ސްޕެއިނުގެ މިޑްފީލްޑަރު ގަވީގެ ކަކުލަށް ލިބުނު އަނިޔާއަށްފަހު، ގާތްގަނޑަކަށް 10 މަސް ދުވަސް ފަހުން އެނބުރި ބާސެލޯނާގެ ފަރިތަކުރުންތަކުގައި ބައިވެރިވާން ފަށައިފިއެވެ.
އުމުރުން 20 އަހަރުގެ ގަވީ އަށް އަނިޔާވީ، މިދިޔަ އަހަރުގެ ނޮވެންބަރު މަހު ކުޅެވުނު ޔޫރޯ ކޮލިފައިންގައި ސްޕެއިނާ ޖޯޖިއާ ބައްދަލުކުރި މެޗުގައެވެ. އެއަށްފަހު، ކުރި އޮޕަރޭޝަނަށްފަހު ނިމިދިޔަ ސީޒަނުގެ ބާކިބައިގެ އިތުރުން އެންމެ ފަހުގެ ޔޫރޯ ފުޓްބޯޅަ މުބާރާތް ވެސް އޭނާ އަށް ގެއްލުނެވެ.
މި އަނިޔާއިން ރަނގަޅުވެ، ބާސެލޯނާގެ ފަރިތަކުރުންތަކުގައި ބައިވެރިވަމުންދާކަން ބާސެލޯނާ އިން ކަށަވަރުކޮށްދީފައިވަނީ، ސޯޝަލް މީޑިއާގައި ޝާއިޢުކުރި ވީޑިއޯއެއްގެ ޛަރިއްޔާއިންނެވެ. ނަމަވެސް، ބެލެވޭގޮތުގައި އަދި އެހާ އަވަހަށް ބާސެލޯނާގެ މެޗުތަކުގައި ގަވީ ބައިވެރިނުވާނެއެވެ.
މި ފަހަރުގެ ސީޒަނުގައި މިހާތަނަށް ބާސެލޯނާގައި އައު ކޯޗު، ހަންސީ ފްލިކްގެ އިރުޝާދުގެ ދަށުން އަންނަނީ މޮޅު ކުޅުމެއް ދައްކަމުންނެވެ. މިހާތަނަށް ސްޕެނިޝް ލަލީގާގައި ކުޅުނު ހަތަރު މެޗު ކާމިޔާބުކޮށް، އެ ޓީމު އޮތީ ތާވަލްގެ އެއްވަނައިގައެވެ. އެންމެ ފަހުގެ ޗެމްޕިއަން، ރެއާލް މެޑްރިޑް އޮތީ ބާސެލޯނާ އަށް ވުރެ ހަތަރު ޕޮއިންޓް ފަހަތުގައެވެ.
ލީގުގައި ބާސެލޯނާ އަށް ދެން އެންމެ އަވަހަށް އޮތީ އަންނަ އާދީއްތަ ދުވަހު ރަށުން ބޭރުގައި ޖިރޯނާއާ ބައްދަލުކުރުމަށް ހަމަޖެހިފައިވާ މެޗެވެ.