ކާވާ ވިމެންސް ވޮލީބޯލް ކުލަބު ޗެމްޕިއަންޝިޕް: ޑިއަމެޑް ބަލިކޮށް ޕޮލިސް ކުލަބަށް ރަނގަޅު ފެށުމެއް

ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ކުލަބު ޗެމްޕިއަންޝިޕް 2024 ގައި ރާއްޖޭގެ ޕޮލިސް ކުލަބުން ކުޅުނު ފުރަތަމަ މެޗުގައި ފަސޭހަކަމާއެކު ތަޖިކިސްތާންގެ ވޮލީބޯލް ކުލަބު ޑިއަމެޑް ބަލިކޮށްފިއެވެ.

މި މަހުގެ 21 ވަނަ ދުވަހުގެ ނިޔަލަށް ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ މި މުބާރާތުގައި ފަސް ގައުމަކުން ހަ ކުލަބު ވާދަކުރެއެވެ. އެއީ ރާއްޖޭގެ ޕޮލިސް ކުލަބާއި ކުލަބު ވެމްކޯގެ އިތުރުން ނޭޕާލުގެ ޕޮލިސް ކުލަބާއި، ސްރީ ލަންކާގެ އެއަރ ފޯސް އާއި، އުޒްބެކިސްތާންގެ ހުމޯ ވޮލީބޯލް ކުލަބު އަދި ތަޖިކިސްތާންގެ ވޮލީބޯލް ކުލަބު ޑިއަމެޑް އެވެ.

މިރޭ ކުޅުނު މެޗުން ރާއްޖޭގެ ޕޮލިސް ކުލަބު މޮޅުވީ ޑިއަމެޑް އަތުން ސީދާ ތިން ސެޓުންނެވެ. މި މެޗުގެ ސެޓުތައް ޕޮލިސް ކުލަބުން ގެންދިޔައީ 25-16، 25-14 އަދި 25-19 އިންނެވެ.

މި މެޗުން ޕޮލިސް ކުލަބު މޮޅުވިއިރު، މި މުބާރާތުގައި މިއަދު މެންދުރުފަހު ކުޅުނު މެޗުން ރާއްޖޭގެ ވެމްކޯ ވަނީ ފަހަތުން އަރައި 3-1 ސެޓުން ލަންކާގެ އެއަރ ފޯސް ބަލިކޮށްފައެވެ.

މި މުބާރާތް ރޭވިފައިވާ ގޮތުން ލީގު ބުރުގައި ކޮންމެ ޓީމެއް ކޮންމެ ޓީމަކާ ބައްދަލުކުރާއިރު، އެއްވަނަ އާއި ދެވަނަ ހޯދާ ޓީމުތައް ފައިނަލަށް ދަތުރުކުރާނެއެވެ. އަދި ތިންވަނަ އާއި ހަތަރުވަނައިގެ މެދުގައި ލޯ މެޑެލް މެޗު ކުޅޭއިރު، ފަސްވަނަ އާއި ހަވަނައިގެ މެދުގައި ރޭންކިން މެޗެއް ކުޅޭނެއެވެ.

ކާވާ ވިމެންސް ވޮލީބޯލް ކުލަބު ޗެމްޕިއަންޝިޕުގެ ކުޅުން މިއަދު ފެށިއިރު، މުބާރާތް ހުޅުވުމުގެ ރަސްމިއްޔާތު މިރޭ ވަނީ ބާއްވާފައެވެ. މި ރަސްމިއްޔާތުގައި ވަނީ ޗެމްޕިއަން ޓީމަށް ދޭ ޓްރޮފީ ދައްކާލާފައެވެ.