ޔުއެފާ ޗެމްޕިއަންސް ލީގުގައި މި ހަފުތާގައި ރަށުން ބޭރުގައި ފްރާންސްގެ ލިލްއާ ދެކޮޅަށް ރެއާލް މެޑްރިޑް ކުޅުމަށް ހަމަޖެހިފައިވާ މެޗުގައި އަނިޔާގެ ސަބަބުން އެ ޓީމުގެ ގޯލްކީޕަރު ތިބައޫ ކޯޓުއާއަށް ނުކުޅެވޭނެ ކަމަށް ފަހުގެ މީޑިއާ ޚަބަރުތައް ބުނެފިއެވެ.
އުމުރުން 32 އަހަރުގެ ކޯޓުއާ އަށް އަނިޔާވީ، ލީގުގައި މިދިޔަ އާދީއްތަ ދުވަހު އެތުލެޓިކޯ މެޑްރިޑާ 1-1 އިން ރެއާލް އެއްވަރުވި މެޗުގައެވެ.
ކޯޓުއާ އަށް ލިބުނު މި އަނިޔާގެ ސަބަބުން ލިއްލެއާ ދެކޮޅަށް ރެއާލް ކުޅުމަށް ހަމަޖެހިފައިވާ މެޗުގައި އެ ޓީމުގެ ގޯލް ބަލަހައްޓާނީ ޔޫކްރޭންގެ ގޯލްކީޕަރު، އެންޑްރީ ލުނިން އެވެ.
މީގެކުރީން، މިދިޔަ ސީޒަނުގެ ބޮޑުބައެއް ވެސް އަނިޔާގެ ސަބަބުން ކޯޓުއާ އަށް ވަނީ ގެއްލިފައެވެ. އެފަހަރު ކޯޓުއާގެ ކަކުލަށް ލިބުނު އަނިޔާއަކާ ގުޅިގެން ލުނިން ވަނީ ރެއާލްގެ ގޯލުގައި ހުރެ މޮޅު ކުޅުމެއްދައްކާފައެވެ.
މި ފަހަރުގެ ސީޒަނުގައި ކޯޓުއާ ވަނީ މިހާތަނަށް ރެއާލް ކުޅުނު 10 މެޗުގައި ވެސް ކުޅެފައެވެ. އެންމެ ފަހުން އެތުލެޓިކޯއާ ދެކޮޅަށް ކުޅުނު މެޗުގައި ދެވަނަ ހާފުގެ ކުޅުން ކުރިއަށްދަނިކޮށް ކޯޓުއާ ބަލަހައްޓަމުންދިޔަ ގޯލްގެ ފަހަތުގައި ތިބި ސަޕޯޓަރުން ވަނީ ދަނޑަށް އެއްޗެހި އުކާފައެވެ. މިއާއެކު، މެޗުގެ ކުޅުން ވަނީ 20 މިނެޓަށް މެދުކަނޑާލައިފައެވެ.
ލިއްލެއާ ދެކޮޅަށް ކުޅޭ މެޗަށްފަހު، ރެއާލަށް ދެން އޮތީ އަންނަ އާދީއްތަ ދުވަހު އަމިއްލަ ދަނޑުގައި ވިޔަރެއާލްއާ ބައްދަލުކުރާ މެޗެވެ. އެއަށްފަހު، ދެން ކުރިއަށް އޮތީ އިންޓަނޭޝަނަލް ބްރޭކެވެ.