ކުރިއަށް އޮތް އޭއެފްސީ ޗެލެންޖް ލީގަށް ސްކޮޑް ވަރުގަދަ ކުރުމުގެ ގޮތުން ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ބިދޭސީ އައު ކުޅުންތެރިންގެ ސޮއި ހޯދައިފިއެވެ.
މާޒިޔާއިން ބިދޭސީ އައު ކުޅުންތެރިންގެ ސޮއި ހޯދަމުން އަންނައިރު، އެ ކުލަބުން އިއްޔެ ވަނީ އޮސްޓްރޭލިއާގެ ދެ ކުޅުންތެރިންނާއި ކްރޮއޭޝިއާ ކުޅުންތެރިއެއް އެ ޓީމާ ގުޅުނުކަން ހާމަކޮށްފައެވެ. މާޒިޔާ އިން ގެނައި ބިދޭސީ ކުޅުންތެރިންނަކީ އޮސްޓްރޭލިއާގެ އާރޯން އީވަންސް އާއި، އެ ގައުމުގެ ނިކޮލަސް އޮލްސެން އަދި ކްރޮއޭޝިއާގެ މާރިއޯ ޒެބިޗްއެވެ.
މީގެ ތެރެއިން އާރޯން ވަނީ ހޮންގް ކޮންގާއި، ތައިލެންޑާއި، އިންޑޮނޭޝިއާ އާއި، އިންޑިއާ އަދި ބަންގްލަދޭޝްގެ ކުލަބުތަކަށް ކުޅެފައެވެ. އަދި މީގެ ކުރިން އާރޯން ވަނީ އިންޑިއަން ސުޕަ ލީގުގައިވެސް ކުޅެފައެވެ. ދެން މާޒިޔާއާ ގުޅުނު އޮލްސެން ވަނީ އޮސްޓްރޭލިއާ އާއި، ކުވައިތު އަދި ވިއެޓްނާމްގެ ޓީމުތަކަށް ކުޅެފައެވެ. މީގެ އިތުރުން ޒެބިޗް ވަނީ މީގެ ކުރިން ކްރޮއޭޝިއާ އާއި, ޕޯލަންޑާއި, ޖަރުމަނާއި, ރޯމޭނިއާގެ އިތުރުން ވިއެޓްނާމްގެ ޓީމުތަކަށް ކުޅެފައެވެ.
ކުރިއަށް އޮތް އޭއެފްސީ ޗެލެންޖް ލީގަށް ތައްޔާރުވުމުގެ ގޮތުން މާޒިޔާއިން ފަރިތަކުރުންތައް ކުރިއަށްގެންދަމުން އަންނައިރު، އެ ޓީމުން ވަނީ އައު ކޯޗުގެ މަގާމަށް ސާބިއާއަށް ނިސްބަތްވާ ޑްރަގަން ޑުކަނޯވިޗް ހަަމަޖައްސާފައެވެ. އަދި ޗެލެންޖް ލީގަށް ސްކޮޑު ވަރުގަދަ ކުރުމުގެ ގޮތުން މާޒިޔާއިން ވަނީ ޒުވާން މިޑްފީލްޑަރު އަޙްމަދު އައިހަމްގެ ސޮއި ހޯދާފައެވެ. އަދި އުމުރުން 15 އަހަރުގެ އުއްމީދީ ތަރި މުޙައްމަދު އިލާން އިމްރާންވެސް ވަނީ އެ ޓީމާ ގުޅިފައެވެ.
އަންނަ އޮކްޓޯބަރު މަހުގެ ފަހުކޮޅު ޗެލެންޖް ލީގު ބާއްވާއިރު، އެ ލީގުގައި ރާއްޖޭގެ ޗެމްޕިއަން މާޒިޔާއާ އެއް ގްރޫޕެއްގައި ހިމެނެނީ ކުވެއިތުގެ އަލް އަރަބީ ސްޕޯޓްސް ކުލަބާއި، ތުރުކުމެނިސްތާންގެ އެފްސީ އަކްރަޑަގް އަދި ކިރްގިސްތާން އެފްސީ އަބްދީޝް އާޓާއެވެ. ސެންޓްރަލައިޒްކޮށް މި މުބާރާތް ބޭއްވުމަށް ހަމަޖެހިފައިވަނީ ކުވެއިތުގައެވެ.