ތަސްލީމް ހޯދުމަށް އިންޓަޕޯލްގެ އެހީތެރިކަން ހޯދަނީ

ކ. ހުވަފެންފުށި ދެކުނުން ހިއްކާފައި އޮންނަ، ފަސްގަނޑަށް ދަތުރު ގޮސް އުޅެނިކޮށް ގެއްލުނު އުމުރުން 43 އަހަރުގެ މުހައްމަދު ތަސްލީމް ހޯދުމަށް އިންޓަޕޯލް ޔެލޯ ނޯޓިސްއަކަށް އެދެފިއެވެ.

މ. އަސަރީހަނދާން، ތަސްލީމް މުޙައްމަދު ގެއްލިގެން ހޯދަން ފެށީ މިދިޔަމަހުގެ 31 ވަނަ ދުވަހުގައެވެ.

މިހާދިސާއާ ގުޅިގެން ފުލުހުން ނެރުނު ނޫސްބަޔާނުގައި ވިދާޅުވީ ތަސްލީމް ހޯދުމަށްޓަކައި މެރިން ޕޮލިސްއާއި ފުލުހުންނާއި ކޯސްޓްގާޑުގެ ޑައިވް ޓީމްތަކުން އެ ފަސްގަނޑު ހިމެނޭ މޫދު ސަރަޙައްދު ބަލާފައިވާކަމަށެވެ. އެގޮތުން ޖުމުލަ 943،998 އަކަ ކިލޯމީޓަރުގެ ސަރަހައްދެއް ޑައިވްކޮށްގެން ބަލާފައިވާކަމަށް ފުލުހުން ވިދާޅުވިއެވެ.

ފުލުހުން ވިދާޅުވީ މި މައްސަލައިގެ ތަހުޤީގަށް ލިބިފައިވާ މަޢުލޫމާތުން އެނގޭގޮތުގައި ހުވަފެންފުށި ކައިރީގައި އޮތް ފަސްގަނޑަށް ދަތުރު ދިއުމަށް ތަސްލީމް ފުރާފައިވަނީ މިދިޔަ މަހުގެ 29 ވަނަ ދުވަހު 17:00 އާއި 17:30 ދެމެދު މާލޭގެ ދެކުނު ފަރާތު ބަނދަރުންނެވެ. އަދި މި ދަތުރުގައި ތަސްލީމް ހިމެނޭހެން 25 މީހުންނާއި 2 ކުޑަކުދިން ގޮސްފައިވާކަމަށް ތަޙްޤީގަށް އެނގިފައިވާކަމަށް ފުލުހުން ވިދާޅުވެއެވެ. މި ދަތުރު ގޮސްފައިވަނީ މީހެއްގެ އުފަންދުވަސް ފާހަގަކުރުމަށާއި އެންގޭޖްމަންޓް ޕާޓީއެއް ބޭއްވުމަށްކަމަށެވެ. އަދި މި ދަތުރުގައި ތަސްލީމް ބައިވެރިވެފައިވަނީ ދަތުރު ރޭވި މީހުންގެ ރައްޓެހި ރަހުމަތްތެރިކަމުގައި ޕާޓީއަށް ތައްޔާރުކުރާ ބެކްޑްރޮޕް އަދި ލައިޓިންގެ ކަރަންޓުގެ މަސައްކަތް ކުރުމަށްކަމަށް ތަޙްޤީގަށް އެނގިފައިވާކަމަށް ފުލުހުން ވިދާޅުވެއެވެ.

