ސްޕެނިޝް ލަލީގާ ގައި އެސްޕަނިއޯލް އާއި ދެކޮޅަށް ބާސެލޯނާ ކުޅުނު މެޗު 3-1 ގެ ނަތީޖާއަކުން ކާމިޔާބުކޮށް ތާވަލުގެ ކުރީގައި ނުވަ ޕޮއިންޓްގެ ލީޑެއް ނަގައިފި އެވެ.
މި މެޗުން މޮޅުވުމާއެކު ބާސެލޯނާ އަށް ވަނީ ލީގުގައި މިހާތަނަށް ކުޅުނު 12 މެޗުން 33 ޕޮއިންޓާއެކު ތާވަލުގެ އެއްވަނަ ލިބިފަ އެވެ. ދެވަނައިގައި އޮތް ވާދަވެރި ރެއާލް މެޑްރިޑަށް 11 މެޗުން ލިބިފައިވަނީ 22 ޕޮއިންޓެވެ.
ބާސެނޯލާގެ ދަނޑުގައި ކުޅުނު މި މެޗުގެ 12 ވަނަ މިނިޓުގައި އެ ޓީމުން ވަނީ ލަނޑެއް ޖަހާ އިދިކޮޅު ޓީމުގެ ގޯލު ހުޅުވާލާފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ ޒުވާން ފޯވަޑް ލަމީން ޔަމާލްގެ ޕާހަކުން ޑެނީ އޮލްމޯ އެވެ.
ނިމިގެންދިޔަ ހަފްތާގައި އެލް ކްލެސިކޯގައި ރެއާލް މެޑްރިޑް ބަލިކުރުމަށްފަހު ރަގަޅު ފޯމެއްގައި މިވަގުތު އޮތް ބާސެލޯނާ އިން ވަނީ މެޗުގެ 23 ވަނަ މިނިޓުގައި އިތުރު ލަނޑެއް ކާމިޔާބުކޮށް ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ ރަފީނިއާ އެވެ.
ބާސެލޯނާގެ މަޝްހޫރު އެކަޑެމީ ކަމުގައިވާ ލަ މާސިއާގެ ކުޅުންތެރިންނަށް އިސްކަން ދީގެން ހެންސީ ފްލިކް ވަނީ އެ ކުޅުންތެރިންނަށް ފުރުސަތު ދީފަ އެވެ. އެގޮތުން ބާސެލޯނާއިން ޖެހި ދެވަނަ ލަނޑު ޖަހަން ރަފީނިއާއަށް އެހީތެރިވެދީފައިވަނީ ޒުވާން ކުޅުންތެރިޔާ މާކް ކަސާޑޯ އެވެ.
ބާސެލޯނާއިން މި މެޗުގައި ޖެހި ތިންވަނަ ލަނޑު މެޗުގެ 31 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ޑެނީ އޮލްމޯ އެވެ.
މި މެޗުގައި އެސްޕަނިއޯލްގެ ފަރާތުން ފެނިގެން ދިޔަ ހަމައެކަނި ލަނޑު މެޗުގެ 63 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ހަވީ ޕުއާޑޯ އެވެ.
މި ސީޒަނުގައި ލަލީގާގައި ބާސެލޯނާ ކުޅުނު 12 މެޗުގެ ތެރެއިން އެ ޓީމު ވަނީ 11 މެޗުން މޮޅުވެފަ އެވެ. އަދި މިދިޔަ ސެޕްޓެމްބަރ މަހުގެ ފަހުކޮޅު އޮސަސޫނާ އަތުން ބަލިވި މެޗަށްފަހު ޖެހިޖެހިގެން ހަ މެޗުން މޮޅުވެ އެ ޓީމުން ވަނީ 24 ލަނޑު ޖަހާފަ އެވެ.