އާސެނަލްގެ ކޯޗު މިކޭލް އާޓެޓާ އެ ކުލަބާއެކު ހަދާފައިވާ އެއްބަސްވުން ތިން އަހަރަށް އިތުރުކޮށް، 2027 ގެ ނިޔަލަށް އެ ކުލަބުގައި މަޑުކުރުމަށް ނިންމައިފިއެވެ.
އާޓެޓާ އާއި އާސެނަލް އާއި ދެމެދު ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާއިރު, އެ އެއްބަސްވުމުގެ މުއްދަތު އިތުރު ކުރުމަށްފަހު އާޓެޓާ ބުނެފައިވަނީ އިތުރު އަހަރުތަކަކަށް އެ ކްލަބުގައި މަޑު ކުރުމުގެ ފުރުސަތު ލިބުމުން އެކަމާއި އުފާ ކުރާ ކަމަށެވެ.
ޕްރިމިއާ ލީގުގައި އާދިއްތަ ދުވަހު ޓޮޓެންހަމް އާއި ދެކޮޅަށް ކުޅޭ މެޗުގެ ކުރިން ނޫސްވެރިންނާ ވާހަކަ ދައްކަމުން އާޓެޓާ ބުނެފައިވަނީ އާސެނަލްގައި އޭނާ ކުރާ މަސައްކަތާއި މެދު ހިތްހަމަ ޖެހޭ ކަމަށާއި އަދި އޮތް ޗެލެންޖްވެސް އެނގޭ ކަމަށެވެ. އަދި ކުރިއަށް އޮތް ތަނުގައި މިއަށްވުރެ ރަގަޅު ކާމިޔާބީތަކެއް ހޯދުމަށް މަސައްކަތް ކުރާނެ ކަމަށްވެސް އާޓެޓާ ވަނީ ބުނެފައެވެ.
އާޓެޓާ އާސެނަލް އާއި ގުޅިފައިވަނީ 2019 ވަނަ އަހަރު އޭރު އާސެނަލްގެ ކޯޗަކަށް ހުރި އުނެއި އެމެރީ ދުރުކުރުމަށްފަހުގަ އެވެ. އޭރު އާޓެޓާ މަސައްކަތް ކުރަމުން ގޮސްފައިވަނީ ޕެޕް ގަޑިއޯލާ އާއިއެކު މެންޗެސްޓަރ ސިޓީގައެވެ.
އާޓެޓާ ވަނީ 20-2019 ވަނަ އަހަރުގެ އެފްއޭ ކަޕްގެ ތަށި އާސެނަލް އަށް ކާމިޔާބުކޮށްދީފަ އެވެ. މިއީ ކޯޗެއްގެ ގޮތުގައި އޭނާ ހޯދި ފުރަތަމަ ބޮޑު މުބާރާތުގެ ތަށްޓެވެ. އަދޮ ފާއިތުވެދިޔަ ދެ ސީޒަނުގައިވެސް އާސެނަލް އިން ވަނީ ޕްރިމިއާ ލީގުގެ ދެވަނަ މަގާމް ހޯދާފަ އެވެ.
ކުޅުންތެރިއެއްގެ ގޮތުގައި އާޓެޓާ ވަނީ އާސެނަލްއަށް 150 މެޗު ކުޅެދީފަ އެވެ.