ފުޓްބޯޅައަށް މިވަގުތު ދިމާވާ އެންމެ ބޮޑު މައްސަލައަކީ ފުޓްބޯޅައިގެ މީހުން އެކަނި މިކަމުގެ ތެރޭގައި ހަރަކާތްތެރިވުން ކަމަށް، މިމަހުގެ 20 ވަނަ ދުވަހު ފެށުމަށް ހަމަޖެހިފައިވާ 90 ޕްލަސް ގޯލްޑްކަޕް ފުޓްބޯޅަ މުބާރާތުގެ ފައުންޑަރ ތަޖުރިބާކާރު ކޯޗު މުޙައްމަދު ޝާޒްލީ ބުނެފިއެވެ.
ޕީއެސްއެމްއިން ގެނެސްދިން "ކުޅިވަރު ވިންދު" ޕްރޮގްރާމްގައި ވާހަކަދައްކަމުން ޝާޒް ބުނީ މުބާރާތުގެ ސަބަބުން ދިވެހި ފުޓްބޯޅައަށް ހެޔޮބަދަލު އަންނާނެ ކަމަށެވެ. ފުޓްބޯޅައިގައި މިވަގުތު ވަރަށް ގިނަ ފަރާތްތަކެއްގެ ޝައުގުވެރިކަން ގެއްލިފަވާކަމަށާއި އެހެންކަމުން މި ފަހަރު މުބާރާތް ރޭވިއިރު އެންމެ ބޮޑަށް ވިސްނީ އެންމެން ބައިވެރިކޮށްގެން ކުރިއަށް ދެވޭނެ ގޮތެއް ހޯދުމަށް ކަމަށް ޝާޒް ބުނިއެވެ.
"އަޅުގަނޑުމެންގެ ޒަމާން ވަރަށް ބޮޑަށް ބަދަލުވެއްޖެ، ދުނިޔޭގެ ފެންވަރަށް ބަލާއިރު ފުޓްބޯޅަ ވިޔަފާރިއަކަށް ބަދަލުވެއްޖެ، މީގަ ޝާމިލުނުވާ އެއްވެސް ބަޔަކު ނޫޅޭނެ، ދުނިޔޭގެ ފުޓުބޯޅައިގައި، އަޅުގަނޑުމެން ރާއްޖޭގައި އަބަދުވެސް މި ފެންނާނީ ފުޓްބޯޅައިގެ މީހުން އެކަނި އޭގަ މިއުޅެނީ" ރާއްޖޭގެ ފުޓްބޯޅައަށް ގިނަ ހިދުމަތްތަކެއް ކޮށްދެއްވަމުންދާ ޝާޒް ބުންޏެވެ.
މިހާތަނަށް އަތޮޅު ތެރޭގައި ފުޓްބޯޅައިގައި ވަރަށް ގިނަ ކަންކަން މިހާރު ކުރެވިފަވާކަމަށެވެ. އަދި ރާއްޖޭގެ ހާލަތު ހުރިގޮތުން އަތޮޅުތެރޭގައި ފުޓްބޯޅަ އެންމެ ރަނގަޅަށް ގެންދެވިފައިނުވާ ކަމަށް ޝާޒް ފާހަގަ ކުރިއެވެ. އަދި ހަމަ އެހެން ފުޓްބޯޅަ އާއި ގުޅުން ހުރި ވަރަށް ގިނަ ކަންކަން ކުރެވިފަވާ ކަމަށެވެ. އެހެންނަމަވެސް މުބާރާތާއި އެކު އެކަމަށް ބޮޑު ހައްލެއް ވެސް ލިބިގެންދާނެ ކަމަށް ޝާޒް ބުންޏެވެ.