ފުލުހުން ވިދާޅުވީ ތަސްލީމް ހިމެނޭ ޤުރޫޕް ދަތުރު ދިޔައިރު އެތަނުގައި އިތުރު ބަޔަކު ތިބި ކަމަށާއި މިދިޔަ މަހުގެ 29 ވަނަ ދުވަހު ރޭގަނޑު 00:00އާ ހަމައަށް ތަސްލީމް އެދަތުރުގެ ބައިވެރިންނާއެކު ހަރަކާތްތެރިވެފައިވާކަމަށެވެ. އަދި އޭގެ ފަހުންވެސް ފަސްގަނޑުގައި ޓެންޓް ޖަހާފައި ހުރި ސަރަހައްދުގައި އޭނާ ނިދާފައި އޮތްކަމަށް ތަޙްޤީގަށް ހާމަވާކަމަށް ފުލުހުން ވިދާޅުވިއެވެ.

ފުލުހުން ވިދާޅުވީ މިދިޔަ މަހުގެ 30 ވަނަ ދުވަހުގެ ހެނދު ވަގުތުތަކުގައިވެސް ތަސްލީމް ދަތުރުގެ ބައިވެރިންނާއެކު ހަރަކާތްތެރިވާ ފޮޓޯ އަދި ވީޑިއޯވެސް ފުލުހުންނަށް ލިބިފައިވާކަމަށެވެ. ނަމަވެސް އޭނާ އެންމެ ފަހުން ފެނިފައިވަނީ އެދުވަހުގެ ހެނދުނު 7:45 އާއި 9:00 ދެމެދުގައިކަމަށް ފުލުހުން ވިދާޅުވެއެވެ. އަދި އޭނާ އަވަހަށް މާލެ ދާން ބޭނުންވުމުން އެދުވަހު ހެނދުނު 10:00އާއި 11:00 އާ ދެމެދު ފުރި ލޯންޗުގައި ތަސްލީމް މާލެ ފޮނުވާލުމަށް ބެލިއިރު، އޭނާ ފެނިފައި ނުވާކަމަށް ފުލުހުން ވިދާޅުވިއެވެ. ފުލުހުން ވިދާޅުވީ އޭނާ އެހެން ލޯންޗެއްގައި މާލެ ދިޔަތޯވެސް ބެލިކަމަށާއި ނަމަވެސް އޭނާ މާލެ ގޮސްފައިނުވާކަން ތަހުގީގަށް ހާމަވެފައިވާކަމަށެވެ.

ތަސްލީމު ހޯދުމަށްޓަކައި އޭނާ އާއެކު ފިނޮޅަށް ދަތުރުދިޔަ މީހުންގެ އިތުރުން އެތަނަށް ދަތުރުދިޔަ އެހެން ގުރޫޕެއްގައި ހިމެނޭ 12 މީހުންނާވެސް ސުވާލު ކޮށްފައިވާކަމަށް ފުލުހުން ވިދާޅުވެއެވެ. އަދި، ތަހުގީގުގެ ބޭނުމަށް ތަސްލީމުގެ ފޯނާއި ލެޕްޓޮޕު ފުލުހުންގެ ބެލުމުގެ ދަށަށް ގެންގޮސް ތަހުލީލު ކުރަމުންދާކަމަށްވެސް ފުލުހުން ވިދާޅުވިއެވެ.

މީގެ އިތުރުން އެ ފަސްގަނޑަށް ދަތުރު ދިޔުމަށް ތަސްލީމު އާއި އިތުރު ބަޔަކު ބޭނުން ކުރި ދެ ލޯންޗު ބަލައި ފާސްކޮށްފައިވެއެވެ. އަދި މިހާރު ތަސްލީމް ހޯދުމަށް އިންޓަޕޯލް ޔެލޯ ނޯޓިސްއަށް އެދިފައިވާކަމަށް ފުލުހުން ވިދާޅުވިއެވެ.

ފުލުހުން ވިދާޅުވީ ތަސްލީމް ގެއްލުނު ހާދިސާއާ ގުޅިގެން ކުރަމުންދާ ތަހުގީގަށް ލިބެމުންދާ ކުރިއެރުން ތަސްލީމުގެ އާއިލާއާ ހިއްސާ ކުރަމުންދާ ކަމަށެވެ.