އިނގިރޭސި ޕްރިމިއަރ ލީގުގައި އެންމެ ފަހުން އަމިއްލަ ދަނޑުގައި ޓޮޓްނަމް ހޮޓްސްޕާ އަތުން 0-3 އިން މެންޗެސްޓާ ޔުނައިޓެޑް ބަލިވި މެޗުގައި އެ ޓީމުގެ ކެޕްޓަން، ބްރޫނޯ ފެނާންޑޭސް އަށް ދެއްކި ރަތް ކާޑު ބާޠިލްކޮށް، ސަސްޕެންޝަން އުވާލައިފިއެވެ.
"މެންޗެސްޓާ ޔުނައިޓެޑްގެ ކުރިއަށް އޮތް ތިން މެޗުގައި ބްރޫނޯ ފެނާންޑޭސް އަށް ކުޅެވޭނެ. އެއީ، އެންމެ ފަހުން ކުޅުނު މެޗުގައި ރަތް ކާޑު ދައްކަން ނިންމި ނިންމުމަކީ ރަނގަޅު ނިންމުމެއް ނޫންކަމަށް އިސްތިއުނާފުކުރުމަށް ހުށަހެޅި މައްސަލަ ކާމިޔާބުވުމުން." ޔުނައިޓެޑްގެ ބަޔާނުގައިވެއެވެ.
އޯލްޑް ޓްރެފޯޑްގައި ކުޅުނު އެ މެޗުގެ 42 ވަނަ މިނެޓުގައި ޓޮޓްނަމްގެ މިޑްފީލްޑަރު، ޖޭމްސް މެޑިސަން އަށް ޔުނައިޓެޑްގެ ކެޕްޓަން، ފެނާންޑޭސް ކުރި ނުރައްކާތެރި ޓެކުލާ ގުޅިގެން ރެފްރީ ކްރިސް ކަވަނާގް ރަތް ކާޑު ދައްކަން ނިންމި ނިންމުމަށް ވީއޭއާރް އިން އެއްބަސްވިއެވެ.
މިއާއެކު، އެ މެޗުގައި ދެއްކި ސީދާ ރަތް ކާޑާ ގުޅިގެން ފެނާންޑޭސް އަށް ތިން މެޗުގެ ސަސްޕެންޝަނެއް އައެވެ. އެކަމަކު، ޔުނައިޓެޑުން އެ ނިންމުމާ ދެކޮޅަށް އިސްތިއުނާފުކުރުމުން އެކަން ކާމިޔާބުވެ، އެ ޓީމަށް ކުރިއަށް އޮތް ދެ މެދުގައި ފެނާންޑޭސް އަށް ކުޅެވޭނެ އެވެ. ފެނާންޑޭސް އަށް ދެއްކި ރަތް ކާޑު ބާޠިލްކުރުމުގެ ކުރިން، އަންނަ އާދީއްތަ ދުވަހު އެސްޓަން ވިލާއާ ދެކޮޅަށް ކުޅެން އޮތް މެޗާއި، ބްރެންޓްފޯޑް އަދި ވެސްޓް ހެމް ޔުނައިޓެޑްއާ ދެކޮޅަށް އޮތް މެޗުތައް ގެއްލޭނެއެވެ.
ލީގުގައި އެންމެ ފަހުން ކުޅުނު ފަސް މެޗުގެ ތެރެއިން ތިން މެޗުން ބަލިވެފައިވާ ޔުނައިޓެޑަށް މިހާތަނަށް ކުޅުނު ހަ މެޗުން ލިބިފައިވާ ހަތް ޕޮއިންޓާއެކު އޮތީ ތާވަލްގެ 13 ވަނައިގައެވެ.