އެންމެ ފަހުގެ އިންޓަރނޭޝަނަލް ބްރޭކުގައި ނޯވޭއިން ކުޅުނު ޔުއެފާ ނޭޝަންސް ލީގުގެ ދެވަނަ މެޗުގައި ލިބުނު އަނިޔާއަކާ ގުޅިގެން ކެޕްޓަން މާޓިން އޮޑެގާޑް، އެތައް ހަފުތާއެއް ވަންދެން ކުޅުމާ ދުރުގައި ހުންނަންޖެހިދާނެ ކަމަށް އެ ޓީމުގެ ޑޮކްޓަރު ބުނެފިއެވެ.
އިނގިރޭސި ކްލަބު، އާސެނަލްގެ ވެސް ކެޕްޓަންކަންކުރަމުން އަންނަ، އޮޑެގާޑް، 25، ގެ ކަނާތު ފައިގެ ކުޑަހުޅަށް އަނިޔާވީ ނޯވޭގެ ގައުމީ ފުޓްބޯޅަ ޓީމުން މިދިޔަ ހޯމަ ދުވަހު އޮސްޓްރިއާ އާ ދެކޮޅަށް ކުޅުނު މެޗުގައެވެ. މި އަނިޔާއާ ގުޅިގެން އޮޑެގާޑް ވަނީ އެ މެޗުގެ ފަހު ހާފުގައި ބަދަލުކޮށްފައެވެ.
މިދިޔަ އަހަރުތަކުގައި މޮޅު ކުޅުމެއްދައްކަމުން އަންނަ އޮޑެގާޑް މި އަނިޔާގެ ސަބަބުން ދަނޑުން ފޭބީ ވެސް ނޯވޭގެ މެޑިކަލް ޓީމުގެ އެހީތެރިކަމާއެކު އެވެ. އަދި އޭނާ އެނބުރި ލަންޑަނަށް ދިއުމަށް މަތިންދާބޯޓަށް އެރިއިރު ޕްލާސްޓަރު އަޅައިގެން ހުރި ފޮޓޯތައް ވަނީ މީޑިއާގައި ދައުރުވެފައެވެ.
"ކުޑަހުޅަށް ލިބޭ މިފަދަ އަނިޔާތަކުން އާއްމުކޮށް ރަނގަޅުވާން މަދުވެގެން ތިން ހަފްތާ ނަގާ. އެއަށްވުރެ އަވަހަށް ރަނގަޅުވުމަކީ ބޯނަހެއް. އަދި އޭގެ އިތުރަށްވެސް ދިގުލައިގެން ހިނގައިދާނެ،" ނޯވޭ ޓީމުގެ މެޑިކަލް ޑޮކްޓަރު، އޯލާ ސަންޑް އެ ގައުމުގެ ނޫހެއް ކަމަށްވާ، ވީޖީ އަށް ދިން އިންޓަވިއުއެއްގައި ބުންޏެވެ.
ކުޑަހުޅަށް ލިބޭ އަނިޔާތަކުގައި ވަގުތުން ވަރަށް ބޮޑަށް ރިހޭ ކަމަށާއި، އޮޑެގާޑްގެ ހާލަތުގައި ވެސް ވަރަށް ބޮޑަށް އެކަމުގެ އުނދަގޫތައް ތަހައްމަލުކުރި ކަމަށް ވެސް ސަންޑް ބުންޏެވެ. އެކަމާ އޭނާ ހުރީ ވަރަށް ބޮޑަށް ކަންބޮޑުވެފައި ކަމަށް ވެސް ސަންޑް ވަނީ ބުނެފައެވެ.
ސަންޑް އިތުރަށް ބުނީ، ލަންޑަނުގައި ހެދި އެމްއާރްއައި ޓެސްޓްތަކުން މިހާތަނަށް އެނގިފައިވާ ގޮތުގައި ކުޑަހުޅަށް މާބޮޑު އަނިޔާއެއް ލިބިފައިނުވާ ކަމަށް ބެލެވޭ ކަމަށާއި، ކުޑަހުޅުގެ ކަށިކޮޅެއް ބިންދައިގެން ގޮސްފައިވާނަމަ ހަ ހަފްތާއަށްވުރެ ގިނަ ދުވަހު ކުޅުމާ ދުރުގައި ހުންނަން ޖެހިދާނެ ކަމަށެވެ.
އާސެނަލަށް ދެން އެންމެ އަވަހަށް އޮތީ، އަންނަ އާދީއްތަ ދުވަހު ޕްރިމިއާ ލީގުގައި ވާދަވެރި ޓޮޓެންހަމް ހޮޓްސްޕާއާ ބައްދަލުކުރުމަށް ހަމަޖެހިފައިވާ އުތުރު ލަންޑަން ޑާބީ އެވެ. މި މެޗަށް ނިކުންނައިރު އޮޑެގާޑަށް އަނިޔާގެ ސަބަބުން ނުކުޅެވޭނެކަން ކަށަވަރުވެފައިވާއިރު، ސަސްޕެންޝަނުގެ ސަބަބުން ޑެކްލަން ރައިސް އަށް ވެސް އެ މެޗުގައި ނުކުޅެވޭނެ އެވެ.
މީގެއިތުރުން، މި ފަހަރުގެ ސީޒަނަށް ރެއާލް ސޮސިއެޑާޑުން އެ ޓީމާ ގުޅުނު ސްޕެއިނުގެ މިޑްފީލްޑަރު، މިކޭލް މެރީނޯ އަށް ވެސް ހަފްތާތަކަށް ކުޅުމާ ދުރުގައި ހުންނަން ޖެހިފައިވުމަކީ މި ދަނޑިވަޅުގައި އާސެނަލްގެ ކޯޗު، މިކޭލް އާޓޭޓާ އަށް އޮތް ބޮޑު ނުތަނަވަސްކަމެކެވެ.
ލީގުގައި ޓޮޓެންހަމްއާ ދެކޮޅަށް ކުޅުމަށްފަހު، އާސެނަލަށް ދެން އޮތީ މި ފަހަރު މުޅިން އައު ފޯމެޓަކަށް ކުޅުމަށް ހަމަޖެހިފައިވާ ޔުއެފާ ޗެމްޕިއަންސް ލީގުގައި އަންނަ ބުރާސްފަތި ދުވަހު އިޓަލީގައި އެޓަލާންޓާއާ ބައްދަލުކުރާ މެޗެވެ.