ގައުމީ ބޮޑީބޯޑިން ލީގުގައި ހިމެނޭ އެންމެ ފަހު މުބާރާތް ކަމަށްވާ "ގައުމީ ބަނޑުފިލާ ޗެލެންޖް 2024" އަންނަ ހަފުތާގައި ބޭއްވުމަށް ތާވަލުކޮށްފިއެވެ.
މި މުބާރާތާ ގުޅޭގޮތުން ޕީއެސްއެމްއިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުން ބޮޑީބޯޑިން އެސޯސިއޭޝަން އޮފް މޯލްޑިވްސް (އެމްބީބީއޭ) ގެ ރައީސް ހުސެއިން ނިޒާމް ވިދާޅުވީ މުޅި މުބާރާތުގައި ފަސް އިވެންޓެއް ކުރިއަށްދާނެ ކަމަށެވެ. އަދި މުބާރާތުގައި ބައިވެރިވި އެތުލީޓުންނަށް ބަލާއިރު ވަރަށް ވާދަވެރި، ފޯރިގަދަ މުބާރާތަކަށް މި ފަހަރުގެ ބަނޑުފިލާ ޗެލެންޖް ވެގެންދާނެ ކަމަށްވެސް ވިދާޅުވިއެވެ.
ތާވަލުކުރެވުނު ގޮތަށް މި އަހަރުގެ މުބާރާތްތައް ބޭއްވުނީ ބުރަ މަސައްކަތަކަށްފަހުކަން ނިޒާމް ފާހަގަކުރެއްވިއެވެ. ގައުމީ ބޮޑީބޯޑިން ލީގުގައި ހިމެނެނީ ތިން މުބާރާތެކެވެ. އެއީ ބުރުނު ޝިކާރު އާއި، ލަބެރަ ބޮޑީ ބޯޑިން ޗެލެންޖުގެ އިތުރުން ގައުމީ ބަނޑުފިލާ ޗެލެންޖެވެ.
"މިއީ ލީގެއް ގޮތަށް ކުރިއަށްދާ މުބާރާތެއް. ލީގު ޕޮއިންޓަށް ބަލާފައި ލީގުގެ ޗެމްޕިއަންކަން ކަނޑައެޅިގެންދާނެ. އެންމެ ޓޮޕުގައި މިއުޅޭ ރާޅާއެޅުންތެރިންނަށް ވަރަށް މުހިންމު މުބާރާތަކަށް ވެގެންދާނީ. އެހެންވީމާ ވަރަށް ފޯރިގަދަ މުބާރާތަކަށް ވެގެންދާނެ ކަމަށް މި ބެލެވޭނީ." ނިޒާމް ވިދާޅުވިއެވެ.
މި އަހަރުގެ ގައުމީ ބޮޑީބޯޑިން ލީގުގައި ހިމެނޭ ފަހު މުބާރާތް އަދި އަހަރުގެ ބޮޑީބޯޑިންގެވެސް އެންމެ ފަހު އިވެންޓް އޮންނާނީ މި މަހުގެ 12 އިން 16 އަށް މާލޭގެ ވަރުނުލާ ރާޅުގަނޑު ސަރަހައްދުގައެވެ.