މިމަހުގެ 3ވަނަ ދުވަހާ ހަމައަށް ރަސްމީ ފާލަމާއި ގްރީން ޒޯން ސަރަޙައްދު ވަކި ވަގުތުތަކެއްގައި ބަންދުވާނެ
-
އެސަރަޙައްދު ބަންދުކުރަނީ ނަސްރުގެ ދުވަހުގެ ހަރަކާތްތަކާ ގުޅިގެން
-
ބަންދުކުރާ ވަގުތަކީ މެންދުރު 01:30އިން ފެށިގެން، އިރުއޮއްސި 07:00އަށް
ނަސްރުގެ ދުވަހުގެ ހަރަކާތްތަކާއި ގުޅިގެން ރަސްމީ ފާލަމާއި ގްރީން ޒޯން ހިމެނޭހެން، ކުރިއަށް އޮތް 3 ދުވަހު ވަކި ގަޑިތަކެއްގައި އެ ސަރަޙައްދު ބަންދުވާނެކަމަށް ފުލުހުން ވިދާޅުވެއްޖެއެވެ.
ފުލުހުން ވިދާޅުވީ ނަސްރުގެ ދުވަހުގެ ހަރަކާތްތަކާ ގުޅިގެން ނޮވެމްބަރު 1، 2، 3 ވަނަ ދުވަހު ރަސްމީ ފާލަން ސަރަޙައްދުގެ ނެރާއި ފާލަންތައް އަދި ގްރީން ޒޯން ހިމެނޭ ސަރަޙައްދު ބަންދުވާނެކަމަށެވެ. އެ ސަރަޙައްދުތައް ބަންދުކުރަން ނިންމާފައިވަނީ ނަސްރުގެ ދުވަސް ފާހަގަކުރުމަށް ބާއްވާ މިލިޓަރީ ޑިސްޕްލޭ އިވެންޓާ ގުޅިގެންނެވެ.
އެ ސަރަޙައްދުތައް ބަންދުވާނީ މެންދުރު 01:30އިން ފެށިގެން، އިރުއޮއްސި 07:00އާއި ހަމައަށެވެ. މި ގަޑިތަކުގައި ބަންދުކޮށްފައިވާ ސަރަޙައްދަށް ކަނޑު އުޅަނދާއި އެއްގަމު އުޅަނދުތައް އެ ސަރަޙައްދުތަކަށް ވަދެ އުޅުން މަނާވާނެއެވެ. އަދި ބަންދުކޮށްފައިވާ ސަރަޙައްދުގެ ވަށައިގެން ދުއްވޭ މަގުތަކުގެ ޓްރެފިކަށްވެސް ބައެއް ބަދަލުތައް އެ ވަގުތުތަކުގައި ގެންނާނެއެވެ. އެގޮތުން ބޮޑުތަކުރުފާނު މަގުން ފޮރިން މިނިސްޓްރީއާއި ހަމައިން ފެށިގެން މަސް މާރުކޭޓު ސަރަޙައްދު ހުސައިނީ ގޯޅީއާއި ހަމައިން ބަންދުވާނެއެވެ.