ޔަހޫދީ ފައުޖުގެ ނިރުބަވެރި ސިފައިން ރޭޑުޖަހައި ލުބްނާންގެ ރައްޔިތަކު ރަހީނުކޮށް, ހައްޔަރު ކޮށްގެން ގެންދިޔަ މައްސަލަ އދގެ ސަލާމަތީ މަޖިލީހަށް ހުށަހަޅަން ބޮޑުވަޒީރު ނަޖީބު މީޤާތީ އަމުރު ކުރައްވައިފިއެވެ. ލުބްނާންގެ ސަރުކާރުން ބުނީ, ޔަހޫދީ ފައުޖުން ހައްޔަރު ކޮށްގެން ގެންގޮސްފައިވާ ޢިމާދު އަމްހަޒަކީ އެ ޤައުމުގެ ކަނޑުގެ ސިފައިންގެ އޮފިސަރެއް ކަމުގައެވެ. އޭނާ, ހައްޔަރު ކޮށްފައި ވަނީ ޔަހޫދީ ފައުޖުގެ ސިފައިން ބައިރޫތުގެ އުތުރުން އޮތް ބަނދަރުމަތީ ރަށެއް ކަމުގައިވާ އަލް-ބިތުރޫނަށް ރޭޑުޖަހައި, ހިންގި ލާއިންސާނީ ޢުދުވާނެއްގައެވެ.
މީޤާތީ ވަނީ މި ކަމާ މެދު ކަންބޮޑުވުން ފާޅު ކުރައްވާފައެވެ. އަދި, މި ކަމުގެ ފުރިހަމަ ތަޙުޤީޤެއް ހިންގުމަށް އަމުރު ކުރައްވައި, އެ މައްސަލަ އދގެ ސަލާމަތީ މަޖިލީހަށް ހުށަހެޅުމަށް ޚާރިޖީ ވަޒީރު ޢަބްދުالله ބޫ ޙަބީބަށް އަމުރު ކުރައްވާފައެވެ. މީޤާތީގެ އޮފީހުން ބުނީ, އަލް-ބަތުރޫނަށް ޔަހޫދީ ފައުޖުން ރޭޑު ޖަހައި, މީހަކު ރަހީނު ކޮށްގެން ގެންދިޔަ މައްސަލަ އެ ޤައުމުގެ އަސްކަރިއްޔާއާއި, އދގެ ސުލްޙަ ބަލަހައްޓާ ފައުޖު (ޔުނިފިލު)ން ތަޙުޤީޤު ކުރަމުންދާ ކަމުގައެވެ.
އަލް-ބަތުރޫނަށް ރޭޑުޖަހައި, ލުބްނާންގެ ރައްޔިތަކު ރަހީނުކޮށްގެން ގެންގޮސްފައިވާ ކަން ޔަހޫދީން ވަނީ ކަށަވަރު ކޮށްދީފައެވެ. ހައްުޔަރު ކޮށްފައި ވަނީ ލުބްނާންގެ މުޖާހިދުންގެ ޖަމާޢަތް, ޙިޒްބުاللهގެ އިސް އޮފިޝަލެއް ކަމުގައި ޔަހޫދީ ފައުޖުން ތުހުމަތު ކުރެއެވެ. އަދި, އިސްރާއީލަށް ގެންގޮސް, އޭނާއާ ސުވާލުކޮށް, ތަޙުޤީޤު ކުރަމުންދާ ކަމުގައި ވެސް ޔަހޫދީ ފައުޖުން ބުންޏެވެ. ހައްޔަރު ކޮށްފައިވާ މީހާގެ ވަނަވަރު ޔަހޫދީ ފައުޖުން ހާމަކޮށްފައި ނުވާއިރު, އެއީ ޙިޒްބުاللهގެ މެންބަރެއް ކަން އެ ޖަމާޢަތުން ވެސް ކަށަވަރު ކޮށްދީފައެއް ނެތެވެ.
