ތިލައުތުރު ފުޓްސަލް މުބާރާތް 2024 ގައި އިއްޔެ ކުޅުނު މެޗުތަކުން އުތީމާއި، ބާރަށް އަދި ތުރާކުނު މޮޅުވެއްޖެއެވެ.
ތިލަދުންމަތީ އުތުރުބުރީ އަތޮޅު ކައުންސިލުން އިންތިޒާމުކޮށްގެން ކުރިއަށްގެންދާ މި މުބާރާތް މި އަހަރު ބާއްވަނީ ކެލާގައެވެ. މި މުބާރާތުގައި ހއ. އަތޮޅުގެ 10 ޓީމެއް ބައިވެރިވެފައިވާއިރު، މުބާރާތް ކުރިއަށްދަނީ ދެ ގްރޫޕަކަށް ބަހާލައިގެންނެވެ.
ކެލާ ފުޓްސަލް ދަނޑުގައި އިއްޔެ ހަވީރު ކުޅުނު ގްރޫޕް ބީގެ މެޗުން އުތީމު މޮޅުވީ ކެލާ އަތުން ފަސޭހަކަމާއެކު 4-0 ގެ ނަތީޖާއަކުންނެވެ. މި މެޗުގައި އުތީމުގެ ލަނޑުތައް ކާމިޔާބުކޮށްދިނީ މުޙައްމަދު މަޒީނާއި، އަޙްމަދު މަމްނޫން އަދި އަލީ އިލްހާމެވެ. އަދި އުތީމުގެ އަނެއް ލަނޑަކީ ކެލާގެ އާދަމް މަނިކު ހަމީދު އަތުން ބައިކޮޅަށް ވަން ލަނޑެކެވެ. މި މެޗުގެ މޮޅު ކުޅުންތެރިއަކަށް ހޮވިފައިވަނީ އުތީމުގެ ކެޕްޓަން މަޒީނެވެ.
މި މުބާރާތުގައި އިއްޔެ ހަވީރު ކުޅުނު ގްރޫޕް އޭގެ މެޗުން ބާރަށް މޮޅުވީ މުރައިދޫ އަތުން 2-1 ގެ ނަތީޖާއަކުންނެވެ. ފޯރިގަދަ ކުޅުމެއް ފެނިގެންދިޔަ މި މެޗުގައި ބާރަށުގެ ލަނޑުތައް ޖަހައިދިނީ އަބްދުﷲ މިސްބާހު އާއި އަޙްމަދު ޝަޒީމެވެ. މެޗުގައި މުރައިދޫން ޖެހި ހަމައެކަނި ލަނޑު އެ ޓީމަށް ކާމިޔާބުކޮށްދިނީ އަބްދުﷲ ހިޝާނެވެ. މި މެޗުގެ މޮޅު ކުޅުންތެރިއަކީ ބާރަށުގެ ކެޕްޓަން މުޙައްމަދު ޝަމާއިލެވެ.
މީގެ އިތުރުން މި މުބާރާތުގައި ރޭ ކުޅުނު ގްރޫޕް ބީގެ މެޗުން ތުރާކުނު މޮޅުވީ އުލިގަން އަތުން 4-2 ގެ ނަތީޖާއަކުންނެވެ. މި މެޗުގައި ތުރާކުނުގެ ލަނޑުތައް ކާމިޔާބުކޮށްދިނީ ދެ ލަނޑު ޖެހި އަޙްމަދު ސިރާޖާއި، އަޙްމަދު ހުޝާމް އަދި ހުސެއިން އާޒިމެވެ. މެޗުގައި އުލިގަމުގެ ލަނޑުތައް ޖަހައިދިނީ ޔޫސުފް ޝާހިދާއި، އަޙްމަދު ޔާސިރެވެ. މި މެޗުގެ މޮޅު ކުޅުންތެރިޔާގެ މަގާމަށް ހޮވިފައިވަނީ ތުރާކުނުގެ ހުޝާމެވެ.
މި މުބާރާތުގައި ރޭ ކުޅުނު ފަހު މެޗުގައި ބައްދަލުކޮށްފައިވަނީ ގްރޫޕް އޭގެ ދެ ޓީމު ކަމަށްވާ ދިއްދޫ އާއި ވަށަފަރެވެ. މި މެޗު ނިމުނީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ. މި މެޗުގައި ވަށަފަރުގެ ލަނޑުތައް ޖަހައިދިނީ ސާޖިދު ރަޝީދާއި، އިބްރާހީމް ޝަނޫނެވެ. އޭގެ ފަހުން ކުޅުން ރަނގަޅުކޮށް ދިއްދޫން ނަތީޖާ އެއްވަރުކުރިއިރު، އެ ދެ ލަނޑު ކާމިޔާބުކޮށްދިނީ އަހުޒަމް ރަޝީދާއި، މުޙައްމަދު ޝަނާއު ނަސީރެވެ. މި މެޗުގެ މޮޅު ކުޅުންތެރިޔަކީ ދިއްދޫގެ އަހުޒަމެވެ.