އިންގްލަންޑުގެ މޯގަން ގިބްސް-ވައިޓާއި، އެޒްރީ ކޮންސާ އަދި ކޮބީ މައިނޫއަށް އަނިޔާގެ ސަބަބުން ކުރިއަށް އޮތް ޔުއެފާ ނޭޝަންސް ލީގުގެ މެޗުތަކުގައި ނުކުޅެވުނު ނަމަވެސް، އެ ޓީމުގެ ކެޕްޓަން ހެރީ ކޭން ފިޓްވެފައިވާ ކަމަށް އިނގިރޭސި އެފްއޭއިން ބުނެފިއެވެ.
އެގޮތުން، ބަޔާން މިއުނިކުން ވެސް ވަނީ ކޭން އަށް ސްޓްރަކްޗަރަލް އިންޖަރީއެއްވެފައިނުވާކަމަށާއި، އެހެންކަމުން އޭނާ ނޭޝަންސް ލީގުގައި ކުރިއަށް އޮތް މެޗުތަކުގައި ބައިވެރިވުމަށް ގައުމީ ޓީމާއެކު ދެމިހުންނާނެ ކަމަށް ވެސް ބުނެފައެވެ. ނަމަވެސް، އިނގިރޭސި އެފްއޭ އިން ބުނެފައިވަނީ، ކޮންސާ، މައިނޫ އަދި ގިބްސް-ވައިޓް އަށް ލިބިފައިވާ އަނިޔާގެ ސަބަބުން ގްރީސް އަދި ފިންލޭންޑާ ދެކޮޅަށް ކުޅޭ މެޗުތަކުގައި ބައިވެރިނުވާނެ ކަމަށެވެ.
މިދިޔަ މަހުގެ ތެރޭގައި އިންގްލެންޑްގެ ޖާޒީގައި ފުރަތަމަ ފަހަރަށް ފެނިގެންދިޔަ ނޮޓިންހަމް ފޮރެސްޓްގެ މިޑްފީލްޑަރު ގިބްސް-ވައިޓް އަށް އަނިޔާވީ ލީގުގައި އެ ޓީމުން އެންމެ ފަހުން ޗެލްސީއާ 1-1 އިން އެއްވަރުވި މެޗުގައެވެ.
އެސްޓަން ވިލާގެ ޑިފެންޑަރު، ކޮންސާ އަށް އަނިޔާވީ މި ހަފްތާގެ އާދީއްތަ ދުވަހު އަމިއްލަ ދަނޑުގައި މެންޗެސްޓާ ޔުނައިޓެޑާ ދެކޮޅަށް ކުޅެ ލަނޑެއްނުޖެހި އެއްވަރުވި މެޗުގައެވެ. ކޮންސާގެ ފައިގެ ފަލަމަސްގަނޑަށް ލިބުނު މި އަނިޔާއާ ގުޅިގެން އެ މެޗުގެ ކުރީކޮޅު ވަނީ ބަދަލުކޮށްފައެވެ. އެ މެޗުގެ ފަހު ހާފުގައި ޔުނައިޓެޑްގެ މިޑްފީލްޑަރު މައިނޫ އަށް އަނިޔާވެގެން ވަނީ ބަދަލުކޮށްފައެވެ.
މި ތިން ކުޅުންތެރިން ސްކޮޑާ ވަކިވެފައިވީނަމަވެސް، އިންގްލެންޑްގެ ވަގުތީ ކޯޗު، ލީ ކާސްލީ މިވަގުތު އެ ޓީމުގެ ސްކޮޑުގައި ތިބި 22 ކުޅުންތެރިންގެ އިތުރަށް އެހެން ކުޅުންތެރިއަކު ގެނައުމަށް ނިންމާފައެއްނުވެއެވެ.
އިންގްލެންޑުން ދެން އެންމެ އަވަހަށް ކުޅޭ މެޗުގައި އަންނަ ބުރާސްފަތި ދުވަހު ވެމްބްލީ ސްޓޭޑިއަމްގައި ގްރީސްއާ ދެކޮޅަށް ނިކުންނައިރު، ދެން އޮތް މެޗުގައި އަންނަ އާދީއްތަ ދުވަހު ރަށުން ބޭރުގައި ނިކުންނާނީ ފިންލެންޑާ ދެކޮޅަށެވެ.