19 އަހަރުގެ މެދުކެނޑުމަކަށްފަހު ޔުއެފާ ޗެމްޕިއަންސް ލީގަށް އެނބުރި އައި ސްޕާޓާ ޕްރާގުން 3-0 ގެ ނަތީޖާއަކުން އޮސްޓްރިއާގެ އާރްބީ ސާލްޒްބާގް ބަލިކޮށް، އެ މުބާރާތުގައި 21 އަހަރުގެ ތެރޭ ފުރަތަމަ މޮޅު ހޯދައިފިއެވެ.
ޗެކިއާގެ އެންމެ ފަހުގެ ޗެމްޕިއަން، ސްޕާޓާއިން އެންމެ ފަހުން ޗެމްޕިއަންސް ލީގުގައި ކުޅުނީ 2005 ވަނަ އަހަރުގެ ޑިސެންބަރު މަހުގެ ތެރޭގައެވެ. އެ ފަހަރުގެ ގްރޫޕް ސްޓޭޖުގައި އާސެނަލް، އަޔެކްސް އަދި އެފްސީ ތުން އާއެކު އެއް ގްރޫޕެއްގައި ހިމެނި، އެ ޓީމު ދިޔައީ ގްރޫޕުގެ ފުލަށެވެ. މީގެ އިތުރުން މި މުބާރާތުގައި އެ ޓީމުން އެންމެ ފަހުން މޮޅެއް ހާސިލުކުރީ 2003 ވަނަ އަހަރުގެ ޑިސެމްބަރު މަހު އިޓަލީގެ ލާޒިއޯ އަތުން 1-0 ގެ ނަތީޖާއަކުނެވެ.
މިހާ ދިގު މުއްދަތަކަށްފަހު، ޔޫރަޕުގެ ކުލަބުތަކުގެ މެދުގައި ކުޅެވޭ އެންމެ ޝަރަފުވެރި މުބާރާތުގައި ރޭ އަމިއްލަ ދަނޑުގައި ކުޅުނު މެޗު ފެށިތާ 107 ސިކުންތުގެ ތެރޭގައި ސްޕާޓާއިން ވަނީ ލީޑު ނަގައިފައެވެ. މި ލަނޑު އެ ޓީމަށް ޖަހައިދިނީ ކާން ކައިރިނެންއެވެ.
އަދި މެޗުގެ ފުރަތަމަ ހާފު ނިމެންދަނިކޮށް ސްޕާޓާގެ ދެވަނަ ލަނޑު ޖަހައިދިނީ ވިކްޓާ އޮލަޓުންޖީއެވެ. އޭނާ މި ލަނޑު ޖެހީ އެއް ފަހަރުން ފޮނުވާލި ހިތްގައިމު ހަމަލާއަކުންނެވެ. މި ލަނޑާއެކު އެ ޓީމުން ފުރަތަމަ ހާފު ނިންމާލީ 2-0 ގެ ނަތީޖާއަކުން ކުރީގައި އޮވެގެންނެވެ.
މި މެޗުގެ ދެވަނަ ހާފުގެ ކުޅުން ފެށިގެން 13 ވަރަކަށް މިނެޓުގެ ތެރޭގައި ސްޕާޓާގެ ތިންވަނަ ލަނޑު ޖަހައިދިނީ ގާޒިމް ލާޗީއެވެ. މިއީ ސާލްޒްބާގުގެ ދެ ޑިފެންޑަރުން ކައިރިން ނައްޓާލުމަށްފަހު އޭނާ ކާމިޔާބުކުރި ރީތި ލަނޑެކެވެ.