ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމެންސް ވޮލީބޯލް ޗެލެންޖް ކަޕް 2024 ގެ ފައިނަލަށް ވަދެ ތިބި ދިވެހި ސަޕޯޓަރުން ފެނިފައި ހައިރާންވި ކަމަށާއި، ދިވެހި ވޮލީގެ މުސްތަގުބަލް އުޖާލާކަމަށް ގައުމީ އަންހެން ވޮލީބޯޅަ ޓީމުގެ ކެޕްޓަން ހައްވާ ރާޝިދާ ބުނެފިއެވެ.
މުބާރާތުގެ ފައިނަލުގައި ރާއްޖެ ވަނީ ކިރްގިސްތާނާ ދެކޮޅަށް މޮޅު ކުޅުމެއް ކުޅެފައެވެ. ފަސް ސެޓަށް ކުޅުނުއިރު، މި މުބާރާތުގެ ފުރަތަމަ ބުރުގައި ރާއްޖެ ވަނީ ކިރްގިސްތާނު އަތުން ތިން ސެޓުން ބަލިވެފައެވެ. ނަމަވެސް ފައިނަލް މެޗުގައި ދިވެހި ޓީމުގެ ފަރާތުން ބޮޑެތި ކުރިއެރުންތަކެއް ފެނުނެވެ. އެއާއެކު ރާއްޖެއަށް ވަނީ ރިހި މެޑަލް ލިބިފައެވެ.
ވަރުގަދަ އީރާނާއި އިންޑިއާ އަދި ސްރީ ލަންކާ ފަދަ ގައުމުތަކާއެކު ނޭޕާލުގައި ބޭއްވި ކާވާ ނޭޝަންސް ލީގު މުބާރާތަށްފަހު ދިވެހި ޓީމުން މި މުބާރާތަށް ތައްުޔާރުވީ ކުރު މުއްދަތެއްގެ ތެރޭގައެވެ. ނަމަވެސް ނޭޝަންސް ލީގުން ޓީމަށް ބޮޑެތި ފައިދާތަކެއް ކުރިއެވެ.
މާލޭގައި ކުރިއަށްދިޔަ ޗެލެންޖް ކަޕަށްފަހު ޕީއެސްއެމް ސްޕޯޓްސްއާ ވާހަކަދައްކަމުން ހައްވާ ރާޝިދާ ވަނީ ކިރްގިސްތާނު އަތުން ބަލިވި ނަމަވެސް ދިވެހި ޓީމުން ދެއްކީ އާދަޔާހިލާފު މޮޅު ކުޅުމެއް ކަމަށެވެ. އަދި ސަޕޯޓަރުންގެ އެ ހިތްވަރަށް ޝުކުރުއަދާކުރާ ކަމަށާއި ދިވެހިންގެ ސަޕޯޓު ފެނިފައި ހައިރާންވި ކަމަށެވެ. އެންމެ ފަހު ސެޓާ ހަމަޔަށްވެސް ހިތްވަރު ކުރިކަން ފާހަގަކޮށް ހައްވަ ބުނީ މެޗު ފަސް ސެޓަށް ދިޔައީވެސް އެ އުއްމީދު ގެއްލުވާނުލާ ކުރި މަސައްކަތުގެ ސަބަބުން ކަމަށެވެ. އަދި މި މުބާރާތަށް ތައްޔާރުވީ ބޮޑެތި ގުރުބާނީތަކާއެކު ކަމަށާއި މިއީ ނުހަނު ބޭނުންވި މެޑަލްއެއް ކަމަށެވެ.
މީގެ އިތުރުން ހައްވަ ވަނީ ރާއްޖޭގެ ވޮލީގެ މުސްތަގްބަލު އުޖާލާކަމަށް ބުނެފައެވެ. އަދި މި މުބާރާތުގައި ވެސް އެ ކުޅުންތެރިންގެ ތަފާތު ފެނިގެންގޮސްފި ކަމަށްވެސް ބުންޏެވެ.