ކުރިއަށްގެންދާ ޓްރީޓްމަންޓް އާއި ރިހެބިލިޓޭޝަން ޕްރޮގްރާމަށްފަހު އަލުން ކުޅުމަށް އެނބުރި އަންނަން ހަތަރަކާއި ހަ ހަފްތާ ނަގާނެ ކަމަށް ވެސް އެ ކްލަބުން ވަނީ ބުނެފައެވެ.
މިދިޔަ އަހަރުގެ އޮގަސްޓް މަހުގައި ޕީއެސްޖީން ގާތްގަނޑަކަށް 90 މިލިއަން ޔޫރޯ (98 މިލިއަން އެމެރިކާ ޑޮލަރު)ގެ ޓްރާންސްފާ ފީ އަކަށް އަލް ހިލާލަށް ބަދަލުވެ، އަނިޔާގެ މައްސަލަތަކާ ހުރެ މިހާތަނަށް އެ ޓީމަށް ކުޅެވިފައިވަނީ އެންމެ ހަތް މެޗެވެ.