ފުލުހުންގެ ވާޖިބަށް ހުރަސްއަޅައި ފިލަން އުޅުނު މީހަކު ހައްޔަރުކޮށްފި

ވެހިކަލް ހުއްޓުވާ ބަލާ ފާސްކުރަން އުޅުމުން ފުލުހުންގެ ދައުރަށް ހުރަސްއަޅާ ފިލަން މަސައްކަތްކުރި މީހަކު، ބާރުގެ ބޭނުންކޮށްގެން ފުލުހުން ހައްޔަރުކޮށްފިއެވެ.

ފުލުހުން ބުނީ ރޭ ދަންވަރު ފުލުހުން މަގުމަތި ބެލެހެއްޓުމުގެ މަސައްކަތް ކުރަމުންދިޔައިރު، ބާރު ސްޕީޑްގައި ދުއްވާފައި ދިޔަ ކާރެއް ހުއްޓުވާ ބެލިއިރު، އެއީ މާލޭ ސަރަޙައްދުގައި ދުއްވުމަށް ރެޖިސްޓްރީކޮށްފައިވާ ކާރެއް ނޫންކަން ފާހަގަކުރެވުނުކަމަށެވެ. އެ ކާރަކީ ސީ-ޒޯންގައި ރެޖިސްޓްރީކޮށްފައިވާ ކާރެއްކަމަށާއި، ކާރު ދުއްވި ރ.އަލިފުށި، ސިތުރާ، ޢުމުރުން 38 އަހަރުގެ ޙަސަން ސަޢީދަކީ ކާރު ދުއްވުމުގެ ލައިސަންސްވެސް ނެތް މީހެއްކަމަށް ފުލުހުން ވިދާޅުވިއެވެ.

ފުލުހުން ވިދާޅުވީ، ލައިސަންސް ނެތި ކާރު ދުއްވުމާއި، ސައްޙަ ނޫން ނަންބަރު ޕްލޭޓް ކާރުގައި ހަރުކޮށްފަވާތީ ފުލުހުން އެ ކާރު ޓޯވކުރަން އުޅުމުން ފުލުހުންނަށް އެއްބާރުލުން ނުދީ އަދި ކާރުން ނުފައިބާނެކަމަށް ބުނެ ކާރު ތަޅުލާ ފުލުހުންގެ ދައުރު އަދާކުރުމަށް ހުރަސްއެޅިކަމަށެވެ. އަދި ކާރުން ނުފައިބާ ފިލަން މަސައްކަތްކުރުމުން ފުލުހުން ބާރުގެ ބޭނުންކޮށްގެން އެމީހާ ހައްޔަރުކޮށްފައިވާކަމަށް ފުލުހުން ވިދާޅުވިއެވެ.

މި މައްސަލަ ފުލުހުން ގެންދަނީ އިތުރަށް ތަޙުޤީޤުކުރަމުންނެވެ.