އަރްފަތު، ބުޅާމަހުން ކާބޯތަކެތި ތައްޔާރުކުރިކަމުގެ އެއްވެސް ހެއްކެއް ނެތް
-
މި މައްސަލާގައި ހައްޔަރުކުރީ ބަންގްލަދޭޝްގެ ޢުމުރުން 32 އަހަރުގެ އަރްފަތު ހުސައިން
-
އަރްފަތު ހުސައިން އިމިގްރޭޝަނާ ހަވާލުކުރުމުންވަނީ ޑީޕޯޓުކޮށްފައި
-
އޭނާ ޑީޕޯޓުކުރީ ގަވާއިދާ ޚިލާފަށް ރާއްޖޭގައި ވިޔަފާރިކޮށް ޤާނޫނާ ޚިލާފުވެފައިވާތީ
ރާއްޖޭގައި ބުޅާމަހުން ކާބޯތަކެތި ތައްޔާރުކުރިކަމުގެ އެއްވެސް ހެއްކެއް ފުލުހުން ހިންގި ތަހުގީގުގައި ފެނިފައިނުވާކަމަށް ފުލުހުން ވިދާޅުވެއްޖެއެވެ.
ރާއްޖޭގައި ބުޅާމަހުން ކާބޯތަކެތި ތައްޔާރުކުރިކަމުގެ ތުހުމަތުގައި ބަންގްލަދޭޝްގެ ރައްޔިތެއްކަމަށްވާ, ޢުމުރުން 32 އަހަރުގެ އަރްފަތު ޙުސައިން ފުލުހުން ހައްޔަރުކުރީ މިދިޔަ އޮގަސްޓްމަހުގެ 20 ވަނަ ދުވަހުއެވެ. އަރްފަތު ހައްޔަރުކޮށް ފުލުހުން ކުރިއަށް ގެންދިޔަ ތަހްޤީގު ނިންމާލާފައިވާއިރު އޭނާގެ މައްޗަށް ޖިނާއީ ތަހުގީގު ހިންގޭވަރަށް ހެއްކާއި ގަރީނާ ލިބިފައިނުވާކަމަށް ފުލުހުންވަނީ ވިދާޅުވެފައެވެ.
އެހެންކަމުން މިމައްސަލައިގެ ތުހުމަތުގައި ޙައްޔަރުކުރި އަރްފަތު ޙުސައިން އިމިގްރޭޝަނާ ހަވާލުކުރުމުން އޭނާ މިހާރުވަނީ ޑީޕޯޓުކޮށްފައިކަމަށް އިމިގްރޭޝަނުންވަނީ ވިދާޅުވެފައެވެ.
އިމިގްރޭޝަނުން ވިދާޅުވީ އޭނާ ޑީޕޯޓުކޮށްފައިވަނީ ގަވާއިދާ ޚިލާފަށް ރާއްޖޭގައި ވިޔަފާރިކޮށް އިމިގްރޭޝަންގެ ޤާނޫނާ ޚިލާފުވެފައިވާތީ ކަމަށެވެ.
ރާއްޖޭގައި ގަވާއިދާ ޚިލާފަށް އުޅޭ ބިދޭސީން ހޯދުމަށް އިމިގްރޭޝަނުން ކުރަމުންދާ މަސައްކަތްތަކުގެ ތެރެއިން، ސާފުތާހިރުކަން ކުޑަކޮށް ކާބޯތަކެތި ތައްޔާރުކޮށް ވިއްކާ ގިނަ ޢަދަދެއްގެ ބިދޭސީންވަނީ އިމިގްރޭޗަންގެ ބެލުމުގެ ދަށަށް ގެންގޮސްފައެވެ.