ފެންބޮޑުވުމުގެ ސަބަބުން ރެއާލާއި ވެލެންސިއާ ބައްދަލުކުރުމަށް ހަމަޖެހިފައި އޮތް މެޗު ފަސްކޮށްފި
ސްޕެނިޝް ލީގުގައި ވެލެންސިއާގެ ދަނޑުގައި އެންމެ ފަހުގެ ޗެމްޕިއަން ރެއާލް މެޑްރިޑާ ދެކޮޅަށް ކުޅެން އޮތް މެޗު، އެ ސަރަހައްދުގައި މޫސުން ގޯސްވެ ފެންބޮޑުވުމުގެ ސަބަބުން ފަސްކޮށްފިއެވެ.
ލަލީގާއިން އެދުނު ގޮތުގެ މަތިން އެ މެޗު އެހެން ދުވަހަކަށް ބަދަލުކުރުމަށް ނިންމާފައިވާ ކަމަށް ސްޕެއިންގެ ފުޓްބޯޅަ ފެޑެރޭޝަނުން ބުރާސްފަތި ދުވަހު ވަނީ ކަށަވަރުކޮށްދީފައެވެ. އަދި ލީގުގައި ވިޔަރެއާލާއި ރާޔޯ ވަޔެކާނޯ ދެމެދު ކުޅެން އޮތް މެޗުވެސް ވަނީ ފަސްކޮށްފައެވެ. މި ދެ މެޗުވެސް ކުރީން ކުޅުމަށް ހަމަޖެހިފައިވާ އޮތީ މާދަމާރެއެވެ.
މި މެޗުތައް ކުޅޭނެ އައު ތާރީޚުތަކެއް މި ނޮވެންބަރު މަހުގެ ފަސްވަނަ ދުވަހުގެ ކުރިން ހުށަހެޅުމަށް ސްޕެއިންގެ ފުޓްބޯޅަ ފެޑެރޭޝަނުން ލަލީގާ އަދި އެ ކުލަބުތަކަށް ވަނީ އަންގާފައެވެ.
ވެލެންސިއާގެ ސަރަހައްދީ ސަރުކާރުގެ އިސްވެރިން ބުދަ ދުވަހުގެރޭ ބުނެފައިވާ ގޮތުގައި، އިރުމަތީ ސަރަހައްދުގައި ވާރޭވެހި ކުއްލި ފެންބޮޑުވުމުގެ ސަބަބުން މިހާތަނަށް 92 މީހުން މަރުވެފައިވާއިރު، އަދިވެސް ގިނަ ބަޔަކު ވަނީ ގެއްލިފައެވެ.
ވެލެންސިއާ ނިސްބަތްވާ ސަރަހައްދުގައި ކުޅެން ހަމަޖެހިފައިވާ އެހެން ހުރިހާ ފުޓްބޯޅަ މެޗުތަކެއްވެސް ވަނީ ފަސްކޮށްފައެވެ. އޭގެތެރޭގައި، ދެވަނަ ޑިވިޝަންގެ ތިން މެޗު ހިމެނެއެވެ. މީގެއިތުރުން، ވިމެންސް ލީގާ އެފްގައި ވެލެންސިއާ އާއި ޑިޕޯޓީވޯ ލަ ކޮރޫނިއާއާ ދެމެދު ކުޅެން އޮތް މެޗާއި، ލެވާންޓޭ އާއި ރެއާލް ކުޅެން އޮތް މެޗުވެސް ވަނީ ފަސްކޮށްފައެވެ.
މީގެ ކުރިން މިދިޔަ ބުދަ ދުވަހު، މެޑްރިޑާ 15 މޭލު ދުރުގައިވާ ޕާރްލާގައި ކުޅެން އޮތް ވެލެންސިއާ އާއި ޕާރްލާ އެސްކުއެލާއާ ދެމެދުގެ ކޮޕާ ޑެލްރޭ މެޗުވެސް ފަސްކޮށްފައިވާ ކަމަށް ސްޕެއިންގެ ފުޓްބޯޅަ ފެޑެރޭޝަނުން ވަނީ އިޢްލާންކޮށްފައެވެ.
ވެލެންސިއާގެ ސްޓޭޑިއަމް ވަނީ ފެންބޮޑުވުމުގެ ސަބަބުން ގެއްލުން ލިބުނު މީހުންނަށް އެހީތެރިކަން ފޯރުކޮށްދިނުމަށް އިމާޖެންސީ އެއިޑް ސްޓޭޝަނެއްގެ ގޮތުގައި ހަމަޖައްސާފައެވެ. އެގޮތުން، މި މަރުކަޒުގައި ފެންބޮޑުވުމުގެ ސަބަބުން ގެއްލުން ލިބުނު މީހުންނަށް ކާބޯތަކެއްޗާއި، އަސާސީ ތަކެތި އެއްކުރުމުގެ މަސައްކަތް ވޮލަންޓިއަރުން ދަނީ ކުރަމުންނެވެ.
މި ފެންބޮޑުވުމުގެ ސަބަބުން ގެއްލުން ލިބުނު ފަރާތްތަކަށް އެހީތެރިކަން ފޯރުކޮށްދިނުމުގެ ގޮތުން ފައިސާ ހޯދުމަށް ލަލީގާގެ ކްލަބުތަކުން އަތުގުޅާލާފައިވާއިރު، ރެއާލުންވެސް ވަނީ އެފަރާތްތަކަށް އެހީވުމަށް ގާތްގަނޑަކަށް އެއް މިލިއަން ޔޫރޯ ހަދިޔާކޮށްފައެވެ.