ސިޔާސީ މުވައްޒަފުންގެ މަސައްކަތު ފެންވަރު ބެލުމަށް ނިޒާމެއް، 248 މުވައްޒަފުން މިހާތަނަށް ވަކިކޮށްފި
-
މުވައްޒަފުން ވަކިކުރަނީ މަސައްކަތުގެ ފެންވަރަށް ބެލުމަށްފަހު
-
މިއީ ސަރުކާރުގެ އިޤްތިޞާދީ އިސްލާހީ އެޖެންޑާގެ ދަށުން ފަށާފައިވާ މަސައްކަތެއް
-
އޮކްޓޯބަރު 15ގައި ފުރަތަމަ 228 މުވައްޒަފުން ވަކިކުރި
ސިޔާސީ މުވައްޒަފުންގެ ތެރެއިން 248 މުވައްޒަފުން މަދުކޮށް، ސިޔާސީ މުވައްޒަފުންގެ މަސައްކަތުގެ ފެންވަރު ބަލާ ނިޒާމެއް ޤާއިމުކުރުމުގެ މަސައްކަތް ކުރަމުންދާ ކަމަށް ސަރުކާރު ހާމަކުރައްވައިފިއެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާނު ހީނާ ވަލީދު ކުރެއްވި ޕޯސްޓެއްގައި ވިދާޅުވީ ސަރުކާރުގެ އިޤްތިޞާދީ އިސްލާހީ އެޖެންޑާގެ ދަށުން ޚަރަދު ކުޑަ ކުރުމަށް މުހިންމު ފިޔަވަޅުތައް އަޅަމުންދާކަމަށެވެ. އެފިޔަވަޅުތަކުގެތެރެއިން 31 އޮކްޓޯބަރުގެ ނިޔަލަށް 248 ސިޔާސީ މުވައްޒަފުން މަދުކޮށްފައިވާކަމަށް ހިނާ ވަލީދު ވިދާޅުވެއެވެ.
ހީނާ ވިދާޅުވީ ސަރުކާރުގެ ސިޔާސީ މުވައްޒަފުންގެ ޕާފޯމަންސް ބަލާނެ ނިޒާމެއް ޤާއިމުކުރުމަށް ކެބިނެޓުން ނިންމާފައިވާކަމަށާއި އެނިޒާމަށް ވަރަށް އަވަހަށް ޢަމަލުކުރަން ފަށާނެކަމަށެވެ.
ސަރުކާރުގެ އިޤްތިޞާދީ އިސްލާހީ އެޖެންޑާއަކީ ސަރުކާރުގެ ބޭކާރު ޚަރަދުތައް ކުޑަކޮށް، އާމްދަނީ އިތުރުކުރުމަށް ރައީސުލްޖުމްހޫރިއްޔާ ކަނޑައަޅުއްވާފައިވާ ސިޔާސަތެކެވެ.
ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ޚަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން، މިހާތަނަށް 31 އޮކްޓޯބަރު 2024 ގެ ނިޔަލަށް 248 ސިޔާސީ މުވައްޒަފުންވަނީ މަދުކުރެވިފައި.
— Heena Waleed (@MvSpokesperson) November 1, 2024
ހަމަ އެއާއެކު ސިޔާސީ މުވައްޒަފުންގެ މަސައްކަތުގެ ފެންވަރު ބަލާ، ކުރުންތެރިކަން އިތުރު…
ސިޔާސީ މުވައްޒަފުން ވަކިކުރިކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ފުރަތަމަ ހާމަކުރެއްވީ މިދިޔަ އޮކްޓޫބަރު މަހުގެ 15 ވަނަ ދުވަހުއެވެ. އޭރުވަނީ 228 ސިޔާސީ މުވަޒަފުން ވަކިކޮށްފައެވެ.
ފުރަތަމަ ވަކި ކުރި މުވައްޒަފުންގެ ތެރޭގައި 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، 109 ސީނިއަރ ޕޮލިޓިކަލް ޑިރެކްޓަރުންނާއި 69 ޕޮލިޓިކަލް ޑިރެކްޓަރުން ހިމެނެއެވެ.
ރައީސުލްޖުމްހޫރިއްޔާ ވިދާޅުވެފައިވަނީ އެ ނިންމެވުމާއެކު 5.714 މިލިޔަން ރުފިޔާ ދައުލަތުގެ ބަޖެޓުން ސަލާމަތްކުރެވޭނެ ކަމަށެވެ.
ފުރަތަމަ ވަކިކުރި ސިޔާސީ މީހުންނާއެކު މިހާތަނަށް ޖުމްލަ 248 މުވައްޒަފުން ވަކިކޮށްފައިވާކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވިއެވެ.
ސަރުކާރުން ގާއިމުކުރާ، ސިޔާސީ މުވައްޒަފުންގެ ފެންވަރު ބަލާ ނިޒާމާއެކު އެ މަސައްކަތް އިތުރަށް ހަރުދަނާކުރެވޭނެއެވެ. އަދި ސަރުކާރުގެ ހިންގުމުގެ ފެންވަރު ހަރުދަނާވުމުގެ އިތުރުން، ބޭކާރު ޚަރަދުތައް ކުޑަކުރުމަށް މަގުފަހިވެގެންދާނެއެވެ.