ކާވާ ވިމެންސް ވޮލީބޯލް ކުލަބު ޗެމްޕިއަންޝިޕް: ރާއްޖޭގެ ވެމްކޯ އާއި ނޭޕާލުގެ ޕޮލިސް ކުލަބަށް ރަނގަޅު ފެށުމެއް

ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ކުލަބު ޗެމްޕިއަންޝިޕް 2024 ގައި ކުޅުނު ފުރަތަމަ މެޗުތަކުން މޮޅުވެ، ރާއްޖޭގެ ކުލަބު ވެމްކޯ އާއި ނޭޕާލުގެ ޕޮލިސް ކުލަބުން ފެށުން ރަނގަޅުކޮށްފިއެވެ.

މި މަހުގެ 21 ވަނަ ދުވަހުގެ ނިޔަލަށް ޒުވާނުންގެ މަރުކަޒުގެ އެތެރޭ ކޯޓުގައި ކުރިއަށްދާ މި މުބާރާތުގައި ފަސް ގައުމަކުން ހަ ކުލަބު ވާދަކުރެއެވެ. އެއީ ރާއްޖޭގެ ވެމްކޯ އާއި ޕޮލިސް ކުލަބުގެ އިތުރުން ނޭޕާލުގެ ޕޮލިސް ކުލަބާއި، ސްރީ ލަންކާގެ އެއަރ ފޯސް އާއި، އުޒްބެކިސްތާންގެ ހުމޯ ވޮލީބޯލް ކުލަބު އަދި ތަޖިކިސްތާންގެ ވޮލީބޯލް ކުލަބު ޑިއަމެޑް އެވެ.

މުބާރާތުގެ ކުޅުން މިއަދު މެންދުރުފަހު ފެށިއިރު، ފުރަތަމަ މެޗުގައި ރާއްޖޭގެ ވެމްކޯ އިން ވަނީ ފަހަތުން އަރައި 3-1 ސެޓުން ލަންކާގެ އެއަރ ފޯސް ބަލިކޮށްފައެވެ. މި މެޗުގެ ފުރަތަމަ ސެޓު 25-20 އިން ލަންކާގެ އެއަރ ފޯސް އިން ގެންދިޔަ ނަމަވެސް، ވެމްކޯއިން ވަނީ ކުޅުން ރަނގަޅުކޮށް އަނެއް ތިން ސެޓު ކާމިޔާބުކޮށްފައެވެ. އެގޮތުން މި ސެޓުތައް ވެމްކޯއިން ގެންގޮސްފައިވަނީ 23-25، 15-25 އަދި 19-25 އިންނެވެ.

މީގެ އިތުރުން މި މުބާރާތުގައި މިއަދު ހަވީރު ކުޅުނު މެޗުން ނޭޕާލުގެ ޕޮލިސް ކުލަބު ވަނީ ފަސޭހަކަމާއެކު ސީދާ ތިން ސެޓުން އުޒްބެކިސްތާނުގެ ހުމޯ ބަލިކޮށްފައެވެ. މި މެޗުގެ ސެޓުތައް ނޭޕާލުގެ ޕޮލިސް ކުލަބުން ގެންދިޔައީ 25-19، 27-25 އަދި 25-19 އިންނެވެ.

މި މުބާރާތް ރޭވިފައިވާ ގޮތުން ލީގު ބުރުގައި ކޮންމެ ޓީމެއް ކޮންމެ ޓީމަކާ ބައްދަލުކުރާއިރު، އެއްވަނަ އާއި ދެވަނަ ހޯދާ ޓީމުތައް ފައިނަލަށް ދަތުރުކުރާނެއެވެ. އަދި ތިންވަނަ އާއި ހަތަރުވަނައިގެ މެދުގައި ލޯ މެޑެލް މެޗު ކުޅޭއިރު، ފަސްވަނަ އާއި ހަވަނައިގެ މެދުގައި ރޭންކިން މެޗެއް ކުޅޭނެއެވެ.