ހަށިވިއްކުމުގެ ވިޔަފާރިކުރި 6 މީހަކު އަނބުރާ ނާދެވޭގޮތަށް ޑީޕޯޓުކޮށްލައިފި
-
މިމައްސަލަތަކުގައި ހިމެނޭ އިތުރު 3 ބިދޭސީއަކު ޑީޕޯޓުކުރުމުގެ މަސައްކަތްދަނީ ކުރަމުން
-
މީގެތެރޭގައި ހިމެނެނީ 7 އަންހެނުންނާއި 2 ފިރިހެނުން
ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދިޔަ 6 ބިދޭސީއަކު ރާއްޖެ ނާދެވޭގޮތަށް ޑިޕޯޓުކޮށްލައިފިއެވެ. މޯލްޑިވްސް އިމިގްރޭޝަނުން ވިދާޅުވީ، އިތުރު 3 ބިދޭސީއަކު ޑީޕޯޓުކުރުމުގެ މަސައްކަތް ކުރަމުންދާކަމަށެވެ.
ރާއްޖޭގައި ހަށިވިއްކުމުގެ ވިޔަފާރިކުރަމުންދާ ބިދޭސީން ހޯދާ ފިޔަވަޅުއެޅުމަށް މޯލްޑިވްސް އިމިގްރޭޝަނާއި ދިވެހި ފުލުހުންގެ ޚިދުމަތުންވަނީ ޚާއްސަ އޮޕަރޭޝަނެއް ފައްޓަވާފައެވެ. މިގޮތުން މިމަހުގެ ތެރޭގައި މިފަދަ 5 މައްސަލައަކާއި ގުޅިގެން ބިދޭސީ 7 އަންހެނުން އަދި އޭޖެންޓުންގެ ގޮތުގައި މަސައްކަތްކުރަމުންދިޔަ ބިދޭސީ 2 ފިރިހެނުންވަނީ އިމިގްރޭޝަންގެ ބެލުމުގެ ދަށަށް ގެނެސްފައިކަމަށް އެއިދާރާއިން ވިދާޅުވެއެވެ. އަދި މިމައްސަލަ ތަޙުގީގުކޮށް މީގެތެރެއިން 5 އަންހެނުންނާއި 1 ފިރިހެނަކު އަނބުރާ ރާއްޖެ ނާދެވޭގޮތަށް ޑީޕޯޓުކޮށްލާފައިވާކަމަށް އިމިގްރޭޝަނުންވަނީ ހާމަކުރައްވާފައެވެ. އަދި މިމައްސަލައިގައި ހިމެނޭ އަނެއް 3 ބިދޭސީންވެސް ޑީޕޯޓުކުރުމުގެ މަސައްކަތް އިމިގްރޭޝަނުންދަނީ ކުރަމުންނެވެ.
ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދިއަ ބިދޭސީން ހޯދުމަށް އިމިގްރޭޝަނާއި ފުލުހުން ގުޅިގެން މި އޮކްޓޫބަރު މަހުގައި ވަނީ ހާއްސަ އިންސްޕެކްޝަން ތަކެއް ހިންގާފައި. އެގޮތުން މިފަދަ 05 މައްސަލައަކާއި ގުޅިގެން ބިދޭސީ 07 އަންހެނަކު އަދި އެޖެންޓުންގެ ގޮތުގައި… pic.twitter.com/TsFCzVWCSY
— Maldives Immigration (@ImmigrationMV) October 27, 2024
ޤަވާއިދާ ޚިލާފަށް އުޅެމުންދާ ބިދޭސީން ހޯދުމަށް ހިންގި އޮޕަރޭޝަނެއްގައި ހޮނިހިރު ދުވަހުވެސް އިމިގްރޭޝަންގެ ބެލުމުގެ ދަށަށް 5 ބިދޭސީއަކުވަނީ ގެންގޮސްފައެވެ. އެގޮތުން މާލޭގައި ކުރިއަށްގެންދިޔަ ރެއިޑުގައި 3 ކެފޭއެއް ބަލައި ފާސްކޮށް ގަވާއިދާ ޚިލާފަށް މަސައްކަތްކުރަމުންދިޔަ 5 ބިދޭސީންވަނީ އިމިގްރޭޝަންގެ ބެލުމުގެ ދަށަށް ގެންގޮސްފައެވެ.
ބިދޭސީންގެ މައްސަލަ ޙައްލުކުރުމަށް މުޅި ރާއްޖެ ހިމެނޭހެން ސަރުކާރުން ގެންދަވަނީ ޚާއްސަ މަސައްކަތްތަކެއް ކުރައްވަމުންނެވެ. މިގޮތުން އަތޮޅު ތެރޭގެ ރަށްރަށުގައިވެސް މިފަދަ އޮޕަރޭޝަންތައްދަނީ ހިންގަމުންނެވެ. މިގޮތުން ކ.ގުރައިދޫއިން ގަވާއިދާ ޚިލާފަށް އުޅެމުންދިޔަ 39 ބިދޭސީއަކުވަނީ އިމިގްރޭޝަންގެ ބެލުމުގެ ދަށަށް ގެނެސްފައެވެ. ގަވާއިދާ ޚިލާފަށް ރަށްރަށުގައި އުޅެމުންދާ ބިދޭސީން ހޯދާ ހުރިހާ ބިދޭސީންގެ މަޢުލޫމާތު އެއްކުރުމުގެ މަސައްކަތްވެސް ސަރުކާރުންގެންދަވަނީ ކުރައްވަމުންނެވެ. ސަރުކާރުގެ އަމާޒަކީ ކުރިއަށް އޮތް 3 އަހަރުގެ ތެރޭގައި ރާއްޖެއަށް ކުރިމަތިވެފައިވާ އެންމެ ބޮޑު އެއް މައްސަލަ ކަމުގައިވާ ބިދޭސީންގެ މައްސަލައަށް ދާއިމީ ޙައްލެއް ހޯދުމެވެ.