އޮފީސް ހޭންޑްބޯޅަ މުބާރާތް: ފުރަތަމަ ޑިވިޝަނުގެ ޗެމްޕިއަންކަން އެމްޕީއެލް އާއި އިމިގްރޭޝަނަށް

މައިލޯ އަށްވަނަ އިންޓަރ އޮފީސް/ކޮންޕެނީ ހޭންޑްބޯޅަ މުބާރާތް 2024 ގެ ފިރިހެން ފުރަތަމަ ޑިވިޝަނުގެ ޗެމްޕިއަންކަން އެމްޕީއެލް އިން ހޯދިއިރު، އަންހެން ފުރަތަމަ ޑިވިޝަނުގެ ޗެމްޕިއަންކަން މޯލްޑިވްސް އިމިގްރޭޝަނުން ހޯދައިފިއެވެ.

ދެ ޑިވިޝަނަކަށް ބަހާލައިގެން ކުރިއަށްދާ މި މުބާރާތުގެ ފިރިހެން ފުރަތަމަ ޑިވިޝަނުގައި ހަތަރު ޓީމެއް ވަނީ ވާދަކޮށްފައެވެ. ގައުމީ ހޭންޑްބޯޅަ ކޯޓުގައި ރޭ ކުޅުނު ފައިނަލް މެޗު އެމްޕީއެލް އިން ކާމިޔާބުކޮށްފައިވަނީ ކުލަބު ވެމްކޯ އަތުން ފަސޭހަކަމާއެކު 25-45 ގެ ތަފާތު ބޮޑު ނަތީޖާއަކުން މޮޅުވެގެންނެވެ. މި މޮޅާއެކު އެމްޕީއެލް އިން ވަނީ މި މުބާރާތުގެ ޗެންޕިއަންކަން ޖެހިޖެހިގެން ފަސްވަނަ ފަހަރަށް ކާމިޔާބުކޮށްފައެވެ.

ފިރިހެން ފުރަތަމަ ޑިވިޝަނުގެ އެންމެ މޮޅު ހަތް ކުޅުންތެރިންނަކީ ވެމްކޯގެ އަބްދުﷲ ޒިމާމާއި، އަބްދުﷲ ޒިޔާއު އާއި، އިބްރާހީމް އަޒުހާން އަދި ޕޮލިސް ކުލަބުގެ އިބްރާހީމް މުސްފިރުރާއި، މުޙައްމަދު ޝައިހާން އިބްރާހީމްގެ އިތުރުން އެމްޕީއެލްގެ މުޙައްމަދު ފިރުނަސް އަބްދުﷲ އާއި އިސްމާޢީލް ފަރުހާނެވެ.

މީގެ އިތުރުން ހަ ޓީމު ވާދަކުރި އަންހެން ފުރަތަމަ ޑިވިޝަނުގެ ޗެމްޕިއަންކަން އިމިގްރޭޝަނުން ހޯދީ ރޭ ކުޅުނު ފައިނަލް މެޗުގައި ވެމްކޯ އަތުން ފަސޭހަކަމާއެކު 42-23 ގެ ތަފާތު ބޮޑު ނަތީޖާއަކުން މޮޅުވެގެންނެވެ.

މި ބައިގެ އެންމެ މޮޅު ހަތް ކުޅުންތެރިންނަކީ އިމިގްރޭޝަނުގެ މަރިޔަމް ލީން މުޙައްމަދާއި، ފާތުމަތު އަރޫޝާ އާއި، ފާތުމަތު ރިޝްމާ އާއި، ފާތުމަތު ޝިފާ އާއި، އާމިނަތު އިސްރާއު އަބްދުއް ޝުކޫރާއި އައިޝަތު ރިމާގެ އިތުރުން އެމްޕީއެލްގެ ޒުހާ ހުސެއިނެވެ.

މި އަހަރުގެ އޮފީސް ހޭންޑްބޯޅަ މުބާރާތުގެ ފުރަތަމަ ޑިވިޝަނުގެ ކުޅުން ރޭ ނިމުނުއިރު، މިއީ އޮފީސް ކުންފުނިތަކުގެ މެދުގައި ކުރިއަށްދާ އެންމެ ފޯރިގަދަ ހޭންޑްބޯޅަ މުބާރާތެވެ.