"ޤާނޫނުގައި ކޮރަޕްޝަން ހުއްޓުވުމަށް ލިޔެފައިވާ މާއްދާތަކަކީ ކަންކުރުމުގެ ނިޔަތެއްނެތި ލިޔެފައި އޮތް މާއްދާތަކެއް"

މިހާރު އޮތް ޤާނޫނުލް ޢުޤޫބާތުގައި ކޮރަޕްޝަން ހުއްޓުވުމަށް ލިޔެފައިވާ މާއްދާތަކަކީ ކަންކުރުމުގެ ނިޔަތެއްނެތި ލިޔެފައި އޮތް މާއްދާތަކެއްކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙުސާން ވިދާޅުވެއްޖެއެވެ.

ވަޒީރު މިހެން ވިދާޅުވީ ދަޢުލަތުގެ އިދާރާތަކުގެ ކޮރަޕްޝަން ނައްތާލުމަށް ޤާނޫނީގޮތުން ހުރި ގޮންޖެހުންތައް ނައްތާލުމަށް ޤާނޫނަށް އިސްލާހު ހުށައެޅުމަށް ނިންމަވާފައިވާކަމަށް ރައީސުލްޖުމްހޫރިއްޔާ ހާމަކުރެއްވުމާ ގުޅިގެންނެވެ.

ދާޚިލީ ސަލާމަތާ ފަންނިއްޔާތާ ބެހޭ ވަޒީރު އަލީ އިޙުސާން ވިދާޅުވީ މިހާރު އޮތް ޤާނޫނުލް ޢުޤޫބާތުގައި މިމާއްދާ ލިޔެފަ އޮތީ، މިވާހަކަ ގަދަޔަށް ދައްކާފަ އެއްވެސް މީހެއްގެ މައްޗަށް ދައުވާ ނުކުރެވޭ ގޮތަށްކަމަށެވެ. އަދި ދައުވާކުރިނަމަވެސް ސާބިތު ނުވާގޮތަށްކަމަށެވެ.

މިހާރުއޮތް ޤާނޫނުގަ މި މާއްދާ ލިޔެފަ އޮތީ މިވާހަކަ ގަދަޔަށް ދައްކާފަ އެއްވެސް މީހެއްގެ މައްޗަށް ދައުވާ ނުކުރެވޭ ގޮތަށް. އަދި ދައުވާކޮށްފިއްޔާ ސާބިތު ނުވާގޮތަށް. އަދި ކަންކުރުމުގެ ނިޔަތް ނެތި ލިޔެފައޮތް މާއްދާއެއް ގޮތަށް. ރައީސް ޑރ. މުއިއްޒު މިގެންނަވަން ނިންމެވި އިސްލާހަކީ… https://t.co/Cleu1Iw1a6

— Minister of Homeland Security & Technology (@min_mohst) October 31, 2024

ވަޒީރު އިޙުސާން ވިދާޅުވީ ޤާނޫނުގައި އެކަމާ ގުޅޭ މާއްދާތަކަކީ ކަންކުރުމުގެ ނިޔަތެއްނެތި ލިޔެފައިވާ މާއްދާއެއް ކަމަށެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވަނީ ނުޙައްގު މުއްސަނދިކަން ހޯދުމުގެ މައްސަލަތައް ތަހުގީގުކޮށް، ދަޢުވާކުރުމުގައި ހުރި ގޮންޖެހުންތައް ނައްތާލުމަށް ދިވެހިރާއްޖޭގެ ޤާނޫނުލް އުޤޫބާތަށް އިސްލާހު ގެންނެވުމަށެވެ. މި އިސްލާހު ކުރިއަށް އޮތް ހަފްތާގައި، ސަރުކާރުގެ ފަރާތުން ރައްޔިތުންގެ މަޖިލީހަށް ހުށައެޅުއްވުމަށް އެމަނިކުފާނު ވަނީ ނިންމަވާފައެވެ.

ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙުސާން ވިދާޅުވީ ރައީސުލްޖުމްހޫރިއްޔާ ޑރ.މުޢިއްޒު، ގެންނަވަން ނިންމެވި އިސްލާހަކީ ދައުލަތްތެރޭ އޮތް ޒަމާންވީ ކޮރަޕްޝަންގެ މައްސަލަ ހައްލުކުރެވޭނެ އަދި އެނިޔަތާއި އަޒުމް ފެންނަ އިސްލާހެއްކަމަށެވެ.

ސަރުކާރުގެ ފަރާތުން އިސްލާހު ހުށައެޅުއްވުމަށް ނިންމާފައިވަނީ ޤާނޫނުލް ޢުޤޫބާތުގެ 515 ވަނަ މާއްދާއަށެވެ. މިއީ ނުޙައްޤު މުއްސަނދިކަން ހޯދައި ލިބިގަތުމުގެ ކުށްތައް ކަނޑައަޅާފައިވާ މާއްދާއެވެ.

އެ މާއްދާއަށް ގެނެވޭ އިސްލާހުގެ ސަބަބުން ރައީސުލްޖުމްހޫރިއްޔާ އާއި ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ފަނޑިޔާރުން ހިމެނޭގޮތަށް ދަޢުލަތުގެ މުވައްޒަފުންނާއި ދަޢުލަތުގެ މުވައްޒަފެއްގެ މަގާމު އަދާކޮށްފައިވާ ފަރާތްތަކުން ހޯދަމުންދާ ނުވަތަ ހޯދާފައިވާ ނުޙައްގު މުއްސަނދިކަމުގެ މައްސަލަތައް ބެލުމަށް ފަސޭހަވެގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވެއެވެ.