ޔުއެފާ ޗެމްޕިއަންސް ލީގުގައި ރޭ އަމިއްލަ ދަނޑުގައި އިންޓަރ މިލާނާ ދެކޮޅަށް ކުޅެ ލަނޑެއް ނުޖެހި މެންޗެސްޓާ ސިޓީ އެއްވަރުވިއިރު، ސްލޮވަން ބްރަޓިސްލާވާ އަތުން 1-5 ގެ ނަތީޖާއަކުން ސެލްޓިކް މޮޅުވެއްޖެއެވެ.
މިއީ 2022 ވަނަ އަހަރުގެ މާޗު މަހުގެ ފަހުން ޗެމްޕިއަންސް ލީގުގެ މެޗެއްގައި އަމިއްލަ ދަނޑުގައި ސިޓީއަށް ލަނޑެއް ނުޖެހި ނިންމާލަން ޖެހުނު ފުރަތަމަ ފަހަރެވެ. އަދި މިއީ މި އަހަރުގެ ތެރޭގައި ސިޓީއަށް ލަނޑެއް ނުޖެހި ނިންމާލަން ޖެހުނު ދެވަނަ ފަހަރުވެސް މެއެވެ. މީގެކުރީން މި އަހަރުގެ މާޗު މަހުގައި އިނގިރޭސި ޕްރިމިއަރ ލީގުގައި އާސެނަލާ ދެކޮޅަށް ސިޓީ ކުޅުނު މެޗު ނިމުނީވެސް ލަނޑެއް ނުޖެހި އެއްވަރުވެގެންނެވެ.
2023 ވަނަ އަހަރުގެ ޗެމްޕިއަންސް ލީގުގެ ފައިނަލްގައި ބައްދަލުކުރި ދެ ޓީމުގެ ކުރިމަތިލުމުގައި އިންޓަރ އިން ވަނީ ރަނގަޅު ޑިފެންސެއްކޮށް، ސިޓީގެ އެޓޭކުތަކުގެ ނުރައްކާ ކުޑަކޮށްފައެވެ. އެގޮތުން މުޅި މެޗުގައިވެސް ސިޓީއަށް ލަނޑު ޖަހާނެ މާ ރަނގަޅު ފުރުސަތުތަކެއް ތަނަވަސް ކުރެވިފައެއް ނުވެއެވެ.
ސިޓީގެ އިއްތިހާދު ސްޓޭޑިއަމުގައި ކުޅުނު މެޗުގައި އެ ޓީމަށް ލިބުނު އެންމެ ރަނގަޅު ފުރުސަތުގައި ފަހު ހާފުގައި ކުޅެން ނިކުތް އިލްކާއި ގުންޑޮގާން، ޕެނަލްޓީ އޭރިޔާ ތެރެއިން ބޮލުން ފޮނުވާލި ހަމަލާ އުނދަގުލެއް ނެތި އިންޓަރގެ ގޯލްކީޕަރު ޔެން ސޮމާ ވަނީ މަތަކޮށްފައެވެ.
ބަދަލު ކުޅުންތެރިއެއްގެ ގޮތުގައި ކުޅެން ނިކުތް އިނގިރޭސި މިޑްފީލްޑަރު ފިލް ފޯޑެން ފޮނުވާލި ތިން ހަމަލާއަކާއި، ޔޮޝްކޯ ގްވާޑިއޯލް ފޮނުވާލި ބޯޅަތައްވެސް ސޮމާ ވަނީ ހުއްޓުވާފައެވެ. ސިޓީގެ ނުރައްކާތެރި ފޯވާޑް، އާލިން ބްރައުޓް ހާލަންޑަށް މި މެޗުގައި އިންޓަރގެ ޑިފެންސަށް މާބޮޑު ނުރައްކަލެއް ނުކުރެވުނެވެ. އޭނާ ފޮނުވާލި ހަމަލާތަކުގެ ތެރެއިން ގޯލަށް އަމާޒުވި ބޯޅަތައްވެސް ވަނީ ފަސޭހަކަމާއެކު ހުއްޓުވާފައެވެ.
މި މެޗުގެ 76 ވަނަ މިނެޓުގައި އިންޓައަށް މުޅި މެޗުގައި ލިބުނު އެންމެ ރަނގަޅު ފުރުސަތުގައި، ފަހު ހާފުގައި ކުޅެން ނިކުތް އާމީނިއާގެ ވިންގް ހެންރިކް މިޚިތާރްޔާން ފޮނުވާލި ބޯޅަ ދިޔައީ ހުރަސް ދަނޑިމަތިން ބޭރަށެވެ. އޭގެފަހުން އެ ޓީމުގެ ކެޕްޓަން ލަޓާރޯ މާޓިނޭޒް ފޮނުވާލި ބޯޅަ ސިޓީގެ ކީޕަރު އެޑަސަން ވަނީ މަތަކޮށްފައެވެ.
މީގެ އިތުރުން ސެލްޓިކްގެ ދަނޑުގައި ރޭ ކުޅުނު މެޗުގައި އެ ޓީމުން ލީޑު ނެގީ 17 ވަނަ މިނެޓުގައި ލިއާމް ސްކޭލްސް ކާމިޔާބުކުރި ލަނޑުންނެވެ. އަދި ދެވަނަ ހާފުގެ ކުޅުން ފެށިގެން ދެވަނަ މިނެޓުގެ ތެރޭގައި ކްޔޯގޯ ފުރުހާޝީ ވަނީ ނަތީޖާ 2-0 އަށް ބަދަލުކޮށްލާފައެވެ. އޭގެފަހުން މެޗުގެ 56 ވަނަ މިނެޓުގައި ލިބުނު ޕެނަލްޓީއަކުން ސެލްޓިކްގެ ތިންވަނަ ލަނޑު ޖަހައިދިނީ އާނޭ އެންޖެލްސްއެވެ.
ބްރަޓިސްލާވާ އިން ޖެހި ހަމައެކަނި ލަނޑު މެޗުގެ 61 ވަނަ މިނެޓުގައި ކެވިން ވިމާ ކާމިޔާބުކޮށްދިންއިރު، މެޗުގެ 70 ވަނަ މިނެޓުގައި ޖަޕާނުގެ ޑައިޒެން މައޭޑާ ވަނީ ސެލްޓިކަށް އަލުން ތިން ލަނޑުގެ ލީޑެއް ނަގައިދީފައެވެ. އަދި އޭގެފަހުން މެޗު ނިމެން ހަތަރު މިނެޓަށް ވެފައިވަނިކޮށް ސެލްޓިކްގެ ފަސްވަނަ ލަނޑު ޖަހައިދިނީ އެޑަމް އީޑާއެވެ.
މި މުބާރާތުގައި ރޭ ކުޅުނު އަނެއް މެޗުގައި އިޓަލީގެ ބޮލޯނިއާ ވަނީ އަމިއްލަ ދަނޑުގައި ލަނޑެއް ނުޖެހި ޔޫކްރެއިންގެ ޝަޚްތަރު ޑޮނެސްކާ އެއްވަރުވެފައެވެ. މި މެޗު ފެށިގެން ހަތަރުވަނަ މިނެޓުގައި ޝަޚުތަރަށް ލީޑު ނަގައިދޭން ރަނުގެ ފުރުސަތެއް ލިބި ވަނީ ބޭކާރުވެފައެވެ. އެގޮތުން އެ ޓީމުގެ މިޑްފީލްޑަރު ޖިއޯޖީ ސުޑަކޯވް ފޮނުވާލި ޕެނަލްޓީ، ބޮލޯނިއާގެ ކީޕަރު ވަނީ މަތަކޮށްފައެވެ.