އިނގިރޭސި ޕްރިމިއަރ ލީގުގައި މިރޭ ރަށުން ބޭރގައި 1-0 ގެ ނަތީޖާއަކުން ލިވަޕޫލް ބަލިކޮށް، ނޮޓިންހަމް ފޮރެސްޓުން ތާރީޚީ މޮޅެއް ހޯދައިފިއެވެ.
މިއީ 1969 އަހަރުގެ ފަހުން އެންފީލްޑްގައި ލިވަޕޫލް އަތުން ފޮރެސްޓް މޮޅުވި ފުރަތަމަ ފަހަރެވެ. އަނެއްކޮޅުން، މިއީ ލިވަޕޫލްގެ އައު ކޯޗު، އާނޭ ސްލޮޓްގެ އިރުޝާދުގެ ދަށުން އެ ޓީމު ބަލިވި ފުރަތަމަ ފަހަރެވެ.
މި މެޗު ފަށައިގެން ލިވަޕޫލުން ޑޮމިނޭޓްކުރަމުންދިޔަ ނަމަވެސް، ފޮރެސްޓުން ވަނީ އެ ޓީމުގެ އެޓޭކްތައް ހުއްޓުވައިފައެވެ. ފުރަތަމަ ހާފުގައި ލިވަޕޫލަށް ލަނޑެއްޖަހައިދޭން ލިބުނު އެންމެ ރަނގަޅު ފުރުޞަތުގައި މެޗުގެ 17 ވަނަ މިނެޓުގައި ލިވަޕޫލްގެ ކޮލަމްބިއާ ވިންގް، ލުއިސް ޑިއާޒް ފޮނުވާލި ބޯޅަ އަމާޒުވީ ގޯލްގެ ދަނޑިއަށެވެ.
މި މެޗުން ރަނގަޅު ނަތީޖާއެއް ހޯދުމަށް ފޮރެސްޓްގެ ކޯޗު، ނޫނޯ އެސްޕިރިޓޯ ސަންޓޯގެ ރޭވުންތެރިކަމުގެ ތެރެއިން އެންމެ ބޮޑު އިސްކަމެއްދިނީ މެދުތެރޭގައި ކުޅުންތެރިން ގިނަކޮށް، ލިވަޕޫލްގެ އެޓޭކްތައް ހުއްޓުވުމަށް ގިނަ މަސައްކަތްތަކެއް ކުރުމެވެ. އޭގެނަތީޖާއެއްގެ ގޮތުން، ލިވަޕޫލަށް މާބޮޑު ނުރައްކަލެއް ފޮރެސްޓްގެ ޑިފެންސަށް ކުރިމަތިނުކުރެވުނެވެ.
މި ހާފުގައި ލިވަޕޫލްގެ މިޑްފީލްޑަރު، އެލެކްސިސް މެކްއެލިސްޓާ ފޮނުވާލި ހަމަލާއެއް ފޮރެސްޓްގެ ގޯލްކީޕަރު، މެޓްޒް ސެލްސް ހުއްޓުވިއިރު، ޑިއާޒް ފޮނުވާލި ބޯޅަ ވެސް ގޯލަށް ވަނަނުދީ އޭނާ ވަނީ ސަލާމަތްކޮށްފައެވެ.
މުޅި މެޗުގައިވެސް ފެނިގެންދިޔަ ހަމައެކަނި ލަނޑު، 72 ވަނަ މިނެޓުގައި ފޮރެސްޓަށް ކާމިޔާބުކޮށްދިނީ ކެލުމް ހަޑްސަން-އޮޑޯއީ އެވެ. މި ލަނޑުޖެހުމަށް އެހީތެރިވެދިނީ އެންތަނީ އެލަންގާ އެވެ. މި ދެ ކުޅުންތެރިންވެސް ކުޅެން ނިކުތީ ފަހު ހާފުގައެވެ.
މި މެޗުން ހޯދީ މޮޅާއެކު ފޮރެސްޓް ވަނީ ހަތަރު މެޗުން 8 ޕޮއިންޓް ހަމަކޮށް ހަތަރުވަނަ އަށް ޖެހިލައިފައެވެ. ލިވަޕޫލް އޮތީ ހަތަރު މެޗުން ލިބުނު 9 ޕޮއިންޓާއެކު ދެވަނައިގައެވެ. އެންމެ ކުރީގައި އޮތް މެންޗެސްޓާ ސިޓީ އަށް ހަތަރު މެޗުން ލިބިފައިވަނީ 12 ޕޮއިންޓެވެ.
ލިވަޕޫލުން ދެން ކުޅޭ މެޗުގައި ޔުއެފާ ޗެމްޕިއަންސް ލީގުގައި މި މަހުގެ 18 ވާ ބުދަ ދުވަހު ނިކުންނާނީ ރަށުން ބޭރުގައި އޭސީ މިލާނާ ދެކޮޅަށެވެ.