މުދަލުގެ ޒަކާތުގެ ގޮތުގައި ބޮލަކަށްޖެހޭ މިންވަރު އެހެން އަހަރުތަކަށްވުރެ މިއަހަރު އިތުރު

މުދަލުގެ ޒަކާތުގެ ފައިސާ ފަޤީރުންނާއި މިސްކީނުންނަށް ބެހުމުގެ މަސައްކަތް އިސްލާމީ ކަންތައްތަކާބެހޭ ވުޒާރާއިން ފައްޓަވައިފިއެވެ.

މިއަހަރު މުދަލުގެ ޒަކާތުގެ ގޮތުގައި 12 މިލިއަނަށްވުރެ ގިނަ ރުފިޔާ ބެހުމަށް ވަނީ ހަމަޖެހިފައެވެ.

އިސްލާމީ ކަންތައްތަކާބެހޭ ވުޒާރާއިން ވިދާޅުވީ މުދަލުގެ ޒަކާތް ބެހުމަށް ހަމަޖެހިފައިވަނީ 2021 ވަނަ އަހަރުން ފެށިގެން ބަލަހައްޓަމުން އަންނަ ފަޤީރުންނާއި މިސްކީނުންގެ ދަފްތަރު ރިވިއުކުރުމަށްފަހު ޝަރުޠު ހަމަވާ ފަރާތްތަކަށްކަމަށެވެ. އެގޮތުން މިއަހަރު 3183 މީހަކަށް މުދަލުގެ ޒަކާތް ބަހާނެކަމަށް އެ ވުޒާރާއިން ވިދާޅުވެއެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ މުދަލުގެ ޒަކާތުގެ ގޮތުގައި ބޮލަކަށް ޖެހޭ ނިސްބަތް އަހަރުން އަހަރަށް އިތުރުވަމުންދާއިރު، މިއަހަރު 4000 ރުފިޔާ ބެހުމަށް ހަމަޖެހިފައިވާކަމަށެވެ.

މިދިޔަ އަހަރު ބޮލަކަށް ޖެހިފައިވަނީ 3500 ރުފިޔާއެވެ. 2022 ވަނަ އަހަރު ބޮލަކަށް 3000 ރުފިޔާގެ މަގުން މުދަލު ޒަކާތް ބަހާފައިވާއިރު 2021 ވަނަ އަހަރު 2700 ރުފިޔާ ވަނީ ބަހާފައެވެ. މިއަހަރު ބޮލަކަށް 4000 ރުފިޔާ ޖެހިފައިވާއިިރު، މިއީ މުދަލުގެ ޒަކާތުގެ ގޮތުގައި މިހާތަނަށް ބަހާ އެންމެ ގިނަ އަދަދުކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ.

ޒަކާތުގެ މަސައްކަތް ހަރުދަނާކުރެއްވުމަށް ސަރުކާރުން ގެންދަވަނީ މަސައްކަތް ކުރައްވަމުންނެވެ. އެގޮތުން ޒަކާތަށް ޚާއްސަކޮށްގެން ފުރަތަމަ ފަހަރަށް "ޒަކާތު ހައުސް"ގެ ނަމުގައި އިދާރާއެއް ވަނީ އުފައްދަވާފައެވެ. މިއިދާރާގެ ދަށުން މިއަހަރު ޒަކާތު ފަންޑުން ބޭސްފަރުވާއަށް އެކަނިވެސް ވަނީ 16 މިލިއަނަށްވުރެ ގިނަ ރުފިޔާ އެހީގެ ގޮތުގައި ދޫކޮށްފައެވެ.

މުދަލުގެ ޒަކާތާއި ބެހޭގޮތުން ޢާއްމުން ހޭލުންތެރިކުރުވުމަށް ހިންގަމުންދާ މަސައްކަތް ފުޅާކޮށްފައިވާއިރު މީގެ ނަތިޖާ ރަނގަޅުކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ. އެގޮތުން މުދަލުގެ ޒަކާތް ނެރޭ މީހުންގެ ޢަދަދު އިތުރުވަމުންދާކަން އެވުޒާރާއިން ފާހަގަކުރައްވައެވެ. ރާއްޖޭގައި މުދަލުގެ ޒަކާތް ވާޖިބުވާ ނިޞާބަކީ 9353.40 ރުފިޔާކަމަށް މިއަހަރުގެ މެއި މަހުވަނީ ކަނޑައަޅާފައެވެ. މިއަހަރުގެ ޖެނުއަރީމަހު މުދަލުގެ ޒަކާތް ވާޖިބުވާ ނިޞާބު ހުރީ 7140 ރުފިޔާގައެވެ.