ދެކުނު އެމެރިކާ ސަރަހައްދުގެ ފީފާ ވޯލްޑް ކަޕް ކޮލިފައިންގައި އެންމެ ފަހުން ކޮލަމްބިއާއާ ދެކޮޅަށް ކުޅުނު މެޗަށްފަހު ކެމެރާމަނެއްގެ ގައިގައި ޖެހުމުން އާޖެންޓީނާގެ ގޯލްކީޕަރު އެމިލިއާނޯ މާޓިނޭޒް ހޫނުފެނަށް ވެއްޓިއްޖެއެވެ.
ކޮލަމްބިއާގެ ބަރަންކީލާގައި ކުޅުނު އެ މެޗުން އާޖެންޓީނާ 1-2 އިން ބަލިވިއިރު، އެ މެޗަށްފަހު ޖޮނީ ޖެކްސަން ނަމަކަށް ކިޔާ ކެމެރާމަނުގެ މޫނުމަތީގައި މާޓިނޭޒް ޖަހާފައިވާ ކަމަށް އޭނާ ބުނެފިއެވެ. ޖެކްސަން މަސައްކަތްކުރަނީ ކަރަކޯލް ޓެލެވިޜަން އަދި އާރްސީއެން ޑިޕޯޓެސްއަށް ފުޓޭޖު ފޯރުކޮށްދޭ ކުންފުންޏެއްގައެވެ.
ކޮލަމްބިއާގެ މީޑިއާ އަކަށް މައުލޫމާތުދެމުން ޖެކްސަން ބުނީ، އަންގާރަ ދުވަހު ބަރަންކީލާގައި ކުޅުނު މެޗު ނިމުމަށްފަހު، އާޖެންޓީނާގެ ކީޕަރު، މާޓިނޭޒް އެހެން ކުޅުންތެރިއަކާ މަރުޙަބާ ކިޔަމުންދަނިކޮށް އޭނާ ގާތަށް ދިޔަ ކަމަށެވެ. އޭނާ ނެގި ފުޓޭޖުން ދައްކާގޮތުގައި، އާޖެންޓީނާގެ ރައްޔިތުން އާއްމުކޮށް ކިޔަމުން އަންނަ "ޑިބޫ" ގެ ނަމުން މަޝްހޫރުވެފައިވާ، މާޓިނޭޒް ވަނީ ކެމެރާގެ ސްކްރީންގައި ޖަހާފައެވެ. އަދި އެއާއެކު ބިންމައްޗަށް ކެމެރާ ވެއްޓުނު ކަމަށެވެ.
"ދެން ކުއްލިއަކަށް އޭނާ އަހަރެންގެ މޫނުމަތީގައި ޖެހި،" ޖެކްސަން ބުދަ ދުވަހު އާރްސީއެން ޑިޕޯޓެސްއަށް ބުންޏެވެ.
"އަހަރެން ވަރަށް ރުޅިއައި، ވަރަށް ބޮޑަށް ރުޅިއައި. އަހަރެން މަސައްކަތްކުރަނީ ހަމަ އޭނާ ވެސް މަސައްކަތްކުރާ ފަދައިން. އޭނާގެ ކަމަކީ ފުޓްބޯޅަ ކުޅުން އަދި އަހަރެންގެ މަސައްކަތަކީ ކެމެރާކުރުން." ޖެކްސަން އިތުރަށް ބުންޏެވެ.
