ފޯނެއް ވަގަށް ނެގި މައްސަލައިގައި މީހަކު ހައްޔަރުކޮށްފި

ބިދޭސީއެއްގެ ފޯނެއް ވަގަށް ނަގާ ވިއްކާލި މައްސަލައިގައި މީހަކު ހައްޔަރުކޮށްފިއެވެ.

މި މައްސަލާގައި ހައްޔާރުކޮށްފައިވަނީ ތ. ގުރައިދޫ / ޒަމީން އުމުރުން 26 އަހަރުގެ މުޙައްމަދު ވިޝާމެވެ.

ދިވެހި ފުލުހުން ޚިދުމަތުން ވިދާޅުވީ، ރޭ 18:30 ހާއިރު ރަށްފުސްގޯޅި ފުޝިއަން މާރޓް ކައިރީ ފުލުހުން ހަރަކާތްތެރިވަމުން ދަނިކޮށް ބިދޭސީ ފިރިހެނަކު އޭނާ ދިރިއުޅޭ ގެސްޓް ހައުސްގައި ނިދާފައި އޮއްވާ ފޯނެއް ވަގަށް ނެގިކަމަށް ބުނެ މައްސަލައެއް ހުށައެޅިކަމަށެވެ. އަދި އެ މައްސަލައާ ގުޅިގެން އެ ބިދޭސީ މީހާ އުޅޭ ގެސްޓްހައުސްގެ ސީސީޓީވީ ފޫޓޭޖް ބަލާ ފޯނު ވަގަށް ނެގި މީހާ ދެނެގަތްކަމަށް ފުލުހުން ވިދާޅުވިއެވެ.

މި މައްސަލައިގައި ރޭ 21:00 ހާއިރު އޯކިޑް މަގު ފަތަހަ ސްޓަރ ކައިރިން ފޯނު ވަގަށް ނެގިކަމަށް ތުހުމަތުކުރެވޭ މީހާ ހުއްޓުވާ ސުވާލުކުރުމުން ނޯތު ހާބަރުގައި އޮތް ސްޕީޑް ބޯޓެއްގައި ހުރި ބިދޭސިއަކަށް ވިއްކާލިކަމަށް ބުނެފައިވާކަމަށެވެ. އަދި ފޯނު ވިއްކާލި މީހާއަތުން ފޯނު ފެނިފައިވާކަމަށް ފުލުހުން ވިދާޅުވިއެވެ.

މި މައްސަލަ ފުލުހުން އަންނަނީ އިތުރަށް ތަޙުޤީޤުކުރަމުންނެވެ.