ސްޕޭނުގެ ރެއާލް މެޑްރިޑްގެ ފޯވަޑް ވިނީޝިއުސް ޖޫނިއާގެ ފޯމާއިމެދު ސުވާލެއް ނެތް ކަމަށާއި އޭނާގެ އަސްލު ކުޅުން ވަރަށް އަވަހަށް ފެނިގެންދާނެ ކަމަށް އެ ޓީމުގެ ކޯޗް ކާލޯ އަންޗެލޮޓީ ބުނެފި އެވެ.
ލަލީގާ ގައި މިރޭ ރެއާލް ސޮސިއެޑާޑް އާއި ދެކޮޅަށް ކުޅޭ މެޗުގެ ކުރިން ނޫސްވެރިންނާ ވާހަކަ ދައްކަމުން އަންޗެލޮޓީ ބުނެފައިވަނީ އާ ސީޒަން ފެށިގެން ވިނީޝިއުސްގެ އެންމެ ރަގަޅު ކްލަބުގައި ދެއްކިފައިނުވާއިރު, ދާދި ފަހުން ގައުމީ ޓީމުގައިވެސް ބްރެޒިލްގެ ފަރާތުން ދަށް ކުޅުމެއް ފެނިގެންދިޔައިރު, ވިނީޝިއުސްއަށް ފާޑުކިއުމުގެ ބަދަލުގައި ބޭނުންވަނީ އޭނާއަށް އެހީތެރިވުމަށް ކަމަށާއި އަދި އޭނާއަށް ފުރިހަމަ އިތުބާރު އެބައޮތް ކަމަށެވެ .
އަންޗެލޮޓީ އިތުރަށް ބުނެފައިވަނީ ވިނީޝިއުސް އަކީ އެ ކްލަބަށް މުހިންމު ކުޅުންތެރިއެއް ކަމަށާއި ރެއާލް މެޑްރިޑްއިން ދައްކަމުންދާ ކުޅުމާއި މެދު ހިތްހަމަ ޖެހޭއިރު ވަކި ކުޅުންތެރިއެއްގެ ވާހަކަ ދެއްކުމުގެ ބަދަލުގައި އޭނާއަށް ބޭނުންވަނީ ސަޕޯޓްދޭން ކަމަށެވެ.
ކުރިއަށް އޮތް ދެ ހަފްތާ ތެރޭގައި ގިނަ މެޗުތަކެއް ކުޅެން ޖެހޭއިރު ގައުމީ ޓީމުތަކަށް ދޫކުރި ކުޅުންތެރިންގެ ފިޓްނަސް އާއި މެދު ވިސްނަން ޖެހޭ ކަމަށާއި އެހެންކަމުން މިރޭގެ މެޗަށް ޓީމު ނެގުމުގައި އެކަމަށް ސަމާލުވާނެ ކަމަށްވެސް އަންޗެލޮޓީ ވަނީ ބުނެފަ އެވެ.
ލަލީގާ ގައި ރެއާލް މެޑްރިޑް އިން މިހާތަނަށް ހަތަރު މެޗު ކުޅެފައިވާއިރު އެ ޓީމަށް ލިބިފައިވަނި އަށް ޕޮއިންޓާއެކު ތާވަލުގެ ދެވަނައެވެ. އެއްވަނައިގައި އޮތީ ކުޅުނު ހަތަރު މެޗުވެސް ކާމިޔާބުކޮށް 12 ޕޮއިންޓާއެކު ބާސެލޯނާ އެވެ.