"ރޯދައާއި ޞިއްޙަތު" ގެ ނަމުގައި މާދަމާ ހެލްތު ޕްރޮޓެކްޝަން އޭޖެންސީން ކުރިޔަށްގެންދިއުމަށް ހަމަޖެހިފައިވާ، ޚާއްޞަ އިންސްޕެކްޝަނުގައި، ކާބޯތަކެތީގެ ޚިދްމަތް ދިނުމުގައި ހުންނަން ޖެހޭ ސާފުތާހިރުކަމުގެ މިންގަނޑު ބަޔާން ކުރާ ޤަވާއިދަށް ނުފެތޭ ތަންތަނާމެދު ފިޔަވަޅު އަޅުއްވާނެ ކަމަށް ހެލްތް ޕްރޮޓެކްޝަން އެޖެންސީން ވިދާޅުވެއްޖެއެވެ.
ބަރަކާތްތެރި ރަމްޟާން މަހަކީ އެހެން މަސްތަކާއި އަޅާބަލާއިރު، ކާބޯތަކެތީގެ ބާވަތްތައް ބޭނުންކުރާ މިންވަރު އިތުރުވާ މަހެކެވެ. އަދި ހަމަ އެއާއި އެކު ކާބޯތަކެތީގެ ޚިދްމަތްދޭ ތަންތަނުން ޚިދްމަތް ހޯދާ މިންވަރުވެސް އިތުުރުވާމަހެކެވެ. އެހެންކަމުން މިފަދަ ޚިދްމަތްދޭ ތަންތަނަކީ އާއްމު ޞިއްޙަތު ،ނުވަތަ ސާފުތާހިރުކަމުގެ މިންގަނޑު ދަމަހައްޓާ ތަންތަންތޯ ބެއްލެވުމަށް ހެލްތު ޕްރޮޓެކްޝަން އޮތޯރިޓީން ކޮންމެ އަހަރަކުވެސް ރަމަޟާންމަހާ ދިމާކޮށް ޚާއްޞަ އިންސްޕެކްޝަންތައް ހިންގަވައެވެ.
އެޗް.ޕީ.އޭއިން ވިދާޅުވީ،މި ޕްރޮގްރާމްގެ ދަށުން ކާބޯތަކެތީގެ ޚިދްމަތްދޭ ތަންތަން ބަލާ ފާސް ކުރުމުގެ އިތުރުން، ޚިދްމަތްދޭ ފަރާތްތަކަށާއި އާއްމުންނަށް ހޭލުންތެރި ކުރުވުމުގެ މެސެޖްތައްވެސް ދެއްވުމަށް ހަމަޖެހިފައިވާކަމަށެވެ. ކާބޯތަކެތީގެ ޚިދްމަތް ދިނުމުގައި ހުންނަންޖެހޭ ސާފުތާހިރު ކަމުގެ މިންގަނޑު ބަޔާން ކުރާ ޤަވާއިދުގެ ދަށުން، މި ޚިދްމަތްދޭ ތަންތަން އިންސްޕެކްޓްކުރުމަށް ކުރިޔަށްގެންދަވާ ޕްރޮގްރާމްގައި މާލެއާއި، ހުޅުމާލެ، ވިލާމާލެ، އަދި ތިލަފުށި ހިމެނޭ ގޮތައް ކާބޯތަކެތީގެ ޚިދްމަތްދޭ 485 ތަނެއް ބަލާ ފާސްކުރުމަށް ވަނީ ހަމަޖެހިފައެވެ.
މާލޭ ޞަރަޙައްދުގައި މިކަން ކުރިޔަށްގެންދަނީ ހެލްތު އޭޖެންސީގެ މުވައްޒަފުން ޓީމްތަަކަށް ބައްސަވާލައްވައިގެންނެވެ. އަދި އަތޮޅުތެރޭގައި ޕަބްލިކް ހެލްތު ޔުނިޓުތަކާއި، ޞިއްޙި މަރުކަޒުތަކުން ޙަރަކާތްތެރިވާނެ ކަމަށް އެޗް.ޕީ.އޭއިން މަޢްލޫމާތު ދެއްވައެވެ. މާދަމާގެ އިންސްޕެކްޝަނުގައި ކާބޯތަކެތީގެ ޚިދްމަތް ދިނުމުގައި ހުންނަން ޖެހޭ ސާފުތާހިރު ކަމުގެ މިންގަނޑުނެތް ތަންތަނާއި އެޗް.ޕީ.އޭގެ ހުއްދަ ނެތި ހިންގާ ތަންތަން ޖޫރިމަނާ ކުރައްވާ ބަންދު ކުރައްވާނެ ކަމަށް އެއޭޖެންސީއިން ވިދާޅުވެއެވެ.
ހެލްތު ޕްރޮޓެކްޝަން އޭޖެންސީން ވިދާޅުވީ ރަމަޟާން މަސް ފެށުމުގެ ކުރިން މިފަދަ ތަންތަން ޗެކްކުރައްވާ އިޞްލާހްކުރަން ޖެހޭ ކަންކަން ރަނގަޅު ކުރުމަށް ފުރުޞަތު ދެއްވާނެ ކަމަށެވެ. އަދި އަމާޒަކީ ޢާއްމުންނަށްދޭ ޚިދްމަތަކީ އެކަށީގެންވާ އާއްމު ޞިއްޙީ މިންގަނޑަށް ފެތޭ އަދި އޭގެ ސަަބަބުން އާއްމުންނަށް ސީދާ ގޮތުންނާއި ނުސީދާގޮތުން ނުރަނގަޅު އަސަރު ކުޑަކޮށް އެފަދަ އަމަލުތައް ހުއްޓުވުން ކަމަށެވެ.