ޔުއެފާ ޗެމްޕިއަންސް ލީގުގައި ސްލޮވާކިޔާގެ ސްލޮވާން ބްރަޓިސްލާވާ އާއި ދެކޮޅަށް މެންޗެސްޓަރ ސިޓީ ކުޅުނު މެޗުގައި ފިލް ފޯޑެން ދެއްކި މޮޅު ކުޅުމާއެކު 4-0 ގެ ނަތީޖާއަކުން ސިޓީ މޮޅުވެއްޖެ އެވެ.
ރަށުން ބޭރުގައި މެންޗެސްޓަރ ސިޓީ ކުޅުނު މި މެޗުގެ 8 ވަނަ މިނިޓުގައި ގުންޑޮގާން ވަނީ ލަނޑެއް ޖަހާ ސިޓީ އަށް ކުރި ހޯދަދީފަ އެވެ. ސިޓީގެ ކުޅުންތެރިއަކު ފޮނުވާލި ހަމަލައެއް ދިފާއުކޮށް ފޮނުވާލުން އޭރިޔާ ބޭރުގައި ހުރެ ގުންޑޮގާންއަށް ލިބުމުން އޭނާ ވަނީ ގޯލުގެ ތެރެއަށް ފޮނުވާލައިގެން މެޗުގެ ފުރަތަމަ ލަނޑު ކާމިޔާބުކޮށްފަ އެވެ. މިއީ އެނބުރި އައިސް ގުންޑޮގާން ސިޓީއަށް ކާމިޔާބުކޮށްދިން ފުރަތަމަ ލަނޑެވެ.
މި މެޗުގައި މެންޗެސްޓަރ ސިޓީން ޖެހި ދެވަނަ ލަނޑު މެޗުގެ 15 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ ފިލް ފޯޑެން އެވެ. މިއީ އޭރިޔާ ތެރޭގައި ހުރެ ޖެރެމީ ޑޯކޫ ޖައްސާލި ބޯޅަ ގޯލުގެ ތިރީ ކަނަށް ފޮނުވާލައިގެން ފޯޑެން ކާމިޔާބުކޮށްފައިވާ ލަނޑެކެވެ.
މި ލަނޑަށްފަހުވެސް މެންޗެސްޓަރ ސިޓީން ވަނީ ބްރަޓިސްލާވާގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ. އެ ގޮތުން ފުރަތަމަ ހާފްގެ ކުޅުން ނިމުމުގެ ކުރިން ގުންޑޮގާން އާއި ޖެރެމީ ޑޮކޫގެ އިތުރުން ފޯޑެން ފޮނުވާލި ހަމަލަތައް އަމާޒުވެފައިވަނީ ގޯލުގެ ދަނޑިއަށެވެ.
މެންޗެސްޓަރ ސިޓީން މި މެޗުގައި ޖެހި ތިންވަނަ ލަނޑު މެޗުގެ 58 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ އާލިން ހާލަންޑް އެވެ. މިއީ މި ސީޒަނުގައި އޭނާ ކާމިޔާބުކުރި 11 ވަނަ ލަނޑެވެ.
ސިޓީން މި މެޗުގައި ޖެހި ހަތަރުވަނަ ލަނޑު އެ ޓީމަށް ކާމިޔާބު ކޮށްދީފައިވަނީ ފޯޑެންގެ އެސިސްޓަކުން ބަދަލު ކުޅުންތެރިއެއްގެ ގޮތުގައި ކުޅެން އެރި ޒުވާން ކުޅުންތެރިޔާ ޖޭމްސް މެކާޓީ އެވެ. މިއީ އޭނާ ސިޓީއަށް ކާމިޔާބުކޮށްދިން ފުރަތަމަ ލަނޑެވެ.
ޗެމްޕިއަންސް ލީގުގައި މެންޗެސްޓަރ ސިޓީ ދެން ބައްދަލުކުރާނީ މި މަހުގެ 23 ވަނަ ދުވަހު ސްޕާޓާ ޕްރާގް އާއި ދެކޮޅަށެވެ.