އެއަށްފަހު ޖެކްސަން ވަނީ މާޓިނޭޒަށް މެސެޖެއް ފޮނުވައިފައެވެ. އެ މެސެޖުގައި ވަނީ، "ޑިބޫ" ގެ ނަމުން މުހާތަބްކޮށް މާޓިނޭޒްގެ ހާލު އޮޅުންފިލުވާފައެވެ. އަދި، އޭނާ އަކީ އެންމެ ފަހުން ކޮލަމްބިއާ އާ ދެކޮޅަށް އާޖެންޓީނާ ބަލިވި މެޗުގައި މާޓިނޭޒްގެ ކިބައިން އަނިޔާލިބުނު ކެމެރާމަން ކަމަށާއި، ކޮންމެ މީހަކުވެސް މެޗަކުން ބަލިވެދާނެ ކަމަށެވެ. އެ މެޗުން ވީ ބަލި މާޓިނޭޒަށް ވަރަށް މުހިންމުކަން އެނގޭ ކަމަށާއި، އެކަމަކު މުސްތަގުބަލާ މެދު ވިސްނުމަށް އެދޭ ކަމަށް ޖެކްސަން ވަނީ ބުނެފައެވެ.
މީގެކުރީން، މިފަދަ ހާލަތްތަކުގައި ފުޓްބޯޅަ ކުޅުންތެރިން މެޗުތަކުން ސަސްޕެންޑްކޮށްފައިވެއެވެ. ހަމައެގޮތަށް، އެއީ ކޮލޮމްބިއާގެ ކުޅިވަރު ނޫސްވެރިންގެ އެސޯސިއޭޝަން، "އެކޯޑް" އިން ފީފާގެ ކިބައިން އެދޭ އެދުމެކެވެ. މިކަމާ ގުޅޭގޮތުން، އެކޯޑްގެ ރައީސް، ފައިވާ ހޮޔޯސް ހެނާންޑޭޒް ބަޔާނެއްގައި ބުނެފައިވަނީ، މާޓީނެޒް ޚިޔާލު ފާޅުކުރުމުގެ މިނިވަންކަމަށް ހަމަލާދިނީ ކަމަށެވެ.
"މި ޤައުމުގެ ނޫސްވެރިކަމުގެ އޮތޯރިޓީގެ ހައިސިއްޔަތުން، އެކޯޑްއިން ބޭނުންވަނީ ފީފާއިން އެމިލިއާނޯ ޑިބޫ މާޓީނެޒްއާ މެދު ނަމޫނާ އަދަބެއް ދިނުމަށް. އޭނާއަކީ އާ ޖީލުތަކަށް ނަމޫނާއަކަށް ވާނެ މީހެއް ނޫން،" އެ ބަޔާނުގައި ބުނެފައިވެއެވެ.
މިކަމާ ގުޅޭގޮތުން، މާޓިނޭޒްގެ އިތުރުން ދެކުނު އެމެރިކާގެ ފުޓްބޯޅައިގެ މައި އިދާރާ، ކޮންމެބޯލްއިން އެއްވެސް ބަހެއް ބުނެފައެއް ނުވެއެވެ.
މިހާތަނަށް ކުޅުނު މެޗުތަކަށްފަހު ދެކުނު އެމެރިކާ ސަރަހައްދުގެ ކޮލިފައިންގެ އެއްވަނައިގައި އަށް މެޗުން ހޯދީ 18 ޕޮއިންޓާއެކު މިވަގުތު އާޖެންޓީނާ އޮތްއިރު، އޭގެ ދެ ޕޮއިންޓް ފަހަތުން ކޮލަމްބިއާ އޮތީ ދެވަނައިގައެވެ. އަންނަ މަހުގެ ތެރޭގައި ހުރިހާ ޓީމަކަށް ވެސް އަދި ދެ މެޗު އެބައޮތެވެ. އެމެރިކާ، މެކްސިކޯ އަދި ކެނެޑާގައި އޮތް ވޯލްޑް ކަޕުން ޖާގަ ލިބޭނީ ކޮލިފައިންގެ ގްރޫޕުން އެންމެ ކުރިހޯދާ ހަ ޓީމަށެވެ. އެ ސަރަހައްދުން ހަތްވަނަ އަށް ދާ ޓީމަށް ޖެހޭނީ ޕްލޭ-އޮފް ބުރުގައި ވާދަކުރާށެވެ.