އިނގިރޭސި ޕްރިމިއަރ ލީގުގައި ރޭ ނޯވޭގެ ފޯވާޑް އާލިން ބްރައުޓް ހާލަންޑް ކާމިޔާބުކުރި ދެ ލަނޑާއެކު، ބްރެންޓްފަޑް އަތުން 1-2 ގެ ނަތީޖާއަކުން މޮޅުވެ މެންޗެސްޓާ ސިޓީން ސައްތައިން ސައްތައިގެ ރިކޯޑު ދަމަހައްޓައިފިއެވެ.
މި ނަތީޖާއާއެކު ސިޓީ އޮތީ މިހާތަނަށް ކުޅުނު ހަތަރު މެޗުން ލިބުނު 12 ޕޮއިންޓާއެކު އެއްވަނައިގައެވެ. އޭގެ ތިން ޕޮއިންޓް ފަހަތުން ދެވަނައިގައި ލިވަޕޫލް އޮތްއިރު، ތިނެއްގައި އޮތް އެސްޓަން ވިލާ އަށް ވެސް މިއަދަދަށް ޕޮއިންޓް ލިބިފައިވެއެވެ. ލިވަޕޫލަށް ކުރިލިބެނީ ފައިދާގޯލްގެ ތަފާތުންނެވެ. ހަތަރުވަނައިގައި ބްރައިޓަން އޮތީ ހަތަރު މެޗުން 8 ޕޮއިންޓް ހަމަކޮށްގެންނެވެ.
އިއްތިހާދު ސްޓޭޑިއަމްގައި ރޭ ކުޅުނު މި މެޗު ފެށިގެން 22 ވަރަކަށް ސިކުންތުގެ ތެރޭގައި ބްރެންޓްފޯޑުން ވަނީ ލީޑްނަގައިފައެވެ. އެ ޓީމުގެ ކީން ލުވިސް-ޕޮޓާ ބޮލުން ޖައްސާލި ބޯޅައެއް ސިޓީގެ ޖޯން ސްޓޯން އާއި ގޯލްކީޕަރު، އެޑަސަން މޮރައެސް ދިފާއުކުރަން އުޅުމުގެ ތެރޭގައި ހެދުނު ގޯހެއްގެ ފައިދާނަގައި ޔޮއާން ވިސާ ކާމިޔާބުކުރި ގޯލެކެވެ. މިއީ މި ފަހަރުގެ ސީޒަނުގެ އެންމެ އަވަސް ގޯލެވެ.
ބްރެންޓްފޯޑްގެ ގޯލަށްފަހު، މެޗުގެ 19 ވަނަ މިނެޓުގައި ހާލަންޑް ވަނީ ސިޓީ ހަމައަކަށް އަޅުވައިދީ އެއްވަރުކޮށްފައެވެ. ޕެނަލްޓީއޭރިޔާތެރެއިން ސިޓީގެ މިޑްފީލްޑަރު، ކެވިން ޑި ބްރޭނާ އަށް ބްރެންޓްފޯޑްގެ ކުޅުންތެރިއަކު ޓެކުލްކުރުމުން ގެއްލުނު ބޯޅަ ހޯދައި، ހާލަންޑް ވަނީ ގޯލްގެ ތެރެއަށް ފޮނުވާލައިފައެވެ.
މެޗުގެ 32 ވަނަ މިނެޓުގައި ސިޓީގެ ކީޕަރު، އެޑަސަން ދިން ބޯޅައަކުން ހާލަންޑް ވަނީ ބްރެންޓްފޯޑްގެ ޑިފެންސްލައިންގެ ތެރެއިން ދެމިގަނެ، ސިޓީ އަށް ފުރަތަމަ ފަހަރަށް ލީޑްނަގައިދީފައެވެ. މި މެޗުގައި ހާލަންޑް ކުޅެފައިމިވަނީ، މިދިޔަ ހަފްތާގައި އޭނާގެ އާއިލާގެ ގާތް ރައްޓެއްސެއް ނިޔާވުމުން ނުކުޅެދާނެކަމަށް ބެލެވިފައިވަނިކޮށެވެ.
އޭގެފަހުން، ސިޓީގެ ލީޑް ފުޅާކޮށްދީ، ހާލަންޑްގެ ހެޓްރިކް ފުރިހަމަކުރަން ލިބުނު ފުރުޞަތުތަކުގެ ބޭނުމެއްނުހިފުނެވެ. ހާލަންޑް ފޮނުވާލި ހަމަލާތަކުގެ ތެރެއިން އެއްހަމަލާ ބްރެންޓްފޯޑްގެ ކީޕަރު، މާކް ފްލެކެން މަތަކުރިއިރު، ފަހުން ފޮނުވާލި ބޯޅަ އަމާޒުވީ ގޯލްގެ ދަނޑިއަށެވެ. އަދި އެ ބޯޅަ ދެވަނަ ފަހަރަށް ފޮނުވާލަން ކުރި މަސައްކަތުގައި އެންމެ ރަނގަޅަށް ފޮނުވާލެވޭގޮތެއް ނުވިއެވެ.
އިނގިރޭސިވިލާތުގެ ފުރަތަމަ ޑިވިޝަނުގައި ޖެހިޖެހިގެން ތިން މެޗުގައި ހެޓްރިކް ހަދާ ފަސްވަނަ ކުޅުންތެރިޔާ އަށް ވުމުގެ އިތުރުން، 1946 ވަނަ އަހަރުގެ ފަހުން އެ ޝަރަފު ހޯދާ ފުރަތަމަ ކުޅުންތެރިޔާގެ ރެކޯޑް ހެދުމަށް ކުރި މަސައްކަތް ހާލަންޑަށް ކާމިޔާބުނުކުރެވުނުނަމަވެސް، އޭނާ ވަނީ މި މެޗުގައި ޖެހި ލަނޑުތަކާއެކު ސިޓީ އަށް ކުޅުނު 103 މެޗުގައި 99 ގޯލް ހަމަކޮށްފައެވެ.
އަދި ހާލަންޑް އަކީ ޕްރިމިއާ ލީގުގެ ފުރަތަމަ ހަތަރު މެޗުގައި އެންމެ ގިނަ ލަނޑުޖެހި ކުޅުންތެރިޔާ އެވެ. ފުރަތަމަ ހަތަރު މެޗުގައި އަށް ލަނޑުޖަހައިގެން ކުރީން މިރެކޯޑް އޮތް މެންޗެސްޓާ ޔުނައިޓެޑްގެ ވޭން ރޫނީގެ ރެކޯޑް ހާލަންޑް މުގުރާލީ ނުވަ ލަނޑުޖަހައިގެންނެވެ.