އާމްދަނީލިބޭނެ މަގުތައްދަނީ ފަހިވަމުން، އުފާވެރި ދުވަސްތަކެއް ސަރުކާރުން ހޯދައިދޭނެ: ނައިބު ރައީސް

ޤައުމަށް އާމްދަނީ ލިބޭނެ އެތައް މަގެއް މިއަދު ފަހިވަމުންދާކަމަށާއި ރައްޔިތުންނަށް އުފާ ފާގަތި ދުވަސްތަކެއް އަދުގެ ސަރުކާރުން ހޯއްދަވައިދެއްވާނެކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަޠީފް ވިދާޅުވެއްޖެއެވެ.

ނައިބް ރައީސް މިހެން ވިދަޅުވީ، "ހަށިހެޔޮ ރާއްޖެ" ޕްރޮގްރާމް ފެށުމަށްޓަކައި ކުޅުދުއްފުށި ސިޓީގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަޠީފް ވިދާޅުވީ ރައްޔިތުންގެ ހަށިހެޔޮކަމާއި ދުޅަހެޔޮކަމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިސްކަމެއްދެއްވާކަމެއްކަމަށެވެ. އަދި ރައީސުލްޖުމްހޫރިއްޔާގެ އެންމެ ބޮޑު އެއް އަމާޒަކީ ރާއްޖޭގެ އިގްތިޞާދު ވެއްޓެމުންދިޔަ ފުން އަނދަވަޅުން ސަލާމަތްކުރުންކަމަށާއި، މިއަދު އިގްތިޞާދު ކުރިއެރުވުމަށް ކާމިޔާބު
މަސައްކަތްތަކެއް ފެށ،ި ކަންކަން ހަމަމަގަށް އެޅެމުންދާ މަންޒަރު ފެންނަކަމަށް އެމަނިކުފާނު ވިދާޅުވިއެވެ.

އެމަނިކުފާނުގެ ވާހަކަފުޅުގައި އިޤްތިޞާދަށް ދިރުން އަންނަ މިންވަރަކުން ރަށްރަށުގައި މިހާރު ނުނިމި ހުރި މަޝްރޫޢުތައް ނިންމުމާއި، އައު މަޝްރޫޢުތައް ފެށުންވެސް ކުރިއަށްދާނެކަމަށް ވިދާޅުވިއެވެ. އޭގެ ތެރޭގައި ކުޅިވަރުގެ ވަޞީލަތްތައް ޤާއިމްކުރުން ހިމެނޭކަން ނައިބު ރައީސް ފާހަގަކުރެއްވިއެވެ. ނައިބް ރައީސް ވިދާޅުވީ ޤައުމު މި ދަނޑިވަޅު އޮންނަން ޖެހުނު ހާލަތަކީ ރައްޔިތުންގެ ފައިދާ ނަހަމަގޮތުގައި ބަޔަކު ހިފުމުގެ ސަބަބުންކަމަށެވެ.

އެހެން ނަމަވެސް މިހާރު ޤައުމަށް އާމްދަނީ ލިބޭނެ އެތައް މަގެއް ފަހިވަމުންދާކަން ނައިބުރައީސް ވަނީ ފާހަގަކުރައްވާފައެވެ. އެހެންކަމުން ރައްޔިތުންނަށް އުފާވެރި އަދި ފާގަތި ދުވަސްތަކެއް ކުރިއަށްއޮތްތަކުގައި އަދުގެ ސަރުކާރުން ހޯދައިދޭނެކަމަށް އެމަނިކުފާނު ވިދާޅުވިއެވެ.

"ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ޤައުމަށް އިޚުލާސްތެރި ތެދުވެރި ބޭފުޅެއް. އެމަނިކުފާނުގެ ވަޢުދުފުޅާއެއްގޮތަށް ކުޅިވަރުގެ ވަޞީލަތްތައް ޤާއިމްކޮށްދޭނެ. އެ އެކަންކުރުމުގެ މަސައްކަތްތައް ދަނީ ކުރަމުން. އުއްމީދަކީ އަންނައަހަރުގެ ތެރޭގައި މިކަންކަން ރައްޔިތުންނާ ހަމައަށް ފޯރުކޮށްދިނުން. 5 އަހަރުގެ ދައުރަކަށް މެންޑޭޓް ދެއްވާފައި އެއޮތީ" ނައިބު ރައީސް ވިދާޅުވިއެވެ.