"މެނޭޖްމެންޓެއް އެކަންޏެއް ނޫން، އަޅުގަނޑުމެންގެ ވިޔަފާރިވެރިންނާއި، އަޅުގަނޑުމެންގެ ގައުމު ހިންގަން ތިބި ވެރިންނާއި، އަޅުގަނޑުމެންގެ ސަޕޯޓަރުން، ސަޕޯޓަރުންގެ ތެރޭގައި ކުޑަކުދިން، އަންހެން ބޭކަނބަލުން، ފިރިހެން ބޭފުޅުން، ދުވަސްވީ މީހުން މި ހުރިހާ އެންމެންވެސް އިންވޯލްވާނެ އިނގޭތޯ މީގަ" ޝާޒް ބުންޏެވެ.
މުބާރާތުގެ މެޗުތައް ޔޭސްޓީވީ ގެނެސްދޭއިރު ހުރިހާ އެންމެން ވެސް މުބާރާތް ބަލާހިތްވާނެ ކަމަށާއި މުބާރާތް ބައްޓަންކޮށްފައިވާނީ ހުރިހާ އެންމެންނަށް ވެސް ފައިދާވާނެ ގޮތައް ކަމަށް ޝާޒް ވަނީ ބުނެފައެވެ. މި ވަގުގުތު ފުޓްބޯޅަ ކުރިޔަށްދާނީ މުޅި ރާއްޖެ ހިމެނޭގޮތަށް ކަމެއް ކުރެވިގެން ކަމަށް ޝާޒް ވަނީ ފާހަގަކޮށްފައެވެ. އެގޮތުން އަމިއްލަ ރަށަށް އެ ކުޅުންތެރިޔަކު ކުޅެމުންދާއިރު ކޮންމެ މީހުކުވެސް އެ މަންޒަރު ބަލަން ބޭނުންވާނެ ކަމަށް ޝާޒް ވަނީ ބުނެފައެވެ.
މުބާރާތުގެ ސަބަބުން އެންމެ ބޮޑަށް ފާހަގަވި ކަމަކީ ކުޅުންތެރިންނަށް އުންމީދުތަކެއް އާވެގެން ދިއުން ކަމަށާއި ރާއްޖޭގެ ކޯޗުންގެ މޫނުމަތިން އުފާވެރިކަން މިހާރު ފެންނަކަމަށް ޝާޒް ވަނީ ބުންޏެވެ. އެގޮތުން މުބާރާތުގައި ބައިވެރިވާ ޓީމުތަކުގެ ޝައުގުވެރިކަން ވެސް ބޮޑުކަމަށް ޝާޒް ބުންޏެވެ.
"އެންމެ ބޮޑު އެއްކަމަކީ ރަށުޓީމެއް ރަށު ނަމުގައި ކުޅޭއިރު، މާލޭގެ ޓީމެއް ވެސް އެބައޮތް އަޅުގަނޑަކަށް ހިޔެއްނުވޭ ކުރިން މިކަހަލަ މުބާރާތަކަށް މާލެއިން ވަކި ޓީމެއް ނެރުނު ހަނދާނެއް، އަދި އަޅުގަނޑަކަށް ހިޔެއް ނުވޭ މުޅި އައްޑޫ ހިމެނޭހެން ވެސް ޓީމެއް އޮންނާނެހެން މުޅި ފުވައްމުލަކު ހިމެނޭހެން ވެސް ޓީމެއް އޮތްހެނެއް،" ޝާޒް ބުންޏެވެ.
ޝާޒް ބުނީ ތަފާތު ކޮންސެޕްޓެއްގެ ތެރެއިން ނުކުންނަނީ ވަރަށް ގިނަ ބަޔަކު އެއްބައިވަންތަކޮށް ބައިވެރިވުން އިތުރުވެގެންދާ ގޮތަށް ކަމަށެވެ. ފުޓްބޯޅައަކީ ކޮޅަކަށް 11 މީހުން ލައިގެން ކުޅޭ ކުޅިވަރެއް އެކަނި ނޫންކަމަށާއި އެއީ އިޖުތިމާއީ ބައިވަރު މައްސަލަތައް ހައްލުކޮށްދޭ ކަމެއްކަން ޝާޒް ވަނީ ފާހަގަކޮށްފައެވެ.