ޒުވާން އައު ކުޅުންތެރިންނަށް ފުރިހަމައަށް އިތުބާރު އެބައޮތް ކަމަށާއި، ތަޖުރިބާކާރު ކުޅުންތެރިން ނެތްތަން އެ މީހުންނަށް ފޫބެއްދޭނެ ކަމަށް ބެލްޖިއަމްގެ ކޯޗު ޑޮމެނިކޯ ޓެޑެސްކޯ ބުނެފިއެވެ.
ޔުއެފާ ނޭޝަންސް ލީގުގައި މިރޭ އިޓަލީއާ ދެކޮޅަށް ކުޅޭ މެޗުގެ ކުރިން ނޫސްވެރިންނާ ވާހަކަ ދައްކަމުން ޓެޑެސްކޯ ބުނެފައިވަނީ އިޓަލީ އާއި ދެކޮޅަށް ކުޅޭ މެޗުގައި އެ ޓީމުގެ ކެޕްޓަން ކެވިން ޑި ބްރޭނާ އާއި ފޯވަޑް ރުމެލޫ ލުކާކޫ ނެތްތަން ފޫބައްދަންތިބި ޒުވާން ކުޅުންތެރިންނަށް އެކަން ކުރެވޭނެ ކަމަށެވެ. އަދި ބެލްޖިއަމްގައި މިވަގުތު ތިބި ޒުވާން ކުޅުންތެރިންނަކީ އެގައުމުގެ ފުޓްބޯޅައިގެ ރަން ޖީލެއްގެ ފެށުން ކަމަށްވެސް އޭނާ ވަނީ ބުނެފައެވެ.
އިޓަލީއަށް އުފަން ޓެޑެސްކޯ ބުނެފައިވަނީ އިޓަލީ އާއި ދެކޮޅަށް އޭނާ ފުރަތަމަ ފަހަރަށް ނިކުންނައިރު، އޭނާގެ ހިތުގައި އިޓަލީއަށް އޮތް ލޯބި އަބަދުވެސް ދެމި އޮންނާނެ ކަމަށާއި، މިއީ ފަސޭހަ މެޗަކަށް ނުވާނެ ކަމަށެވެ.
އިޓަލީ އާއި ދެކޮޅަށް މިރޭ ބެލްޖިއަމް ނިކުންނައިރު، ނޭޝަންސް ލީގުގައި މިހާތަނަށް އެޓީމު ކުޅުނު ދެ މެޗުގެ ތެރެއިން މޮޅުވެފައިވަނީ އެއް މެޗުންނެވެ. އަދި އިޓަލީ ވަނީ ކުޅުނު ދެ މެޗުވެސް ކާމިޔާބުކޮށް ހަ ޕޮއިންޓް ހޯދާފައެވެ. އިޓަލީއާ ދެކޮޅަށް ބެލްޖިއަމް އެންމެ ފަހުން ކުޅުނު ތިން މެޗުވެސް ކާމިޔާބުކޮށްފައިވަނީ އިޓަލީންނެވެ.
އަނިޔާގެ ސަބަބުން މި މަހު ބެލްޖިއަމް ކުޅޭ ދެ މެޗުގައި ޑި ބްރޭނާއަށް ނުކުޅެވޭއިރު، ލުކަކޫ ވަނީ އަމިއްލައަށް އެދިގެން މި ދެ މެޗަށް ނެގި ސްކޮޑުން ވަކިވެފައެވެ. މީގެ އިތުރުން ބެލްޖިއަމްގެ އެއްވަނަ ގޯލްކީޕަރު ތިބައޫ ކޯޓުއާ ވަނީ އެ ޓީމުގެ ކޯޗަކަށް ޓެޑެސްކޯ ހުއްޓާ ދެން ގައުމީ ޓީމަށް ނުކުޅޭނެކަމަށް ބުނެފައެވެ.
އަނެއްކޮޅުން މި މެޗަށް ނިކުންނައިރު އިޓަލީގެ ކޯޗު ލޫސިއާނޯ ސްޕަލެއްޓީ ބުނެފައިވަނީ ބެލްޖިއަމާ ދެކޮޅަށް ނިކުންނައިރު ވިސްނަން ޖެހޭ ގިނަ ކަންތައްތަކެއް އެބަހުރި ކަމަށާއި، އެއީ ހުނަރުވެރި ކުޅުންތެރިން ތިބި މޮޅު ޓީމެއް ކަމަށެވެ. އަދި ފާއިތުވެދިޔަ މެޗުތަކުގައި އިޓަލީން ދެއްކިފަދަ ކުޅުމެއް މިރޭގެ މެޗުގައިވެސް ދައްކާ މެޗުން މޮޅުވާން ބޭނުންވާކަމަށްވެސް ސްޕަލެއްޓީ ވަނީ ބުނެފައެވެ.