މާލެއާއި 3.9 މޭލު ދުރުގައި އޮންނަ ރީތި ހިތްގައިމު އ.އ ތޮއްޑޫ އަކީ އާބާދީގައި 1998 މީހުން ދިރިއުޅެމުންދާ ރަށެކެވެ. މައިގަނޑުގޮތެއްގައި ދަނޑުވެރިކަން ކުރާ ތޮއްޑޫ މަޝްހޫރުވެފައިވަނީ ކަރާ ހެއްދުމަށެވެ. އެހެންނަމަވެސް އާންމުކޮށް ބޭނުންކުރާ ގިނަ ބާވަތްތަކެއްގެ ފަތުގެ ބާވަތާއި ތަރުކާރީ އަދި މޭވާ ތޮއްޑޫގައި ހައްދައެވެ. މީގެ ތެރޭގައި ފަޅޯ، މިރުސް، ކިޔުކަމްބާ، ލެޓިއުސް، ކުއްޅަފިލާފަތް، ކަންކުން، ތޮރާ، ފުފޫ ބިލެތް ފަދަ ބާވަތްތައް ހިމެނެއެވެ.
img:http://s3.psmnews.mv/images/660x400/14653147365120.jpg|ތޮއްޑޫގެ ދަނޑެއް
ދަނޑުވެރިކަމުގެ އިތުރުން ވިޔަފާރިއެއްގެ ގޮތުގައި އާމްދަނީ ހޯދުމަށް ގެސްޓްހައުސް ވިޔަފާރިވެސް ތޮއްޑޫގައި ކުރެއެވެ. ތޮއްޑޫގައި ސޯޅަ ގަޑިއިރު ޚިދުމަތްދޭ ސިއްޚީ މަރުކަޒުގައި ހުންނަނީ އާންމު ބަލިތަކުގެ ޑޮކްޓަރެކެވެ. މި ސިއްޚީ މަރުކަޒުން ލިބެންހުރި ޚިދުމަތްތައް މަދުވެފައި ޖާގައިގެ ދަތިކަމަކީވެސް އެރަށުން ފާހަގަކުރާކަމެކެވެ. އެއްފަހަރާ ހަތަރު މީހުން އެޑްމިޓްކުރެވޭ މި ސިއްޚީ މަރުކަޒުގެ ޖާގައިގެ ދަތިކަމަށް ހައްލެއް ގެނައުމަށް އެރަށުން މިހާރު ބިމެއް ހަމަޖެހިފައިވާކަމަށް ސިއްޚީ މަރުކަޒު ހިންގެވުމާ ވަގުތީ ގޮތުން ޙަވާލުވެ ހުންނެވި ކޮނިޔުނިޓީ ހެލްތް އޮފިސަރ މުޙައްމަދު އަކްރަމް ވިދާޅުވިއެވެ. އަކްރަމް ވިދާޅުވީ ހަ ނަރުހުން ތިބޭ މި ސިއްޚީ މަރުކަޒުގައި ޚިދުމަތް ފުޅާކުރުމަށް ދިމާވާ އެންމެ ބޮޑު ހުރަހަކީ ރަށުގައި މި ދާއިރާއިން ކިޔަވައިގެން ތިބި މީހުން މަދުވުން ކަމަށެވެ.
ގްރޭޑް ދިހައަކާއި ހަމައަށް ކިޔަވައިދެމުންދާ ތޮއްޑޫގައި ޕްރީ ސްކޫލެއްވެސް ހުރެއެވެ. ކަރަންޓްގެ ޚިދުމަތް ކުރިން ތޮއްޑޫއަށް ދެމުން ގެންދިޔައީ އެ ރަށުގެ ދެ ކްލަބުން ކަމުގައި ވިޔަސް، މިހާރު އެރަށަށް ސްޓެލްކޯއިން ވަނީ މި ޚިދުމަތް ދޭން ފަށާފައެވެ.
ނަމާދުކުރުމަށް އެރަށުގައި މިހާރު ހަތަރު މިސްކިތް ހުރެއެވެ. އެންމެ ބޮޑު މިސްކިތުގައި އެއްފަހަރާ ޖުމްލަ އެއްހާސް އަށްސަތޭކަ މީހުންނަށް ނަމާދުކުރެވެއެވެ.
img:http://s1.psmnews.mv/images/660x400/14653147506886.jpg|އއ. ތޮއްޑޫ
ތޮއްޑޫގައި މިހާރު ހަދާފައިވާ ބަނދަރު ބޭނުންކުރުމަށް ދަތިތަކެއް ހުރިކަން އެރަށު ކައުންސިލްގެ ޒިންމާދާރު އިސްވެރިޔާ އިބްރާހިމް ވަޙީދު ފާހަގަކުރެއްވިއެވެ. މިކަމަށް ހައްލެއް ގެނައުމަށް ހައުސިން މިނިސްޓްރީއާއި މަޝްވަރާކޮށްފައިވާކަމަށް ވެސް އޭނާ ވިދާޅުވިއެވެ.
ރާއްޖޭގެ އެހެން ރަށްރަށެކޭ އެއްގޮތަށް ތޮއްޑޫއަކީވެސް ކުނީގެ މައްސަލަ ބޮޑުރަށެކެވެ. އެރަށުގައި ކުނި އުކާލަމުން މިހާރުގެންދަނީ އެރަށުގައި ހަދާފައިވާ ވަގުތީ ކުނިގޮނޑަށްކަމަށް ތޮއްޑޫ ކައުންސިލްގެ ނައިބު ރައީސް އިބްރާހިމް ރަޝީދު ވިދާޅުވިއެވެ.
މިރަށުގައިވެސް ރާއްޖޭގައި އާންމުކޮށް ކުޅޭ ކުޅިވަރުގެ ކުޅެއެވެ. މިގޮތުން ފުޓްބޯޅަ، ބެޓްމިންޓަން އާއި ވޮލީ، އަދި ބަށި އެރަށުގެ ޒުވާނުން ކުޅެއެވެ. އެރަށުގައި ޒުވާނުންނަށް ޚާއްސަކޮށް އުތުރާއި ދެކުނުގައި ފުޓްބޯޅަ ކުޅެން ދެ ދަނޑު ހަދާފައިވެއެވެ. އަދި ބަށި ކޯޓާއި ފުޓްސެލް ދަނޑުގެ މަސައްކަތްވެސް ވަރަށް އަވަހަށް ފެށޭނެކަމަށް ވެސް އިބްރާހިމް ރަޝީދު ވިދާޅުވިއެވެ.