ޔަހޫދީން ހައްޔަރު ކޮށްފައިވާ އަމްހަޒަކީ ލުބްނާންގެ ކަނޑުގެ ސިފައިންގެ އޮފިސަރެއް ކަން ކަށަވަރު ކޮށްދެއްވާފައި ވަނީ ޕަބްލިކް ވޯކްސާއި ދަތުރުފަތުރާ ބެހޭ ވަޒީރު ޢަލީ ޙުމިއްޔަތެވެ. މިއީ, ލުބްނާންގެ މުސްލިމުންގެ ނަސްލުހޭދު ކުރަން ސެޕްޓެންބަރު 23ވަނަ ދުވަހު ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފެށި ފަހުން, ލުބްނާންގެ އުތުރުގެ ރަށަކަށް ރޭޑުޖަހައި, ނިރުބަވެރި އަމަލުތަކެއް ހިންގާފައިވާ ކަން ފަޅާއަރާފައިވާ ފުރަތަމަ ފަހަރެވެ.
ލުބްނާންގެ މީޑިޔާތަކުން ބުނީ, ޔަހޫދީ ފައުޖުގެ ހަތިޔާރު އެޅި ސިފައިންގެ 25 ވަރަކަށް މީހުުން އަލް-ބަތުރޫންގެ ގޮނޑުދޮށަށް ކައިރިކޮށް, އެ ރަަށަށް އަރާފައިވާ ކަމުގައެވެ. އަދި, ލުބްނާންގެ ރައްޔިތަކު ރަހީނުކޮށް, ހައްޔަރު ކޮށްގެން ގެންދާ މަންޒަރު ފެންނަ ސީސީޓީވީ ވީޑިޔޯތަކެއް މީޑިޔާތަކުން ވަނީ ޢާންމު ކޮށްފައެވެ. އަލް-ބަތުރޫނަކީ ބައިރޫތާ 50 ކިލޯމީޓަރު އުތުރުގައި އޮތް ރަށެކެވެ.
އަލް-ބަތުރޫނަށް ރޭޑުޖަހައި, ޔަހޫދީ ފައުޖުގެ އަނިޔާވެރި ސިފައިން އަސްކަރީ ހަރަކާތްތައް ހިންގާފައި ވަނީ ޔުނިފިލްގެ އެހީތެރިކަމާ އެކުގައި ކަމަށް ތުހުމަތު ކުރެވުނެވެ. ނަމަވެސް, ޔުނިފިލްގެ ތަރުޖަމާނު ކެންޑިސް އާރޑީލް ވަނީ އެ ތުހުމަތުތައް ދޮގު ކުރައްވާފައެވެ. "އެ ފަދަ ދޮގު ޚަބަރުތަކާއި ގޯސް މަޢުލޫމާތުގެ ސަބަބުން ޔުނިފިލްގެ ސިފައިންގެ ފުރާނައަށް ނުރައްކާވޭ،" އޭނާ ވިދާޅުވިއެވެ.
ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފަށާފައި ވަނީ ސެޕްޓެންބަރު 23ވަނަ ދުވަހުއެވެ. ޢުދުވާނުގެ ދަށުން ބައިރޫތާއި ލުބްނާންގެ ދެކުނުގެ ރަށްތަކުގެ އިތުރުން އަލް-ބިޤާޢު ވާދީގެ ރަށްތަކަށް ޔަހޫދީ ފައުޖުން ދަނީ ނުރައްކާތެރި ވައިގެ ޙަމަލާތަކެއް ދެމުންނެވެ. އަދި, ޢާންމުންގެ ގެދޮރާއި ޢުމްރާނީ ވަސީލަތްތައް ސުންފާތިކޮށް, ބިމާ ހަމަކޮށްލަމުންނެވެ. އޮކްޓޫބަރު 1ވަނަ ދުވަހު ޔަހޫދީ ފައުޖުގެ ނިރުބަވެރި ސިފައިން ވަނީ އެއްގަމު މަގުން ލުބްނާންގެ ދެކުނުގެ ރަށްތަކަށް އަރައިގަނެ, ޤަތުލުޢާންމު ފުޅާކޮށްފައެވެ.
ލުބްނާނުގެ މުސްލިމުންނާ ދެކޮޅަށް ހިންގަމުންދާ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 2,897އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 13,402އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.