އެމަނިކުފާނު ވަނީ ދުޅަހެޔޮ ސިއްޙަތެއްގައި ދެމިހުރުމަށްޓަކައި ހަށިގަނޑަށް ފައިދާހުރި ކާނާ ބޭނުންވާ ފަދައިން ހެލިފެލިވެ އުޅުމާއި ކަސްރަތުކުރުމަކީ ވެސް މުހިންމުކަމެއްކަން ފާހަގަކުރައްވާފައެވެ. އަދި ދިރިއުޅުމުގެ އާދަތައް ބައްޓަންވެފައިވާ ގޮތުން ގަވާއިދުން ކަސްރަތުކުރުމަކީ އަށަގަންނުވަންޖެހޭ އާދައެއްކަމަށްވެސް ނައިބު ރައީސް ވިދާޅުވިއެވެ.

"ގިނަ ވަގުތުތަކުގައި މަސައްކަތްކުރަނީ ގޮނޑިތަކުގައި އިށީނދެ ތިބެ. އެހެންކަމުން ހެލިފެލިވެ އުޅުން މަދުވެ ހަށިގަނޑަށް ބޭނުންވާ ކަސްރަތު ލިބުން ދަށްވޭ. ފުރުޞަތު ހޯދައިގެން މިކަމަށް މަސައްކަތް ކުރަން އެބަޖެހޭ. ކަސްރަތުން ދުރުހެލިވޔުމުން ހިތުގެ ބައްޔާއި ކެންސަރުފަދަ ތަފާތު އެކިއެކި ނުރައްކާތެރި ބަލިތަކާ ކުރިމަތިލާން ޖެހޭ" ރައީސުލްޖުމްޙޫރިއްޔާގެ ނައިބް އަލްއުސްތާޛު ހުސައިން މުޙައްމަދު ލަތީފް ވިދާޅުވިއެވެ.

މި ޕްރޮގްރަމުން ލިބޭ މަޢުލޫމާތުގެ އަލީގައި ރައްޔިތުންނަށް ފޯރުކޮށްދޭން ޖެހޭ ޚިދުމަތް އެންމެ ރަނގަޅުގޮތުގައި ފޯރުކޮށްދޭނެކަމަށް ޔަޤީންކުރައްވާކަމަށް ނައިބްރައީސް ވިދާޅުވިއެވެ. ނައިބު ރައީސް ވިދާޅުވީ "ހަށިހެޔޮ ރާއްޖެ" ޕްރޮގްރާމް ޒޯން އެކެއްގައި ފެށިނަމަވެސް މި ޕްރޮގްރާމަކީ ރާއްޖޭގެ އެކި ސަރަޙައްދުތަކުގައި ކުރިއަށްދާނެކަމަށް ޔަޤީންކުރައްވާކަމަށެވެ. އަދި މި ޕްރޮގްރާމްގެ ޓްރެއިނަރުންނަށް ލިބޭ މަޢުލޫމާތުގެ ސަބަބުން އޭގެ ފައިދާ ރައްޔިތުންނަށް އެންމެ ފުރިހަމަ ގޮތުގައި ލިބޭނެކަމަށް އުއްމީދުކުރައްވާކަމަށްވެސް އެމަނިކުފާނު ވިދާޅުވިއެވެ.

ސަރުކާރުން ބޭނުންވަނީ ކޮންމެ ރައްޔިތަކުވެސް ދުވާލުގެ ކޮންމެވެސް ވަގުތުކޮޅެއްގައި ހެލިފެލިވެއުޅުމުން ލިއްބައިދޭ ފައިދާ ކޮންމެ މީހަކަށްވެސް ލިބުންކަމަށް އެމަނިކުފާނު ފާހަގަކުރެއްވިއެވެ. އަދި ލިބިފައިވާ ތަމްރީންގެ އަލީގައި ރަށުފެންވަރުގައި އެކި އުމުރުފުރާތަކަށް ޚާއްސަކޮށްގެން އިތުރު ޕްރޮގްރާމްތައް ރާވައިގެން ކުރިއަށް ގެންދިޔުމަށް އެދިވަޑައިގަތެވެ.